الحلقة الثامنة عشر-عالم الشياطين

عالِم الشياطين

سيرة إد ولورين وارِن غير العادية

الحلقة 18

قضية آل بيكفورد

عائلة تحت الهجوم- الجزء الأول

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

في مارس 1974، كتب بيتر بيكفورد – عمره 50 سنة – ملحوظة لزقهاعلى باب التلاجة علشان يفتكر بيها إن عجلة عربية بنته فيكي محتاجة تتغير لأنها فضيت منها وهي رايحة الصيدلية، كان واضح إن فيها قطع.

مافكرش بيتر أبدا إن حادث بسيط زي ده ممكن يكون بداية حصار كيانات شيطانية عدوانية للعيلة كلها، لدرجة تدمير منزلهم بالكامل.

الجحيم هايتفتح عليهم بسبب إن الليلة السابقة لحادث العربية، بنت بيتر- فيكي -الي عندها 19 سنة عدت حدودها..دعت كيان شيطاني للتجسد. برغم إن البنت كانت نيتها طيبة، لكنها تجاوزت كل الحدود، وإدت للكيان تصريح غير مشروط.

القضية دي واحدة من أبشع قضايا الهجوم الشيطاني الي شهدها الزوجين وران في حياتهم.

بيحكي إد وبيقول:

- "بداية الأحداث كانت قبل ما إنت ذكرت بشوية..قبلها بسنة. البداية كانت أما فيكي إستخدمت لوح ويجا زيها زي كتير في سنها من الشباب الي بيدفعه فضوله لإستكشاف المجهول. للأسف كانت عيلتها متزمته ومقفلة عليها هي واخوها إيريك الي عنده 15 سنة. فمكانش لها أصدقاء كتير أو علاقات عاطفية..الوحدة والملل دفعوها إنها تصحى بليل بعد ما عيلتها نامت، وتخرج لوح الويجا الي كانت مخبياه، وتحاول إنها تلاقي صديق من العالم الآخر. حطت كفها على البلانشيت، وبدأت تسأل اللوح أسئلة.

في حد هنا؟ إسمي فيكي لويس بيكفورد..في روح هنا تقدر تسمعني؟.. فجأة البلانشيت إتحركت ناحية كلمة (نعم). لسوء حظ فيكي، كان في كيان شيطاني متواجد في المكان وسمعها.

من يومها وفيكي بتتواصل مع الكيان كل ليلة، وكانت بتستنى الليل ييجي علشان تكلم صديقها وتقضي ساعات بتحكي معاه من خلال لوح الويجا. الكيان إستغل ضحيته لأقصى درجة، وبدأ يبعتها رسائل محتواها عاطفي زي:

كنت جميلة جدا في الفستان البني النهاردة..فيكي إنت أجمل من كل البنات الي حواليكي فعلا..ممكن ترفعي شعرك لفوق بكرة، شكلك بيبقا جميل أوي كده.

ليلة ورا التانية، بقت علاقتهم أقوى وبدأ الكلام يتغير لكلام زي:

إنت بتسعديني جدا يا فيكي بوجودك معايا.. لو كنت أقدر كنت إتجوزتك..لو كان ليا جسم ما كونتش هاتأخر أبدا.. إنت محظوظة جدا إنك عايشة..إحكيلي إيه إحساسك وإنت عايشة النهاردة؟

بتحكي فيكي للكيان في تعاطف أحداث يومها ومشاعرها، وأخيرا إتشجعت وسألته إزاي مات.. طبعا كانت فاكره إنها بتكلم شبح إنسان ميت. حكالها حكاية مأسوية عن موته، وحكالها قد إيه كان حاسس بالوحدة قبل ما يلاقيها. البنت إتعلقت بالكيان جدا.. وكان دايما بينهي إتصاله بعبارة (أشوفك بكرة).

خلال شهور، أقنع الكيان فيكي إنه شبح شاب مراهق، ومات زمان أيام ما كانت هي طفلة. حكت فيكي للكيان كل مشاعرها ومخاوفها..وجه اليوم الي سألته فيه عن إسمه، فإرتبك وقالها إن ماينفعش يقول إسمه الحقيقي وإلا هايتحرم من نعمة التواصل معاها وهاضيع للأبد في البرزخ الي عايش فيه دلوقتي.

مع الوقت إتطورت العلاقة بينهم لشكل أكثر حميمية، وإعتبرته فيكي حبيبها. وكان بيحكيلها حاجات هاتحصل في المستقبل وبتحصل فعلا، وده خلى الكيان له مصداقية كبيرة جدا عندها.

بعد سنة من علاقتها بالكيان، أصبحت فيكي معتمدة عاطفيا بشكل كامل عليه. سألته: ممكن توريني المستقبل كله؟

الكيان تحمس جدا، وخلال جلسة طويلة، ورا فيكي حياتها خلال الست سنين الي جاية، وحكالها تفاصيل محددة لحد ميعاد ميلاد أول إبن لها. قالها إن هايكون عندها 3 أطفال بحلول سنة 1978. (الغريبة إن ده الي حصل لفيكي فعلا بعدها! هل زرع ده في دماغها وهي نفذته؟ هل كان قادر يشوف لمحات من المستقبل فعلا؟)

فيكي كان نفسها تشوف صديقها ده جدا من كتر ما كانت متعلقة به. في يوم 2 مارس، إترجته علشان يتجسد وتشوفه حتى لو مرة واحدة..كانت عايزة تعرف بس شكله علشان تتخيله.

في الصباح التالي، راح بيتر بيكفورد علشان يركب عربيته، بس لقاها مش شغالة. فتح مقدمة العربية ولقا كذا عطل مالهومش علاقة ببعض ظاهرين قدامه، وكان أغلبها فيش مخلوعة وخراطيم مفكوكة. صلح الي كان شايفه لكن برضو العربية ما إشتغلتش. قطرها لحد الميكانيكي، وتاني يوم رجعله فالميكانيكي قال له إنه لقا الموتور من جوه مفكوك وكل حاجة سايبة!

في نفس الإسبوع ده، بدأت حوادث تخريبية تحصل في بيت بيكفورد. جرس الباب الخلفي إتخلع من مكانه، الشجر الصغير تم تقليعه من جذوره في الجنينة. وعلى السطوح لقا بيتر إن الماسورة السميكة القوية الي ماشي فيها أسلاك الكهربا متنية على شكل زاوية قايمة..المسورة دي كان حديد مُبطن وطولها 6أقدام.

يوم الجمعة 8 مارس، كتب بيتر على رقة علقها على التلاجة إن في إطار مقطوع في العربية محتاج تغيير. تاني يوم الإطار الجديد الي ركبه لقاه مقطوع بسكينة.

في الوقت ده، فيكي مابقتش قادرة تتواصل مع صديقها عبر لوح الويجا.. كل ليلة تجرب، وكانت البلانشيت بتتحرك ناحية كلمة (وداعا). مكانتش تعرف إن صديقها الإثيري خلاص أخد الي عايزه منها.

خلال الإسبوع التاني من مارس، التخريب الي بيحصل في البيت والعربية بقا فوق إحتمال بيتر فإشتكى للشرطة. أما البوليس جه بيتر وراهم الشجر المقلوع والإطارات المقطوعة ومحرك العربية المفكوك رغم إن العربية كانت في جراح مغلق. بلغهم كمان إنه كان بيسمع حد بيخبط على جدران البيت من برة بس مكانش بيشوف مين الي بيعمل كده. البوليس قال لبيتر إنهم هايوصوا حارس الأمن يراقب البيت خلال وردية الليل ويبص عليه كويس كل ما يعدي من قدامه.

في بداية الإسبوع التالت، بقا واضح إن الي بيعمل التخريب ده مش طفل مشاغب ولا شخص مختل. بعد الشغل، كان بيتر وزوجته شارون قاعدين في المطبخ بيسألوا إيريك عن صحابه وهل لهم علاقة بالعمليات التخريبية دي نتيجة خلاف بينه بينهم مثلا؟ وفجأة التلاتة سمعوا صوت خبط جامد جدا من جوه البيت! ولقوا فجوة بعرض 18 بوصة في حائط غرفة إيريك! الغريبة إن إتجاه الثقب كان مُتجه لبره! يعني الي عملها كان جوه البيت، وهنا بدأت الأعمال التخريبية تاخد منحنى تاني خالص.

بليل أما الأأسرة دخلت تنام، سمعوا صوت خربشات من جوه الحيطان، كأن في فار ماشي جواها. بيتر سمع كمان كأن لوح من خشب الأرضية بيتخلع من مكانه، فقام نور النور ولف على البيت كله من فوق لتحته، بس مالاقاش أي خشب أرضيات سايب أو متحرك. 

رغم إن بيتر مالاقاش أثر للأصوات دي، إلا إنها إستمرت طول الأسبوع. في نفس الوقت، عربية فيكي تلات عجلات منها إتقطعوا، وحتى بعد ما غيرتهم كلهم، الفردة الرابعة إتقطعت بسكينة برضو والعربية نفسها كانت في الجراج المقفول.

بعد إنتهاء تالت إسبوع من مارس، الظاهرة بدأت تبقا أعنف. بليل بدأت طرقات في مجموعات من تلات طرقات في المرة. طرقات كانت عالية جدا وبتهز البيت. مكانش حد من الجيران حاسس بحاجة ولا سامع الطرقات دي طبعا.

بعدها بدؤوا يسمعوا صوت "تَفّسُّخ" في البيت كأن في كيان عملاق بيكبر جوه وبيكسره، بالإضافة لأصوات خلع ألواح خشب الأرضيات..الأصوات كانت بتستمر طول الليل وبتمنع الأسرة من النوم.

يوم 22 مارس، صمامات مواسير المياه السخنة في البيت كلها إتفكت وغرقت المكان بالمية المغلية..بيتر مكانش عارف يتصرف إزاي وبدأ كأي أب يلوم فيكي وإيريك! بس مكانش حد فيهم في البيت وقت ما ده حصل، الأسرة رجعت من برة لقت البيت عبارة عن ينبوع مية مغلية والبخار في كل مكان.

غير الأب المواسير كلها، بس طبعا كان في خساير تانية زي خشب الأأرضيات والمفروشات والحوائط. بس بمجرد ما غيرهم الميه ضربت تاني! آخر ما زهق قفل محبس الميه السخنة خالص من البدروم.

مع الوقت، الطرقات بقت أعنف..وبيتر فصص البيت كله ومالاقاش أي مصدر للأصوات دي، فزهق وإتصل أخيرا بمتخصصين في صيانة السباكة والمدافيء.

عامل صيانة الدفايات وصل تاني يوم الصبح، مالاقاش أي عطل في أي حاجة رغم إنه قضا 19 ساعة في بيت بيكفورد بيدور على صوت الطرقات الي هو نفسه كان سامعها. بس للأسف أجهزة التدفئة والمداخن مكانتش هي سبب الأصوات.

تاني يوم جه السباك، فحص صمامات الغلايات في البدروم ومكانش بيتر موجود، فشرحتله شارون المشكلة وإن الصمامات بتسيب والمية والبخار بيغرقوا الدنيا. السباك مالاقاش أي عيب في الغلايات، وعلى سبيل الإحتياط غير كل الصمامات بصمامات جديدة وربطهم جامد جدا. وخلص الشغل ولسه هايمشي لقا الصمامات الجديدة الي ركبها على الأرض كلها! كرر العملية تاني وبرضو لقا الصمامات الجديدة الي ركبها على الأرض والقديمة مكانها. الرجل قلق، فربط القديمة كويس و لم حاجاته وقال لشارون وهو ماشي: في قلق عندكوا هنا..خلي بالك!

في نفس الأسبوع ده، إطار خامس من إطارات عربية فيكي إتقطع بسكينة. بس موضوع الإطارات ده بقا لعب عيال مقارنة بالي بيحصل جوه البيت. كل يوم من بعد الغروب، بتبدأ الدقات والإنفجارات الي من قوة صوتها بتوقع أي حاجة متعلقة على الحوائط. 

الأسرة بقت بتسيب البيت من بعد المغرب وتروح في اي حته، مولات، عشاء في اي مكان. كمان كانوا بيروحوا سينما السيارات ويناموا في عربيتهم!

الي هم كانوا فيه ده برضو كان بداية للأحداث مش أكتر.. تسخين قبل المباراة.

يوم 31 مارس، كان آخر مرة يتقطع فيها إطار عربية فيكي، لأن ليلتها كل الي حصل ده هايبدأ يتحول لكارثة ميتافيزيقة صريحة.

ليلتها، كان شارون وبيتر بيتفرجوا على التليفزيون في اوضتهم والأصوات شغالة، لأان الأوضة دي كانت أهدا أوضة في البيت، وكان إريك وفيكي قاعدين على الأرض جنبهم. فجأة الكهربا إتقطعت ورجعت تلات مرات ورا بعض. بعدها بدأ الدولاب القصير الي كان محطوط عليه التليفزيون يرتفع في الهوا ببطء..الدولاب بمحتوياته كان وزنه فوق 250 باوند، ومع ذلك بدأ يتأرجح بخفه والي عليه بيقع على الأرض بعدها نزل على الأرض بقوة. بعدها واحد من أدراجه إتفتح بهدوء وفضل مفتوح لحظات بعدها إتقفل بقوة. وبدأت كل الأادراج بعده تتفتح وتتقفل في جنون.

فضلت الأسرة باصة للأدراج في ذعر، لحد ما كرسي محطوط عليه تل هدوم إرتفع في الهوا، وإتقلب ووقع الهدوم على الأرض والكرسي إترمى فوق الهدوم.

بدات كمان الصور على الحيطان تطلع من مساميرها  وتطير على هيئة حلقة حواليهم. صرخت شارون:

- يا رب إحنا عملنا إيه علشان كل ده!

مجرد ما خلصت كلامها، ألواح السرير (المُلل) وقع كلها على الأرض ووقع بيتر وشارون فوقهم وهم غايصين جوه السرير، ووقع حواليهم الصور..وساد الصمت.

بعد ما نضفوا الفوضى، حاولت الأسرة تنام تاني، لكن الكهربا إتقطعت تاني وسمعوا صوت قطة بتنونو في الأوضة التانية..ثواني والصوت إتحول لصوت رضيع بيعيط. بيتر كان عايز يروح يشوف في إيه، بس العقل يرفض تصرف زي ده. صوت الخربشات على الحيطة إشتغل ومعاه أصوات كأن البيت بيتكسر حتة حتة.

لمدة ساعة متواصلة صوت الطرقات والتكسير عم البيت كله من أول السقف لحد البدروم. بعدا سمعوا صوت ألواح السقف فوق سرير بيتر وشارون بتتضرب بمطارق، فقاموا جري من السرير..إستمر صوت المطارق على الخشب لفترة، وقال بيتر إن الضربات كانت يمكن عشرين ضربة متتالية مفزعة.

سمعوا صوت الأثاث بيتحطم في الصالة، ولسه هايخرج بيتر من أوضته، سمع صرخة مفزعة جاية من أوضة فيكي، وشاف فيكي جاية تجري ووتصرخ: في حد كان هنا!

في حد كان في الأوضة معايا!

و في يوم 1 أبريل، السما فوق البيت بدأت تمطر حجارة!

الحجارة جت منين؟ والبوليس كان إيه رد فعله أما شافها؟ وإيه الي حصل للأسرة أما قرروا يهربوا من البيت؟ ده الي هانعرفه في حلقة بكرة إن شاء الله.

تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي