الحلقة ‏الحادية ‏عشر- ‏حصاد ‏الشيطان

حصاد الشيطان

( عن قضية الإستحواذ الشيطاني على المزارع موريس ثريو- قصة حقيقية)

الحلقة 11

مع بداية السنة الجديدة، قرر موريس ياخد نانسي ويسافروا يغيروا جو في فلوريدا. مكانتش أجازة طويلة، هم كم يوم، بس موريس كان عايز يعوض نانسي عن الشد العصبي الي عاشته، وكان مخطط ياخدها في رحلة بحرية ويأجر قارب. خاصة إن طقس فلوريدا حار والجو هايبقا حلو ومشمس.

فعلا اجروا قارب، نزلوا المحيط به تحت الشمس، مجرد ما غاب الشاطيء عنهم، سحاب أسود بدأ يظهر فوقهم، والرياح كانت هاتقلب القارب بيهم. 

بدأت أمطار باردة جدا تنزل عليهم، وعطل محرك القارب وسط المحيط..

حاول موريس بأي طريقة يشغل القارب، ساعات عدت وهم الإثنين وسط المحيط، محدش بيعدي جنبهم، محدش سامعهم باللاسلكي، مجرد تشويش مش أكتر.

فجأة الموتور إشتغل، ورجع موريس للشاطيء علشان يتفاجيء إن الجو مشمس وحر وهم الوحيدين الي كانوا محط أنظار الناس وهم غرقانين ميه هم والقارب وشفايفهم زرقا من البرد.

أما رجع الزوجين لقريتهم، قرروا يحاولوا يقربوا من ربنا أكتر ويواظبوا على حضور القداسات والصلاة. 

في أول يوم أحد ليهم في إنتظامهم في العبادات، راحوا كنيسة سانت بول لكهم وصولوا متأخر شوية بعد بدأ القداس، وكان موريس مُحرج من الأب بوير علشان ما كلمهوش من يوم جوازهم، فماكنش عايز كمان يوصل متأخر.

بدا يطلع سلالم الكنيسة سلميتن سلمتين وهو بيقول لنانسي الي طالعة وراه:

- بسرعة شوية ياللا..

- طالعة أهو..

فجأة شيء غير مرئي زق موريس بقوة ووقع على ظهره وأخد نانسي في سكته ووقعوا هم الإثنين من فوق السلالم. ومكانش في حد تاني خالص في المكان.

موريس إتعور وبنطلونه إتقطع، وبص لنانسي بعينين مدمعة وكأنه بيقولها: إشمعنى أنا يحصل لي كده؟

- إنت كويس يا حبيبي؟

- عايش..بس أنا تعبت يا نانسي..تعبت.

قام موريس وطلع مع نانسي بحرص وقعدوا في آخر الكنيسة جنب الباب. نانسي فضلت تعيط وتصلي ساعة كاملة، وعمر موريس ماشافها بتعيط وهي بتصلي. قالها وهو بيحاول يطلعها من الحزن ويضحكها:

- ايه..ركعتي وغطستي تحت، مش هاتطلعي تاخدي نفس؟

- مش الأحسن تنزل تصلي معايا؟ بتكلم جد..

بعد إنتهاء القداس، نانسي أخدت موريس على جنب وكلمته بخطورة:

- إسمع يا موريس، الي فيك ده فعلا حاجة شيطانية، مش مسألة شبح أمي لا..لازم نتكلم مع الأب بوير تاني والمرة دي هاحكيلة على كل حاجة بالتفصيل ومش هخاف..يقول عليا الي يقوله بقا..

الأب بوير كان واقف قدام الكنيسة بيكلم الناس وهم خارجين وبيباركهم، أما خلص نانسي راحت له، قال لها:

- أهلا نانسي..ماشوفناكيش من فترة..مبسوط إنكم جيتوا النهاردة وياريت كده تنورونا كل أحد. مستخبي ليه يا موريس؟ تعالى سلم عليا.

- ابونا، لازم أتكلم معاك حالا في حاجة مهمة جدا.

- شبح والدتك تاني؟

- لا..ما أعتقدش إنه كان شبح اصلا..في حاجات مرعبة بتحصل.

___________________

في مكتب الأاب بوير، عملهم قهوة بنفسه وقعدوا على الكنبة قدامه، حاول الأاب إنه يمتص قلقهم وقالهم:

- مفيش حاجة مالهاش حل..إحكولي بهدوء كده إيه الي حصل.

خلال تلات ساعات، حكت نانسي بالتفصيل كل الي حصل، وموريس ما إتكلمش خالص، كان باصص لإيديه وبيهز راسه كموافقة على كلام زوجته. نانسي كانت بتعيط وهو بتقول:

- هاتساعدنا يا أبونا؟ مش عارفة إيه الي بيحصل ده..بس خايفة يكون موريس ممسوس ولا حاجة.

- غريب فعلا يا بنتي..أنا معنديش خبرة بالمواضيع دي..بس مش يمكن بيتكم هو الي مسكون؟ أنا هاجيلكم بركة وأبارك البيت بالماء المقدس. دلوقتي روحوا إرتاحوا وإتعشموا خير.

______________

ركب الأب بوير عربيته البويك السودا بعد ما خلص صلاته في الكنيسة، وراح لمزرعة موريس ثريو. كان خايف لأنه عمره ما بارك حد أو مكان بيحصل فيه ظواهر بالقوة دي قبل كده. كان يعرف قس في قرية مجاورة مات وهو بيبارك بيت شخص ممسوس.

كان مع الأب بوير زجاجة كبيرة من الماء المقدس، وفعلا رش منها في كل أركان البيت وهو بيصلي. بعد ما خلص قال للزوجين:

-أعتقد إن كده هاتبقوا في أمان. لو في اي مشكلة تانية كلموني اي وقت..

- الف شكر لك..أنا متأكدة إن كل حاجة هاتبقا تمام.

الأب بوير كان بيتمنى يبقا واثق اوي كده زي نانسي، بس فعلا هو ماعندوش أي فكرة عن خطورة الحالة أو بيتعامل مع إيه. من خلال حكاية نانسي، حس إن موريس محتاج أكتر من رش مياه مقدسة.

بليل راح مكتبة بتبيع كتب عن الماورائيات، فكر إنه ممكن يلاقي اي معلومات في كتاب تفيده في حالة موريس. لف وسط الكتب ولفت نظره كتاب بعنوان: عالِم الشياطين.

( ملحوظة من المترجمة: ممكن تقروا ترجمتي لكتاب عالم الشياطين من اللينك ده:

https://m.facebook.com/story.php?story_fbid=3701825806557348&id=176490199090944

إفتكر الأب لقاء تليفزيوني شافه من فترة وكان فيه زوجين من علماء الشياطين، والكتاب ده عنهم. إشترى الكتاب وقال إنه مش هايخسر حاجة لو أخد فكرة. بس مجرد ما وصل البيت حط الكتاب في المكتبة ونسيه خالص وسط إنشغاله، وما إفتكرهوش إلا بعد إسبوعين أما تلقى مكالمة مذعورة من نانسي ثريو.

- أبونا إلحقنا! الحاجات الي بتحصل دي بتحصل تاني..موريس في مكانين في نفس الوقت!

- إزاي مكانين؟

- زي ما حصل قبل كده وحكيتلك..المرة دي كنت أنا وأخويا ومراته وبنته واقفين حوالين ترابيزة المطبخ وشوفنا موريس جاي من الطرقة. سأله أخويا رايح فين، موريس ماجاوبش. مشي وخرج من باب البيت كأنه روبوت. موريس عمره ما بيمشي المشية دي، خاصة إنه..إنه كان شبه عريان. طلبت من بنتأ خويا تروح تشوفه في الأوضة، رجليا مكانتش شايلاني..المرة الي فاتت اقنعت نفسي إني بحلم ولا بيتهيأ لي، بس المرة دي إيه التفسير؟ ثواني والبنت صرخت، فعلا موريس كان في الأوضة قاعد على طرف السرير وعينيه بتنزف دم.

سمع الأب بوير ودماغه كانت مشغولة بإيجاد تفسير، وإفتكر الكتاب فقال لها:

- ممكن تستني ثواني؟ راجع على طول.

جاب الكتاب وقلب فيه، ولقا في آخره طريقه للتواصل مع الزوجين وارن الي شافهم في التليفويون قبل كده.

- نانسي، أعتقد إني أعرف حد ممكن يساعدنا..هاتصل بيهم حالا..إهدي إنتي بس وهاكلمك تاني.

- بس بسرعة يا أبونا..أنامش قادرة أستحمل..أنا مرعوبة!

_______________________

إد ولورين وارن كانوا لسه راجعين بيتهم في مونرو بعد إنتهاء محاضرتهم في معهد نيو إنجلاند لعلوم الشياطين.

إد وارن هو واحد من سبع علماء شياطين في أمريكا الشمالية، وهو الوحيد منهم الي مش رجل دين.

أما لورين وارن، فهي مستبصرة روحانية وقادرة على ممارسة الإدراك الفائق للحواس، وتم إختبارها في أكتر من جامعة وأثبتت موهبتها في الإستبصار والتخاطر.

(المزيد عن إد ولورين هاتلاقوه في لينك كتاب عالم الشياطين فوق)

تقصى الزوجين أكتر من 2000 قضية حول العالم من سنة 1940 لحد أوائل التسعينات.

 من أشهر الجمل الي بيقولها إد وارن في إي لقاء أما بيسألوه عن المس أو الإستحواذ الشيطاني:

- الناس ما بتتمسش كده من تلقاء نفسها، في بيننا وبين عالم الشياطين باب، أي محاولة مننا للتواصل مع الكيانات الخوارقية بتفتح الباب ده. حتى لو التواصل ده كان عن غير قصد.

مهمة إد ولورين هو تقصي الحالات الغرائبية وجمع أدلة وصور وتسجيلات بتؤكد أو تنفي وجود أحداث خارقة للطبيعة. في حالة إثبات إستحواذ شيطاني أو تواجد من كيانات شيطانية، بيرسل الزوجين تقاريرهم للكنيسة الكاثوليكية لإرسال كاهن مختص لطرد الشياطين.

تقصيهم للحالات الغريبة دي بيثري مجال علم الشياطين، لكنه بيحطهم في خطر طول الوقت. 

في كتابهم (عالِم الشياطين) بيحكوا فيه عن العلم نفسه وأنواع الكيانات الخوارقية، والفرق بين الأشباح والكيانات الشياطانية والشياطين، وبيتكلموا عن مراحل الإستحواذ الشيطاني الأربعة بإستفاضة مع أمثلة من قضايا حقيقية وشهيرة في عالم الخوارق أغلبها إتحول لأفلام شهيرة.

أول ما دخلوا بيتهم، شغل إد جهاز الرد التلقائي (آنسرماشين) ووقف يشرب كوباية عصير وهو بيسمع الرسالة التالية:

- مرحبا، أنا الأب بوير من كنيسة سانت بول في قرية وارين، ماساتشوستس. في عندي زوجين بيحصل لهم أمور أشك إنها خارقة للطبيعة، وكنت إشتريت كتابكم وأعتقد إنكم تقدروا تساعدونا. بس رجاء ردوا عليا بسرعة لأان الوضع هنا خطير..

بص إد ولورين لبعض للحظات بعد الرسالة، قالت لورين:

- الأب صوته بيترعش ولا متهيألي؟

- الرجل مرعوب..تعالى نتصل به طيب بسرعة.

الساعة كانت عدت عشرة بليل، لكن في إعتقاد الزوجين وارن إن شخص خايف كده صعب يكون نام.

وقتها الأاب بوير كان لسه قاعد ورا مكتبه بيقرا في كتاب عالِم الشياطين، وكانت لسه نانسي قافلة معاه وقالتله إن موريس قاعد شارد على كرسيه وعمال يكرر عبارات بلغة ماتعرفهاش، ومش الفرنسية طبعا لأانها كانت مألوفة بالنسبة لها. بس اضافت إنها شبه اللغة الي بيتكلم بيها الكهنة أثناء القداس زمان قبل ما الفاتيكان يغيرها.

- قصدك لاتيني؟

- أيوة لاتيني..هو عمره ما إتكلم لاتيني ولا درسه ولا كان بيروح الكنيسة زمان أصلا..ليه بقا بيتكلم بلغة زي دي؟

- مش عارف فعلا..عموما أنا إتصلت بناس ممكن يساعدونا، ومستني ردهم.

صلى الأب بوير ونام على مكتبه وهو مستني مكالمة الزوجين وارن، وأما التليفون رن كان هايقع من على كرسيه من الفزع.

- الأب بوير..من معايا؟

- أهلا يا أبونا..أنا إد وارن. آسف إني بتصل بك متأخر كده، كنا برة ولسه راجعين بس صوتك قلقني. خير؟

حكى الكاهن كل شيء لإد، ,اضاف أخيرا حادث كلام موريس اللاتيني. يمكن الأب بوير نسي بعض التفاصيل غصب عنه، بس الي حكاه لإد كان كافي علشان يديه صورة واضحة للي بيحصل.

- أنا قلقان يا سيد وارن إن يكون البيت مسكون، وأنا ماليش أي خبرة في الأأمور دي علشان كده إتصلت بك.

- طيب يا أبونا إديني رقم السيد موريس ثريو وهاكلمهم حالا، بتقول زوجته صاحيه. ونحاول نحدد ميعاد بكرة نجيلكم.

كلم إد نانسي، وحكيتله نفس الي حكاه الكاهن، وأضافت بعض التفاصيل الي نسيها زي تواجد موريس في مكانين في نفس الوقت، والرسائل المحفورة على ظهر موريس.

- اقدر أجيلكم بكرة يا سيدة ثريو؟ مناسب لكم؟

- طبعا..يعني ياريت لو تقدروا تيجوا دلوقتي..مش قادرة أستحمل فعلا.

- ماتقلقيش، هانعمل كل الي نقدر عليه، المهم ماتنسيش تصلي قبل تنامي. تصبحي على خير.

نانسي إرتاحت كتير بعد المكالمة دي، على الأاقل في حد فاهم هايساعدهم.

أما لورين فطلبت من إد إنهم يتحركوا لمرزعة موريس بدري قدر الإمكان علشان يقدروا يوصلوا في ضوء الشمس ويعملوا بعض التحريات قبل الليل.

- لورين، إيه رايك ناخد ليندا فيدل معانا؟ أعتقد إن الوقت مناسب إننا نضم حد من الشرطة لفريقنا، ليندا كمان نفسها تروح معانا أي تحقيق.

- ممتاز، ما أعتقدش إنها شغالة بكرة، هاكلمها..

ليندا فيدل شغالة في التحريات في الشرطة في نورواك، كونيكتيكت. خلال شغلها قابلت كتير من القضايا المتعلقة بالسحر او عبادة الشيطان، وإتقابلت بالصدفة مع الزوجين وارن خلال تحقيقاتهم ونمت بينهم صداقة قوية مع الوقت.

ليندا واقفت فورا واديتهم ميعاد الساعة عشرة صابحا، وقالت لهم إنها هاتجيب سلاحها معاها إحتياطي. قبل النوم لورين قال لإد إنها هاتقرا شوية. قعد جنبها على السرير وقال لها:

- أعتقد كمان إني هاقرا زيك..

- إيه رايك في القضية دي؟

- الصراحة أحداثها غريبة فعلا، وحاسس إنها هاتكون قضية مهمة في مسيرتنا لو ثبت وطلع كلامهم صح.

_________________________

تابعوا الحلقة ال12 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل. 

شكرا لثقتكم في المحتوى الي بقدمه ومنورين دايما

#حصاد_الشيطان

#شيرين_هنائي