الحلقة الحادية عشر- في مكان مظلم
في مكان مظلم
( قصة الإستحواذ الشيطاني على الطفل ستيفن سنيديكر وعائلته- قصة حقيقية من ملفات عالمي الشياطين إد ولورين وارن)
الحلقة 11
12
أشباح هدية الكريسماس
بحلول الكريسماس، ستيفن حصل على جاكيت جلد أسود مرسوم جمجمة وعضمتين متقاطعتين على ضهره، وده كان لوجو لفريق موسيقى هيفي ميتال وقتها، وكان وسط الجمجمة صليب مقلوب دامي.
ستيفن رجل من المدرسة في يوم وهو لابس الجاكيت ده، وكان آخر يوم دراسة قبل أجازة الكريسماس. شافته كارمن وهو داخل البيت وبينفض التلج عن الجاكيت.
- ستيفن، تعالى ثواني..
كارمن مكانش عايزة تتناقش معاه أصلا لأنها عارفة نهاية أي مناقشة بينهم، بس كان لازم تتكلم.. صحيح هي وآل إتكلموا معاه كتير سواء مع بعض أو منفردين، وسواء بالشدة أو باللين، عن الألفاظ الخارجة الي بقا بيستخدمها طول الوقت، وعن قلة نضافته الشخصية حتى إنه مكانش بيستحمى لأسابيع، بس كل كلامهم كان بيروح في الهوا.
قعد ستيفن قدام كارمن وهو بيتنهد في ضيق. رغم كمون السرطان حاليا إلا إنه كان لسه بيفقد الوزن، وكان بيشحب أكتر من ايام العلاج الإشعاعي كمان.
- جبت الجاكيت ده منين؟
- حد إداهولي..
- بس الجواكيت الجلد غالية، معقول حد يديك جاكيت جديد مجانا؟
- لا ده قديم والحد ده مكانش عايزه فإداهولي.
- هو جاكيت حلو وكل حاجة، بس إنت الي طابع عليه الرسم ده؟ ليه عملت كده؟
- مزاجي..
- ستيفن..إنت عارف إن ما يصحش تلبس حاجة مرسوم عليها الرسم ده..
- إللي هو إيه الرسم (ده) ؟
- الصليب المقلوب الي على ضهرك!
- فين المشكلة؟
- ماتستهبلش يا ستيفن..إنت عارف قصدي..ده حرام.. مش كنت من كام شهر بتقول إن في حاجة شريرة في البيت؟ أهو الرسم ده بقا شرير، غلط.. إحنا سيبناك تسمع الموسيقى الي إنت عايزها وقولنا فترة مراهقة وتعدي، بس إلا الكُفر!
- طيب إيه الفرق؟ ما الرسم ده جزء من الموسيقى..بيعبر عنها وعن هدفها و...
- عارفة..وأنا وابوك مش موافقين على سماعك للموسيقى، بس الصليب الي إنت مستهتر به ده رمز ديني مهم جدا، المسيح مات على الصليب علشان...
- أيوه أيوه..عارف الحكاية دي..خلاص.
- مادام عارف، إزاي تلبس حاجة عليها رمز زي ده؟
- إنت خايفة من الشر، مرعوبة منه، وهو حواليكي في كل حتة وإنت مش شايفاه..وأنا بقولك أهو، البيت ده هو الشر نفسه!
- تاني؟! ستيفن أنا مش فاهماك، مش عارفة إنت عايز إيه بالضبط!
ضحك ستيفن ضحكة عالية قوية وقالها:
- يعني إنت فاهمة أي حاجة أصلا؟
وقام وساب الأوضة، وفضلت كارمن قاعدة مذهولة، باصة على مكان ما كان قاعد. دقايق وولعت سيجارة. كان ضروري تقول لآل، ولو إنها مش متشوقة لرد فعله.
إستنت كارمن لبعد العشا، بعد ما نام الأولاد وخرج مايكل يلعب شوية مع صحابه. غضب آل بشدة، وزنل البدروم، وسمعت كارمن صوت الزعيق، وحاجات بتتخبط . شوية وطلع آل وسمعته على السلم بيقول:
- عايز تخليك في الهبل الشيطاني الي عاجبك ده إنت حر، انا زهقت! بس إخرس خالص وماتتكلمش مع أي حد هنا..إنت ولد بايظ ماتسواش نكلة، بس مش غلطتنا..مش غلطتنا أبدا إحنا فاض بينا..
الي رعب كارمن، إن صوت ضحكات ستيفن كانت واصلاها، ضحكات واثقة قوية. قال آل أما طلع:
- أنا مش فاهم إيه الي جرا له؟ عايز يخلي الجاكيت الزفت ده..
- آل..
- خليه، يشبع بيه..خليه ماشي زي البلطجية وقتالين القتلة في الشوارع كده.
- طيب مش نعرف إيه السبب في الي هو فيه؟
- عيل متدلع بايظ..
- يعني لزقتها فيا؟ بقت تربيتي وغلطتي؟!
- إنت الي بتقول أنا ماقولتش حاجة!
تراجعت كارمن وإتسندت على التلاجة، كان لازم تسكت علشان النقاش ما يكبرش. قالت بصوت واطي:
- أعتقد لازم أوديله للأب ويتلي.
- تفتكري هاينفع معاه؟
- لو مانفعش مش هايضر.
فكر آل شوية، ولاحظ إن كل ده بدأ يحصل من ساعة ما جم البيت ده. صرح لكارمن بالخاطر، فإستغربت من الإستنتاج..ده بالضبط الي جه في بالها.
_______________________
إتصلت كارمن تاني يوم بالأب ويتلي وحكتله المشكلة وحددت معاه ميعاد، وودته فيه ستيفن وسابته وراحت للتسوق، وهي راجعة عدت على الكنيسة علشان تاخده. أول ماوصلت البيت إتصلت بالأب ويتلي علشان تعرف نتيجة الجلسة، خاصة إن ستيفن ماحكالهش إيه الي حصل.
- إسمحيلي يا كارمن ما أتكلمش في الموضوع ده بتفاصيله، دي أمور كأب كنسي ما أقدرش أطلع أسرارها بره. بس عايز أقولك إنت كنت صح أما جبتيهولي، وياريت أشوفه تاني بكره.
شكرت كارمن الأب وعيطت، فقال لها:
- اسمعي يابنتي، انا معاكم فماتقلقيش من حاجة، وستيفنمحتاج بس يتكلم وحد يسمعه واعتقد إني أقدر اساعده، وانتي كمان لو حبيتي تيجي تتكلمي معايا وقت تاني فأنا مرحب بك.
لكن كارمن ماقدرتش تودي ستيفن الكنيسة تاني يوم، لأنها بليل تلقت مكالمة هاتفية من أخوها، وطلب منها تجي بسرعة لأن والدهم مات..إتقتل..
بسرعة حجزت كارمن تذكرة للسفر، وإضطر آل لأخذ أجازة من شغله علشان يقعد مع الأولاد.
بعد ما وصلوا كارمن المطار، إشترى آل وبيتر وستيفاني بيتزا وهم راجعين لأن آل مابيعرفش يطبخ، وشكل الفترة الجاية هاتعتمد على أكل جاهز.
بعد ما الأسرة كلها إتعشت، رجع ستيفن أوضته في صمت مع تزايد التوتر بينه وبين آلوإنعدام الحديث بينهم إلا للضرورة.
قعد آل ومايكل يشوفوا ماتش كورة في التليفزيون، أما بيتر وستيفاني كانوا بيلونوا على ترابيزة السفرة. مكانش في مدارس بكرة فآل ما دققش على موضوع سهرهم.
بعد منتصف الليل كل الأولاد ناموا، وفضل آل لوحده. كان عايز ينام بس كان خايف يبات لوحده. قعد يتفرج على مسلسل في التليفزيون وينام وهو قاعد، لكن رقبته وجعته وقرر يقفل النور ويدخل أوضته.
مجرد ما دخل السرير وغمض عينيه بدأ يسمع صوت الموسيقى القديمة من جرامفون خفي، وصوت ضحكات عشرات الأأشخاص كأنهم في حفلة،وزاد على كل ده صوت نباح الكلب إياه بره البيت.
قرر مايقومش، بس الأأصوات زادت وإنضم لها إهتزاز السرير الي بقي بيهز أعضاؤه نفسها جوه جسمه.
قام من السرير ونور النور، حط إيده لى الحوائط والأرض بس مافيش حاجة كانت بتتهز. خرج للصالة وفضل سامع صوت النباح والموسيقى، أما قرب من باب البدروم الموسيقى توقفت فجأة وساد الصمت.
لف آل علشان يرجع أوضته لكنه إتجمد مكانه، كان في شخص واقف قدام الشباك في الضلمة ومش باين ملامحه لأن النور كان جاي من بره الشباك.
دور آل على مفتاح النور في ذعر، ومجرد ما نور النور صاح:
- ستيفن؟!
- في كلب عمال ينبح بره...
- إنت كنت مشغل موسيقى من شوية؟
- لا..كنت نايم وصحيت على صوت الكلب.
- يعني مافيش حد غيرك أنت ومايكل تحت؟ مابتدخلش صحابك في البيت من غير مانعرف وتبيتهم عندك؟
- ليه أعمل كده؟ هي ناقصة زحمة!
نزل ستيفن أوضته، وفضل آل يفكر في معنى عبارة ستيفن..(هي ناقصة زحمة)..عبارة عادية ممكن يقصد بيها إخواته أو إن آل نفسه الي زاحمهم، بس لسبب ما العبارة رعبت آل.
______________________
كارمن رجعت بعد 3 ايام.
أبوها لقوه مقتول قدام بيته، وكان واضح إنه إتقتل في مكان تاني وإترمى عند البيت.
كارمن كانت لازم ترجع بيتها أقرب وقت، ,اما رجعت بعد إبتعاد كم يوم حست فعلا إن البيت غريب ومظلم.
حاول آل يغير الأاجواء، فإشترى شجرة كريسماس كبيرة وقعدت العيلة كلها –ماعدا ستيفن- يزينوها.
آل كان بيودي ستيفن كل يوم للأب ويتلي في غياب كارمن، وكارمن كانت بتحاول ما تسألش عن الي بيحصل في الجلسات دي زي ما طلب منها الأب على أمل إن يظهر تحسن على الولد. لكن ستيفن فضل زي ما هو، مظلم وكئيب ووقح.
شغلت كارمن ترانيم كنسية في الكاسيت طول الوقت، وحاولت تعمل كل طقوس الكريسماس المرحة زي كل سنة، بس الكريسماس جه وعدى وفي شيء كبير ناقصهم..ناقصهم مرح ستيفن ومشاركته.
كان ناقصهم الإحساس بالأمان في بيتهم..
________________________
13
بداية عام جديد
أشجار الكريسماس نشفت، وإترمت قدام البيوت، وزينة الكريسماس إتشالت من فاترينات المحلات ونزل بدالها زينة عيد الحب الحمرا.
الجو كان لسه بارد، لكم حبات التلج بدأت في الذوبان، الأرض بقت برك من الطين البارد..
في الكنيسة، كان لسه ستيفن بيروح جلساته، ويقعد على نفس الكرسي ويتكلم في نفس المواضيع..
- بقالنا فترة بنتقابل يا ستيفن، ومع ذلك أنا معرفتش حاجة عنك، ليه؟
- مش عارف..يمكن علشان ماقولتلكش حاجة عني؟
- أكيد..وليه ما إتكلمتش عن نفسك؟
- مابحبش أتلكم عن نفسي.
- مفهوم..طيب هاتكون مرتاح أكتر لو سألتك وإنت جاوبت؟
- ما إنت طول الوقت بتسألني.
- أه..عندك حق..أنا كده خسرت! بصراحة والدتك طلبت مني أتكلم معاك من كم شهر بسبب تغير طباعك، وافقت..في الول كنا بنقعد سوا خمس أيام في الأأسبوع، بعدها بقوا يومين..بعدها يوم..كنت مستني منك طول الوقت تقولي إيه الي مضايقك..هل إحنا كنا غلطانين في ظننا إني ممكن اساعدك؟
- مش فاهم.
- طيب خليني أسألك، هل في حاجة زعلتك مؤخرا؟
- مؤخرا من إمتى؟
- زي ماتحب..أي وقت..
- أيه..السرطان زعلني..
- مفهوم..بس ربنا إستجاب لدعائنا والسرطان كَمَن..أنا بتكلم عن حاجة زعلتك لدرجة الغضب، أو لدرجة الرعب حتى..في حاجة حصلت زي كده؟
تردد ستيفن لحظات، وفضل ينقل عينيه من الأرض لعينين الأب ويتلي، في النهاية قال:
- لا مافيش..أنا كويس.
- يعني إنت مش شايف إن تصرفاتك بقت مختلفة؟
- مش فاهم مختلفة عن إيه؟
- مختلفة عن المعتاد منك.
- لا أنا زي ما أنا.
- طيب بالنسبة للبسك؟
- ماله لبسي؟
- يعني، مش نفس اللبس الي كنت بتحب تلبسه زمان..بالتحديد قصدي الجاكيت الجلد والتيشرتات الي بتلبسها في البيت.
- تيشيرتات في البيت؟ ماما حكيتلك؟
- أكيد.. قالت إنك بتلبس تيشيرتات عليها شعارات فرق موسيقيه بتحتوي بعض العبارات الرسومات الكفرية.
- ما كل الأولاد بيلبسوها.
- بس والدتك قالت إن عمرك ما كنت بتحب تلبس اللبس ده، ولا تسمع الموسيقى دي.
- معرفش..
- والدتك بتظن إن التغيير المفاجيء في شخصيتك له علاقة بشيء ..هي في شيء حصل غيرك كده..
- صاحبي جايسون شغل الموسيقى دي مرة قدامي وعجبتني، هو الي إدالي الهدوم دي كانت صغرت عليه وأنا زي ما إنت شايف خسيت..إيه بقا الجريمة الي عملتها؟!
- طيب خلينا نتفق إن الرسوم على الجاكيت حرام دينيا، الصليب ال...
- بس أنا كويس! يعني أنا باجي هنا كل ده علشان الحاجات التافهة دي؟ آسف إني ضيعت وقتك..
- تحب أبلغ الي قولته ده لوالدتك؟
- إنت الكاهن هنا، قولها الي إنت شايفة يتقال..
- بما إنك شايف الجلسات دي تضييع وقت، لو حبيت إنك ماتجيش تاني ممكن توعدني بحاجة يا ستيفن؟ لو في أي حاجة حابب تكلم فيها ومش عايز أو مكسوف تتكلم فيها مع أهلك أو صحابك، هاكون سعيد لو جيتلي وهاسمعك وهحافظ على سرك.
- أكيد..شكرا لك.
____________________________
بليل الأب بلغ كارمن ملخص للجلسة وقال لأها إن الولد في فترة مراهقة، وطبيعة الفترة دي هي التمرد وعمل كل شيء غير متوافق مع ذوق الأهل. ونصح بالصبر والهدوء في التعامل وعدم نبذه.
- بس يا أبونا الولد إتغير..ده مابقاش عايز يعمل أي حاجة معانا خالص..بيفضل طول الوقت في أوضته مابيخرجش إلا للحمام والأكل..ساعات بلاقيه قاعد بيكلم نفسه..
- كل ده متوقع، الولد أخد صدمة السرطان بدري، وممكن يكون إنفتح على عالم مكانش يعرف عنه حاجة عن طريق صحابه، والعالم ده عجبه فبان لكم إنه إتغير.
- ممكن....ممكن...
- عموما إبنكمولد متربي ومهذب، ماتقلقيش عليه وماتبعديش عنه..
- طيب أبونا..هو ما كلمكش عن..البيت؟ الشقة الي ساكنين فيها؟
- لا ما ذكرهاش خالص.. بتسألي ليه؟
- لا أبدا..يعني مافيش حاجة في إيدك تعملهاله؟
- كارمن، أنا رجل دين..لو قلقانة ممكن أرشحلك معالج نفسي.
- معالج نفسي؟
- أعرف واحد شاطر ومتدين ومتخصص في فترة المراهقة.
-تقصد إن ستيفن مريض نفسي؟!
-لا طبعا..إنت محتاجة حد يديكي معلومات طبية متخصصة عن التعامل معاه مش أكتر.
الأب قال إسم وتليفون المعالج النفسي لكارمن، لكن كارمن ما كتبتهومش...
___________________________
- الولد ده بيهبب إيه؟! موصل نور البلد كلها على عداد الشقة!
آل كان ماسك فاتورة الكهربا ووشه محمر من الرقم الظاهر فيها. أخد الفاتورة ونزل بعصبية للبدروم وهو بيصرخ:
- ستيفن! ممكن تفهمني إيه الي بيحصل تحت؟!
ستيفن كان بينقل هو ومايكل آخر حاجة له في أوضة مايكل لأوضته..معنى كده إنه قرر ينام هناك كمان مش بس يقضي يومه في الأوضة الي كان رافض يدخلها.
- أما إنت شجاع كده وهاتنام في أوضة لوحدك، بتسيب نور البدروم كله منور ليه بليل؟ إتخرست ليه رد عليا؟! عارف أنا هاعمل إيه؟ أنا هاوريك..
لق آل على كل لمبات البدروم وفكها من مكانها وحطهم كلهم في كرتونة. مايكل قال بصوت واطي خايف:
- بابا لو سمحت بلاش..
- كان فن عقلك أنا كنت بتسيبه منور النور ده كله؟ مش هارجع اللمبات تاني..
- طب هانذاكر إزاي؟
- ذاكروا في السفرة زي الناس، وانزلوا هنا على النوم...وعارف كمان؟ مافيش مصروف لحد فيكم أما نشوف هاندفع الفاتورة دي منين.
طلع آل باللمبات، ونزلت كارمن وحاولت تهديهم...
- مش كنتوا سمعتوا كلام أبوكم من الأول؟
رد ستيفن في حسم:
- آل مش أبونا..
كارمن إتخضت من الكلام، طول عمر ستيفن كان بينادي آل بابا، وكان بيعرف صحابه عليه على إنه أبوه لدرجة إن محدش برع العيلة كان عارف إن آل مش أبو مايكل وستيفن الحقيقي.
- إنت ما تتكلمش، واما بتتكلم تقول حاجة زي دي؟!
- دي الحقيقة.
- لو آل مش أبوك ممكن تقول لي من أبوك؟ من الي رباك وعلمك وصرف عليك؟ من الي كان بياخدك معاه كل حتة وبيعاملك على إنك إبنه الكبير وصاحبه؟ من الي كان هايموت أما عرف إنك عيان؟! ده زعل عليك أكتر مني!
- شكرا..بس كل ده ما يخليهوش أبويا.
حطت كارمن إيدها على قلبها ومنعت دموعها، وسابته ومشيت. قال مايكل بعد ما قفلت الباب وراها.
- إيه الي قولته ده؟ لسانك بينقط زبالة يا أخي..
- دي الحقيقة..هو اي حد تقوله يا بابا يبقا أبوك؟
بص مايكل لستفين وضيق عينيه وسأله بجدية:
- مالك يا ستفين؟ مالك؟!
ضحك ستيفن ودخل أوضته، وقفل بابها. وفضل مايكل باصص للباب المقفول لدقايق وهو مش مصدق.
___________________________
بليل، آل صحي مفزوع على مايكل بيصحيه..
- بابا، آسف..
- مالك يا حبيبي في ايه؟
- النور منور في أوضتي مش عارف أنام.
- في إيه يا مايكل، طفيه..
- أيوه يا بابا بس حضرتك فكيت اللمبات أصلا أطفيه إزاي؟!
قام آل مفزوع وهو مش مستوعب الي بيتقال. سأل مايكل:
- مش فاهم النور منور إزاي؟
- منور!
- انت ركبت لمبة؟
- لا..
- يبقا ستيفن ركبها..
- لا يابابا مافيش لمبة..النور منور من غير لمبات!
إنتظروا الحلقة ال12غدا إن شاء الله، ودعمكم مهم جدا وهو الي بيشجعني أكمل، لايك صغيرة بتسعدني جدا.
Comments
Post a Comment