الحلقة الأولى-عالم الشياطين-سيرة إد ولورين وارن غير العادية
عالِم الشياطين
سيرة إد ولورين وارِن غير العادية
الحلقة الاولى
الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.
قاموس أوكسفورد الإنجليزي.
***
ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.
خارج مكتب إد وارِن في مقاطعة فيرفيلد، ساعة كنيسة قديمة بتدق وتتابع حركة الزمن بدقة. في داخل المكتب، كان إد وارٍن، الخمسيني الأشيب، قاعد ورا مكتبه وجنبه أباجورة نحاس بتنشر نورها على مئات الكتب المحيطة به. كتب عن الغوامض والموروثات المرعبة، وعن علم دراسة الشياطين.
وراه على الحيطة، ممكن تشوف صور لرهبان، وطاردو أرواح شريرة متجهمين، كلهم واقفين مع إد وارٍن في أماكن مختلفة.
إد كان قاعد بيشتغل وسط سكون الليل برغم إن يومه كان عصيب، ومش باين إنه إنتهى.
من ساعة بس، ساعة الحائط دقت تلات دقات. إد بصلها وكمل شغله رغم قرب الفجر، ورغم أنه عارف ان الساعة تلاتة مساء هي ساعة السحرة، ساعة الفِتن، ساعة المسيخ، إلا أنه كمل شغله وحاول يركز.
من كم ساعة، كان لسه راجع هو وزوجته لورين لبيتهم في ولاية كونكتيكت بعد رحلة صعبة لتقصي قضية منزل مسكون في لونج آيلاند.
في ديسمبر سنة 1975، أشترى المنزل شخص إسمه جورج لوتز، واتنقل للعيش فيه مع زوجته وأولاده التلاتة وقت الكريسماس تقريبا.
المالك السابق للبيت ده، إبنه الكبير قتل عيلته كلها المكونة من ست أفراد وهم نايمين. الجريمة دي حصلت الساعة تلاتة وربع صباح يوم 13 نوفمبر 1974 وقتلهم ببندقية.
في يوم 15 يناير 1976 عائلة لوتز هربت من البيت وإدعوا أنهم كانوا ضحية لقوى خارقة ساكنة في البيت. القضية دي اتعرفت فيما بعد بقضية "رعب أميتفيل"
الصحافة ناقشت القضية دي لفترة طويلة، لحد ما الموضوع وصل لإد ولورين وارِن. ليه وصل لهم؟ لأن الزوجين في الوقت ده كانوا بيُعتبروا رواد في مجال الماورائيات حتى بالنسبة لزملائهم. الزوجين كانوا بيمارسوا مهنة تقصي القضايا الماورائية من أكتر من تلاتين سنة، وحققوا في أكتر من الف ظاهرة وقضية غريبة لحد السبعينات وقت وقوع لغز رعب اميتفيل.
الناس كانت بتقول ان في "شبح" في البيت ده، لكن الزوجين بعد تقصي وبحث دام لتلات أيام في البيت كان لهم رأي تاني، رأي مرعب. قال إد وارن:
- " في رأينا، في كيان معين ساكن في منزل عيلة لوتز، لكنه مش شبح أبدا."
هل معنى كلامهم ده أن في حاجة تانية غير الأشباح ممكن تسكن البيوت؟
- " طبعا.. في نوعين من الكيانات اللي بنقابلهم في قضايا المنازل المسكونة. نوع منه أصله بشري، والنوع التاني غير بشري. الكيان غير البشري هو كيان عمره ما عاش في هيئة بشرية مطلقا."
الغريب إن إد شخصيا من أسبوعين واجه كيان غير بشري، وفي مكتبه!
مكتب إد في مبنى صغير زي كوخ كده منفصل عن بيته، لكنه متصل به بممر طويل. في صباح يوم من شهر فبراير كان إد شغال على قضية أميتفيل، وسمع الكالون الي بيقفل الباب في نهاية الممر اتفتح وسمع صوت اصطدام بأرضية المكتب الخشبية، تلاه صوت خطوات بتتجه ناحيه المكتب الي هو قاعد وراه.
مال إد لورا وهو قاعد، وكان متوقع انه يشوف لورين جايه في الممر ومعها كوب قهوة كالعادة، لكن محدش ظهر. نادى إد: "لورين؟" لكن محدش رد عليه. كل اللي سمعه ساعتها هو صوت نحيب الرياح لكنه كان صوت غريب جدا وغير معتاد حتى إن جسمه إقشعر وشعر إيديه وقف.
- "لورين؟ إنت هنا؟"
وتاني، محدش رد عليه. إبتدا صوت النحيب والعواء يعلى بشكل مرعب، وإفتكر إد فجأة إنه سمع تلات خطوات فقط من شوية مش خطوات شخص عادي مستمر في المشي ناحية هدفه. في حاجة غلط!
فجأة نور الأباجورة قل وكأنه مجرد نور شمعة، وإنخفضت درجة حرارة الأوضة وبقت أشبه بفريزر. وشم إد ريحة الكبريت الي ملت المكتب.
كده وضح لإد أنه بيواجه ظاهرة ماورائية، ففتح درج المكتب بسرعة وطلع زجاجة من الماء المقدس وصليب خشبي كبير وقام من ورا مكتبة ومشي بحذر ناحية المدخل. وهو ماشي شاف تجسد مالي الفراغ من الأرض للسقف، وكان أسود من أي لون أسود ممكن حد يشوفه في الطبيعة. الكيان ده أتحرك ببطء ناحية إد ومر على شماله وهو بيغمق وبيكبر أكتر وبياخد شكل دوامة. في وسط الدوامة إد شاف كيان ما بيتجسد لشكل مادي أقرب للشكل البشري.
كشخص دارس لعلم الشياطين، إد أدرك أنه لازم يتصرف بسرعة قبل ما الكيان ده يتحول لشيء أخطر. رفع الصليب ناحية التجسد الي كأنه شخص متشح بالسواد. في اللحظة دي، الكيان إتجه بسرعة جدا ناحية إد!
ثبت إد نفسه في الأرض كويس علشان ماينجرفش مع الكيان ده، ورفع الصليب وقنينة الماء المقدس ناحيته وقال بصوت جهوري ثابت:
- " آمرك أن تنصرف، بإسم يسوع المسيح."
للحظات، الكيان ثبت في مكانه على بُعد أقل من قدم من الصليب، وقبل ما يتراجع ببطء وهو بيرسل لإد رؤيا واضحة ومرعبة للورين في حادث سيارة مميت على الطريق السريع. بعدها اختفى الكيان في الممر.
قبل ما يسمح إد لنفسه أنه يسترخي، إفتكر أن الكيان ده ما إنسحبش غالبا، وأنه ممكن يروح يهاجم لورين في البيت.
إد تلافى المرور عبر الممر وخرج من الباب الجانبي وجري للبيت وهو مرعوب من أنه ممكن يكون إتأخر على إنقاذ لورين.
لورين كانت قاعدة في سريرها بتقرأ، فجأة نزلت الكتاب، وحست أن في حاجة غريبة بتحصل أو هاتحصل.
- " كنت مرعوبة، بس مش قادرة أحدد إيه مصدر الخوف. كل حاجة كانت عادية، لكن اما بصيت للكلبين الي نايمين جنب السرير لقيتهم ثابتين تماما وشعرهم واقف في الهوا! وفجأة بدأت فوضى عارمة."
الكيان الأسود الي إد شافه أعلن عن هجوم عنيف، وأصدر صوت مروع وصفته لورين بعدين بأنه شبيه بقرع لوح معدني بشاكوش. وفي ثواني درجة حرارة الغرفة نزلت لدرجة التجمد. توقف الصوت لكن لورين حست بالكيان بيهجم وبيقرب من ناحية الممر في الدور السفلي، كانت حاسه بيه بيقرب وبيعدى على حجرة المعيشة، وبيطلع السلالم.
- "ايا كان الشيء ده، كنت حاساه بيدور عليا أنا بالذات. لكن هو عبارة عن إيه أو جاي هنا ليه معرفش. فجأة إعصار من السواد دخل الحجرة. حاولت اتحرك او أصرخ ماعرفتش. حسيت بالنهاية لأول مرة في حياتي رغم كل الي واجهته قبل كده. وكوسيطة روحانية، حسيت ان الكيان ده مرتبط بالموت، لكنه مكانش عايز يموتني، كان عايزني، عايز يستولي عليا. الوضع بعد كده بقا أسوأ بكتير، حسيت أني بنسحب جوه الكيان الأسود ده، ومكانش في ايدي أي حاجة اعملها. صرخت جوايا ودعيت ربنا يحميني وحاولت ارسم علامة الصليب بيني وبينه. الفعل ده وقف الكيان مكانه لكنه ما بعدهوش. فجأة شفت إد بيدخل الحجرة فالكيان ده هرب للحجرة التانية وإد شافه بيخرج من المدخنة ويختفي.
عموما مافيش حاجة اتضررت أو إتكسرت، ومكانش ده أول مواجهة لنا مع كيان غير بشري طبعا."
إيه الي شافه إد ولورين؟ وإيه تفسيره؟
لو حابين تعرفوا أكثر عن حكياة رعب اميتفيل، انصحكم تقروا ترجمة بسمة الخولي للرواية وهانزل صورتها –الرواية مش بسمة- مع البوست.
كمان في اول كومنت هانزل لينك بالعربي عن من هم الزوجين وارن.
تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.
#إد_لورين_وارن
#عالم_الشياطين
#شيرين_هنائي
Comments
Post a Comment