الحلقة الحادية والعشرين- عالم الشياطين

عالِم الشياطين

سيرة إد ولورين وارِن غير العادية

الحلقة 21

قضية آل بيكفورد- الجزء الرابع والأخير

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

لورين والأب دانييل أدركوا في أثناء هروبهم من باب البيت إن إد ما بيتحركش من مكانه، وفجأة لقوه بيصرخ وقميصه غرقان دم. جريوا عليه وشالوه وخرجوه بره البيت، ولقو دراعه الشمال محفور عليه علامة صليب ضخمة بجروح غائرة طويلة.

إد رفض يروح للمستشفى، وكان عارف إن الإصابات الي بيحدثها كيان شيطاني بتشفى أسرع من غيرها ومابتسيبش أثر ( ده حصل مع صديق الممرضة في قضية دمية أنابيل). غسل إد الجرح من خرطوم الجنينة، ولفها في شاش وبلاستر من شنطة الإسعافات الأولية في عربيته. إد كان مُدرك إن الكيانات الي في البيت كانت تقصد به ضرر أكبر لأنه شاف قطعة زجاج بتطير ناحيته ومكانش عارف يجري، فرفع دراعه بحركة لا إرادية علشان يتفادها.. واضح إنهم شايفين إن إد هو السبب في جلب الأب دانيال وتحريك الموضوع تجاه الكنيسة.

بيكمل إد شرح لمرحلة الهجوم وبيقول:

- " الهجوم على منزل آل بيكفورد كان خطوة تجاه الإستيلاء على العيلة كلها. الإنسان قوي فعلا، ومش أي كيان دخيل يقدر يخترق قوة عزيمته دي، لذلك فالكيانات بتلجأ أولا للخداع، وبعدها بتبتدي في صبر وطولة بال تهد التركيب النفسي المتوازن للأشخاص المُختارين. كل ما كان الإنسان ضعيف ويائس كل ما مرحلة الهجوم بتكون أقصر وبتدخل أسرع على الإستحواذ. وكل ما الإنسان يكون أقوى أو واقع في وسط عائلة أو أصدقاء داعمين، الظواهر الخوارقية بتكون أقوى وأعنف وبتستمر فترة طويل لحد ما يستسلم تماما للإستحواذ بعد ما يتملك اليأس منه ويحس إن مافيش حد يقدر يساعده أو ينقذه، وإن ربنا تخلى عنه.

في أشخاص أقوياء فعلا..مخلوقين كده، زي آل بيكفورد. ممكن يعاندوا ويصمدوا كتير لحد ما يستسلموا هم، أو يموتوا من أثر الضغط النفسي و الجسدي."

إنسحاب إد و الأب دانييل المؤقت للحديقة مش لازم يطول..الإنسحاب قدام الكيانات الشيطانية يعني إقرار من الهارب إنه ضعيف، وساعتها الكيانات دي هاتلاحقهم طول عمرهم هم كمان. مافيش قدام الزوجين والقس دانييل إلا إنهم يكملوا الي بدؤوه.

بعد ظهيرة يوم الخميس، رجع آل بيكفورد لبيتهم، معنوياتهم صفر، وحالتهم الجسدية بتشي بمهاجمة الكيانات الشيطانية لهم ومحاولة حرقهم.

إقترح الأب دانييل إن الكل يحاول ينضف في البيت قدر المستطاع ولو أوضة يقعدوا كلهم فيها سوا، وفعلا بحلول الليل كانوا قاعدين كلهم في الصالة الخالية من الأثاث، بس كانوا حاسين إنهم أقوى، وإد بيعتبر الإحساس ده علامة من ربنا إنهم على الطريق الصح، وإنه هايساعدهم لو ساعدوا نفسهم.

الجمعة 26 أبريل، إتصل الأاب ماكين بإد، وقال له إن التصاريح قربت تخلص وقريب جدا هايجيلهم. 

يوم 27و28 كانت النيران بتشب في الهوا على شكل كور وتضرب المجموعة، الأحجار بتلاحقهم بره البيت..بواقي الأثاث الي فضلت في الأوض التانية بقت بتنتقل للصالة وتهاجمهم، حتى عربية الأسرة إتدمرت تماما.

خرج إد لعربيته ولقاها متكسرة، وكل محتوياتها مفكوكة وأسلاكها معقودة.. إد ولورين والقس دانييل مابقاش مسموحلهم هم كمان يغادروا البيت.

أخيرا يوم الأأحد إتصل الأب ماكين بالأاسرة وقال لهم إنه حصل على الموافقة، وإنه هايبدأ في صيام تلات أيام كتحضير واجب قبل طقس طرد الشياطين. وتم تحديد يوم 2 مايو لبدء الطقس.

مع وصول المعلومة للأسرة، بدأت الكيانات توصل لدرجة أكبر من العدوانية. أساس البيت بقا بيتحطم، أجهزة التدفئة المركزية إختفت، وسمعوها بتتكسر جوه الجراج. السلم المعدني الضخم الخاص بالورشة بقا بيظهر قدامهم ويضربهم فجأة بدون مقدمات، حتى إنه ضرب لورين وتعثرت فيه. أبواب الإوض بقت بتختفي وتظهر علشان تقفل عليهم طرق الهرب، أو تحاصرهم في أركان منفصلة. محدش كان بينام ولا بيقعد ولا بيتحرك في سلام..أبدا..

بحلول ليلة طقس طرد الشياطين، الأسرة والأب دانييل وإد ولورين كانوا منهارين وقاعدين ظهرهم في ضهر بعض، بدون أكل أو راحة. ساعات بيتانوبوا الحراسة بينما إتنين منهم يناموا والباقي بيخلي باله ويحميهم. بس طبعا ده مكانش كافي ولا مريح.

الساعة عشرة ونص، قامت لورين للحمام تحت نظر إد، وهي معدية شافت باب البيت بينور وإد شاف النور هو كمان ولفت نظر الباقيين. في وسط النور ده شافوا كيان بيتجسد، وببطء إتحول لشكل النصف العلوي ل سيدة مُسنة. بس ده معناه إيه؟ هل هو ده الكيان المسؤول عن الي بيحصل؟

صرخ إد: إتكلم..إنت من؟

الكيان بصلهم في هدوء وما إتكلمش..كان باين إنه شبح بشري بالنسبة لإد، لكن لورين كانت مركزة أوي، وأدركت إن المشهد كله خدعة وماحسيتش بتواجد شبحي بشري خالص. صرخت لورين في إد:

- إبعد يا إد.. ده مش شبح بشري!

في ساعتها، ظهر بقايا كرسيين في الهوا ورجليهم المدببه ناحية إد، وإندفعوا ودفعوه للحيطة، والرجلين الخشبية إنغرست حواليه وثبتته كأنها قفص. الكيان المتجسد كان بيتفرج على الي بيحصل بإبتسامة ساخرة بعدها إختفى. دفع إد الكراسي وحرر نفسه فخبطته في راسه إزازة طلاء أظافر.

كان فاضل 12 ساعة على ميعاد طقس طرد الشياطين، وكان الكل منهار تماما ومحدش كان قادر يعمل أي حاجة غير شرب القهوة علشان مايناموش.

عدى كم ساعة من غير ما يحصل حاجة، وأخيرا الشمس طلعت والعصافير بدأت تزقزق.

قامت الأاسرة ومعاهم الزوجين وارن والأب دانييل ومشيوا في هدوء للكنيسة وحضروا قداس الساعة 8، بعدها رجعوا وإنتظروا قدوم الأب ماكين.

الساعة تسعة ونصف، وصل الأب ماكين وكان رجل ضخم الجسم رياضي، في منتصف العمر. كان لابس قميص أبيض بنصف كم، مع ياقة سودا كنسية.

القس وإد إشتغلوا قبل كده كتير مع بعض، والإثنين كانوا بيثقوا في بعض. قعدوا سوا على إنفراد في المطبخ، وسأل الأب إن كان إد بيظن إن الي بيحصل سببه شياطين أعلى من مجرد كيانات شيطانية؟

إد كان عنده إحساس قوي إن في شيطان موجود بسبب قوة الأاحداث وقدرة الكيان حتى على الوصول لداخل محل إقامة الرهبان والعبث بمسبحة. شاور الاب لدراع إد وسأله:

- الجرح حصل لك هنا؟

- أيوة.

رجع إد والأب للصالة، وكانت لورين قاعدة مع الأسرة. خرج الأب ماكين من حقيبته السودا شال بنفسجي رفيع، وقبِّله وحطه حوالين رقبته. 

قبل بدء أي طقس، لازم طارد الشياطين يبارك كل الي في البيت للحماية، ومكانش الأب إتكلم مع اي حد من الموجودين إلا إد. أثناء مباركته للأسرة، وصل الأاب ماكين لفيكي وسألها:

- إنت فيكي؟

- أيوه.

- الأب دانيال حكالي الي عملتيه.

صوت الأب ماكين كان خالي من أي مشاعر، وده خلا فيكي تحس بالذنب وتعيط.

كمل الأب كلامه وسأل بلهجة قوية وواضحة:

- فيكي..إنت كنت قاصدة إن ده كله يحصل لعيلتك وكنت واعية لنتايج الي عملتيه؟

- لا طبعا!

جاوبت في غضب، وحست إنها لازم تتكلم بإحترام أكبر فكملت بصوت أهدا:

- لا..ماكونتش اقصد..الي حصل مكانش مقصود.

- الكنيسة بتعتبر الي عملتيه ده خطيئة. إنت عارفة ده؟ هل طلبتي من ربنا يغفرلك؟

- أيوة.

- كويس..لازم نكون على تفاهم ووضعنا ونياتنا واضحة.

بارك الاب فيكي، وبدأ بقوة يقرا طقس طرد الشياطين.

جزء من الطقس ده بالإنجليزي وجزء منه باللاتيني، وبيحتوي على صلوات، ومزامير، وأوامر للكيانات الموجودة بترك المكان. قراءة الطقس بالكامل بياخد ساعة تقريبا، وخلال الساعة دي مكانش في أي صوت في البيت غير صوت القس، وكأن مكانش في أي حاجة غريبة بتحصل هنا.

بيتضمن الطقس أوامر للكيان بكشف هويته، صاح الأب ماكين في صوت عميق وقوي والكل واقف في حلقة حواليه:

- آمرك، أيها الكيان الدًّنِس، أيها الأفعوان الأزلي، بحق الأحياء والأموات، بحق خالق الكون الذي بقوته تنسحق في في الجحيم.. إنطق بإسمك، أو إعطنا علامة على مغادرتك للمكان بلا رجعة.

إنتظر القس دقيقة كاملة، لكن مافيش حاجة حصلت، وإستنتج إن الكيان تجاهل كلماته. كرر الأب الأمر تاني بصوت أقوى وتهديد أعنف:

- آمر كل كيان دنس، وكل شيطان..آمر إبليس بالإنصراف بإسم الرب...

إستسلم لأمر الله..

أنت لا تعص البشر برفضك الإنصياع للأوامر، الآب يأمرك.. الإبن يأمرك.. الروح القدس يأمرك..

إسمع يا إبليس، يا عدو الإنسان، يا مصدر الشر وأصل الخبث..يا مُغوي البشر يا خالق الكرب..بحق الصليب آمرك فأطع..أخبرني إسمك او اعطنا علامة على رحيل بلا عودة.

فجأة صرخت شارون:

- هناك..عند الدفاية!

شافوا كيان بيتجسد ببطء، وكان واضح لهم كلهم إن الكيان ده المتجسد له قرون، وكان واقف على حوافر ووراه ذيل! إنخفضت درجة الحرارة في الأوضة للصفر تقريبا وملا الهوا ريحة لحم عَفِن.

إختفى الكيان بسرعة، وظهر بدالة وجه أحمر بحجم كرة السلة على السجادة القذرة. وبرضو الراس دي كان لها قرون على الجنبين. رمى الأب الماء المقدس على الرأس النابع من الأرض، والي كان بيبصلهم بكراهية شديدة. إختفى الرأس بعدها وهو بيغوي في غضب وساب مكانه اثر محمر محروق.

إعتبر القس إن أثر الإحتراق الي على السجادة علامة على المغادرة، لكنه تأكد عن طريق إستكمال الطقس للنهاية وإقامة صلاة شكر. بعدها أعلن:

- علامة المغادرة ظهرت. الأمان للحضور، ولآل بيكفورد ولذريتهم. إسمع رجائنا وصلواتنا يا إلهي..إكتب لهم الحياة السالمة لباقي أيام حياتهم. بسم الآب والإبن والروح القدس..آمين.

الي حصل في منزل شارون وبيتر بيكفورد من يوم 3 مارس ليوم 2 مايوم 1974 تم تصنيفه في سجلات الخوارق على إنه هجوم شيطاني، وتم إيقاف الهجوم يوم 2 مايو بواسطة طقس طرد الشياطين الكنسي.

القضية موثقة في الكنيسة وفي سجلات إد وارن، وأضاف لها كمان شهادة أخو بيتر ووالده ووالدته. القصة المذكورة في الكتاب هنا حقيقة لكن تم تغيير إسم العائلة بناء على طلبهم، خاصة وإنهم رفضوا يتصوروا وتذاع صورهم.

بعد طقس طرد الشياطين الي أقيم في البيت، رجعت حياة آل بيكفورد تدريجيا للشكل الطبيعي، وتكاليف إصلاح التلفيات تجاوزت 5000 دولار، وطبعا التأمينات مابتغطيش الحوادث الخوارقية. 

لحد لحظة كتابة السطور دي، العائلة لسه مقيمة في البيت. إيريك دخل الجامعة وعايش بعيد، فيكي إتجوزت وخلفت تلات أطفال آخرهم اتولد 1978.

الي حصل مع عائلة بيكفورد مكانش شائع أبدا، لكن برضو التعامل مع الكيانات الخوارقية مابيعديش بدون عواقب غالبا ما بتكون وخيمة.

كل سنة بيتعامل الزوجين وران مع عشرات من حالات الهجوم والإستحواذ الشيطاني، وكلهم طبعا بيحتاجوا تدخل كنسي في النهاية بدرجات متفاوته. بيعلق إد على القضية وبيقول:

- "الي خلا قضية آل بيكفورد غريبة للدرجادي هو التدخل الشيطاني الي تلا هجوم الكيانات الشيطانية في البداية. خلينا نفتكر إن المخلوقات الشيطانية نوعين لهم نفس الهدف لكن قواهم مختلفة. الشياطين ودول عددهم محدود ومعروفين بالإسم ولهم قوى خارقة. والكيانات شيطانية، ودول أقل منزلة وأقل في القدرات وهم الي بينفذوا مراحل الإبتلاء والهجوم، وبيسلموا الضحايا في النهاية للشيطان القائد الي بيكمل هو مرحلة الإستحواذ.

كان واضح من قوة الظواهر وتحديها للمقدسات إن الكيان الموجود أعقل وأقوى من مجرد كيانات شيطانية. وأخشى إن الأثر الي إتساب في نفوس آل بيكفورد حتى بعد رحيل الشيطان هايفضل موجود للأبد، وهايفضلوا عُرضة لتزعزع الإيمان واليأس والإكتئاب، بل وللفضول لمعرفة معلومات أكتر عن مملكة الظلام الي عملت فيهم كل ده. إلى حد ما إحنا وصلنا في القضية لمرحلة عادلة..الكيان رحل والخطر المادي زال عن العائلة وده وضع مُرضي لهم، لكن أثره في نفوسهم لسه موجود، وده بعتبره أثر مُرضي للشيطان، وبنعتبره إحنا (علامة) بتخلي الضحايا معروفين عند الكيانات الشيطانية ومُستهدفين لو هم حاولوا يفتحوا الباب بينهم وبين مملكة الظلام مرة تانية. المباراة ما بتخلصش طول ما إحنا عايشين."

ليه الشيطان المذكور أظهر نفسه أثناء طقس طرد الشياطين؟ وليه إختار الشكل المألوف أبو قرون وحوافر وذيل؟ بصراحة التفصيلة دي مش قادر أصدقها..

رد إد وقال:

- " أكيد عندك حق، والشكل ده مش شكله الحقيقي، وشكله الحقيقي محدش يعرفه لأن الشياطين مكانش لها جسد مادي لا في الماضي ولا دلوقتي، وكينونتها غير مُدركة بحواس البشر.  هو ظهر بالشكل الي إحنا متخيلينه بيه..الشكل الي بيرعبنا في طفولتنا. كمان إختيار شكل حتى لو شكل مُبهم بيحفظ للشيطان خصوصية هويته، وده شيء مهم بالنسبة لهم لسبب ما أعرفهوش. 

سبب أهم لإختياره للشكل ده، هو إن طقس طرد الشياطين نفسه يبان كوميدي ومحدش يصدقه. القضية دي بالذات كتير بيصدقوها وييجوا للتفصيلة دي ويبدؤوا يشكوا في الأمر كله. وأعتقد إن ده كان قصد الشيطان من الظهور ده."

إيه تأثير أحداث زي كده على الضحايا؟ ردت لورين:

- " الضحايا بيمروا بصدمة عنيفة بعدها، وبننصحهم بمتابعة أحد الأطباء النفسيين الي بيشتغلوا تبع الكنيسة لمدة 6 شهور على الأاقل. ده بيرجعلهم نوعا ما إستقرارهم النفسي والإيماني. بس الثابت إن محدش بيطلع من تجربة زي دي بدون تغيير جذري في طريقة تفكيره وإدراكه لكل شيء. وزي ما إد قال، ممكن يكون تغيير سلبي وبيعتبر إنتصار لخطة الشيطان ولو بنسبة 50%. وكمان في ضحايا بتنكر إلي حصل أصلا وبينسوه تماما. الأطفال بيكون حالتهم أصعب بكتير، وللأسف لو تمتش التعامل معاهم من خلال طبيب نفسي، بيلجأوا للإدمان والعدوانية والتشكيك في الأديان."

إتكلمنا عن الإبتلاء، والهجوم..وفاضل المرحلة الأكثر إفزاعا وهي الإستحواذ الشيطاني. يعني إيه إستحواذ وإزاي بيتم..وهل بيفضل الإنسان إنسان بعد الإستحواذ؟ وياترى..إيه هي محتويات متحف آل وران للخوارقيات وإيه الي في التسجيلات المعروضة هناك؟

كل ده وأكتر هانعرفه في حلقة بكره إن شاء الله.

تابعونا البوست الجاي و ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي