الحلقة ‏الثامنة ‏عشر- ‏حصاد ‏الشيطان

حصاد الشيطان

( عن قضية الإستحواذ الشيطاني على المزارع موريس ثريو- قصة حقيقية)

الحلقة 18 وقبل الأخيرة

فتح فالوكيفتيش باب البدروم ونور النور، وشال البنت ونزل بيها السلالم. مكانش في حاجة جواليه غير أكوام خشب للدفاية، وصناديق بطاطس وأكياس بذور واسمدة..بدروم عادي جدا.

- مافيش حاجة هنا يا حبيبتي..

بس كارلا شاورت على الركن البعيد وبدأت تصرخ.

لف الشاب حوالين نفسه بس ما قدرش يشوف حاجة، فضلت كارلا تصرخ ووترته جدا، قفزت من بين إيديه وطلعت بسرعة على إيديها ورجليها..وهي في منتصف السلم فكر فالوكيفتيش يحصلها أحسن.

________________

كيث زوج شيريل بنت نانسي، كان مضطر ييجي معاها وهي رايحة تزور أمها. رغم الحكايات الي كانت بتحكيها نانسي عن موريس في التليفون، ورعبه من زيارة موريس، إلا إنه كان لازم يروح معاها، ماهو ماينفعش يسيبها تروح لوحدها ويحصلها حاجة هناك.

بعد الغدا، وكان اليوم ماشي تمام بدون أي شيء مرعب، قعد كيث قدام البيت سارح في المرزعة والشجر وبيفكر إمتى الوقت المناسب الي يقدر يدخل فيه المطبخ ويقول لمراته إن الوقت إتأخر ولازم نروح قبل الضلمة.

شاف كيث موريس حماه، وهو شغال في الأرض قدامه، جسمه صغير وهزيل وواضح إنه مرهق جدا، بس كان شايل الأرض كلها لوحده بكمية شغل تتعب خمس شباب أقوياء.

سمع كيث صوت باب البيت بيتفتح، بص يشوف مين جاي، لقاه موريس!

مشي موريس التاني لحد ما وصل لموريس الأول وإندمج في جسده! المنظر كان فقو طاقة إحتمال الشاب، فدخل البيت وخلال تلات دقايق كان حاطط مراته في العربية وفي الطريق بره المزرعة. سألته مراته وهي مش فاهمة:

- طيب كنت أكمل القهوة؟

- معلش..بعدين نبقا نرجع ونشرب قهوة ونبات وكل حاجة أما موريس يخف. المهم أنتي مش هاتعتبي المكان ده تاني طول ما هو على الوضع ده.

_______________________

أرسل فالوكيفيتش لإد وارن شرائط التسجيل الي سجلها طول الإسبوع الي أقامة عند موريس، وإتصل بيه علشان يعرف رأيه. سأله إد:

- بتقول إن طول الوقت كان في أصوات طرقات وخدوش و,,و,,, وإنك سجلت ده على الشرايط..بس للأسف الشرايط مافيهاش غير أصوات كلامكم والأصوات العادية في المكان!!!

____________________ 

أصبح الوضع أخطر على نانسي نفسها كمان..

في ليلة كانت الكلاب بره البيت بتنبح، وفي أصوات رنين تليفون واصوات عربيات، لكن كل ده مكانش له مصدر.

نانسي قالت لموريس:

- موريس تعالى أحفظك صلاة السلام عليك يا مريم..هاقول وإنت تقول ورايا ماشي؟ صدقني برتاح أما بقولها.

- ماشي موافق..قولي..

- السلام عليك يا مريم..يا ممتلئة نعمة..

- السلام عليك يا مريم يا ممتلئة نعمة..

-الرب معك..مباركة أنت في النساء، ومبار........................

قطع صلاة نانسي شعورها بيد قوية بيتطبق على حنجرتها بعنف. فضلت تخبط حواليها في رعب وموريس كانه مش موجود. فتحت نور الأباجورة وشافت قدامها سحابة حمرا بتتكون. بصت نانسي لموريس لقيته بيبتسم إبتسامة  مرعبة وإيديه غرقانة دم. 

موريس إختفى في ظلام فقدانها للوعي وي بتفكر إن الوقت إتأخر أوي على طرد الشياطين..

بعد فترة القبضة فكت، وشهقت نانسي في محاولة للتنفس..قامت جري وراحت الحمام وقفلت على نفسها من الخوف، حاولت تتنفس لحد ما قدرت تقف على رجليها وبصت لنفسها في المراية، كان حوالين رقبتها آثار صوابع طويلة حمرا.

دخلت أوضتها تاني لقت موريس نايمفي سلامم..

قعدت نانسي على السرير تعيط، كده بقت مسألة حياة أو موت، ومحدش في إيده حاجة يساعدهم بيها..تعمل إيه؟!

_________________________

رفض الأسقف هارينجتون رجاء إد وارن إنه يوافق على إعطاء تصريح للأسقف المنشق روبرت ماكينا علشان ينقذ موريس. 

فمالاقاش إد حل غير إنه يتصل بنفسه بماكينا ويشوفوا لو يقدروا يتصرفوا في السر، ولو الأسقف نفسه هايوافق على تحمل مسؤلية الطقس لو حصل وفشل ومات موريس أثناؤه.

الكنيسة مش هاتكون وراه ولا هاتبعت له محامي ولا هاتدافع عنه..هايبقا لوحده تماما كأنه قتل موريس بمسدس.

الأسقف ماكينا كان على علم بقضية موريس من الصحف، وكان ربنا بيلهمه يدعيله في القداسات، وطبعا مكانش في إيده حاجة يعملهاله أكتر من كده طالما ماحدش إستدعاه.

إد طلب منه يتقابلوا لطلب ورجاء شخصي، وافق الأسقف وكان عارف إد عايز يكلمه في إيه، وإداله ميعاد في اليوم التالي.

نام ليلتها الأاسقف ماكينا في سريره، وحس بإقتراب عدو منه.. حس بمسبحته بتتلف حوالين رقبته بهدوء، فبدأ يصلي في سره ويطلب من ربنا القوة لحد الصبح. أما صحي لقا مسبحته مقطوعة جنبه على السرير..

_____________________ 

كل الي يعرف روبرت ماكينا كان بيقول إنه شجاع، تحمل نتيجة قراره بالإنفصال عن الكنيسة وأقام كنيسته حسب إقتناعه، وبدون أي مساعدة مادية.

الأسقف أخرج شياطين من بيوت كتيرة، لكنه كان بيشعر بمسؤليه تقيلة تجاه طرد الشياطين من البشر، وماجاتش القضية الي حسها فعلا حيقيقة ويقدر من خلالها يخوض حربه الأخيرة مع الشيطان.

روبرت ماكينا كان عنده 55 سنة، طويل ونحيل، لكن الصيام كان بيديله قوة بدنيه تعينه على أداء مهامه بنفسه بدون مساعدات.

راح الأسقف كنيسته في يوم ربيعي ممطر، وحس إن مع كل قطرة مطر بركة وقوة من ربنا وتشجيع على خوض معركته مع الشيطان وإنقاذ البائس موريس ثريو.

صلى لمدة ساعة، بعدها رجع مكتبة وأخد الأدوات الي هايحتاجها في طقس طرد الشياطين، ومانسيش الكتاب القديم (ريتوال روماني) الي بيحوي طقس طرد الشياطين الأصلي باللغة اللاتينية.

جمع كل الي هايحتاجة في شنطة جلدية صغيرة، وإتصل بإد وارن علشان يبلغه إنه مستعد.

- إحنا كمان مستعدين..هانحصلك على هناك، ومعانا كاميرات و8 مساعدين وكل الي نقدر عليه علشان لو حصل مكروه نقدر ندافع عنك. ماتقلقش وماتخافش من حاجة.

إد كان بيفكر يعرض على رجل الدين إنه يوصله، لكنه كان عارف عادته، كان بيحب يسوق بنفسه لمكان القضايا ويصلي في الطريق في هدوء.

__________________

تاريخ إقامة طقس طرد الشياطين على موريس ثريو كان 2 مايو..

ساق غد وارن عربيته مع لورين، والشمس كانت بدأت تطلع من وسط الغيوم، وإعتبرتها لورين فال خير. الطريق في الربيع كان أجمل، والعصافير الملونة كانت بتبص عليهم من فوق الأغصان. لكن إد كان شارد، ودي عادته في الظروف الممثالة. مابيتكلمش كتير أو يبدي اي رد فعل قبل طقس طرد الشياطين.

قالت له لورين:

- ماتقلقش يا حبيبي، كل حاجة هاتبقا تمام.

وقفت عربية غد قدام بيت موريس، وقابلهم فريق إد الي وصل قبلهم، ومعاهم نانسي وموريس الي كان قاعد بيشرب قهوته.

حاول إد يغير من مزاج موريس المتعكر بالحديث عن موضوع موريس المفضل، الطقس. لحد ما موريس إتحسن وإقترح إد:

- حجرة المعيشة عندكم واسعة، إيه رأيكم ننتقل لها ونبدأ الطقس أول ما الأسقف يوصل؟

دخلت نانسي ومعاها كريس ماكنيل وكريس مارشال، الي بقوا من العيلة خلاص، وأعادوا ترتيب قطع الأثاث في حجرة المعيشة، بعدها دخل الأسقف ماكينا مع إد لوحدهم وإرتدى الأسقف ثيابه الكنسية ووضع أدواته على الترابيزة قدامه، وإستدعوا موريس ثريو لجلسة طرد الشياطين الأخيرة..

الجلسة الي هايتغير فيها كل واحد حضرها للأبد، والي هايكون أحد الحضور على شفا الموت بعدها..

تابعوا الحلقة الأخيرة بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل. 

شكرا لثقتكم في المحتوى الي بقدمه ومنورين دايما.

#حصاد_الشيطان

#شيرين_هنائي