الحلقة السادسة عشر- حصاد الشيطان
حصاد الشيطان
( عن قضية الإستحواذ الشيطاني على المزارع موريس ثريو- قصة حقيقية)
الحلقة 16
بعد الغداء، إتجمع الأاحفاد حوالين جدهم موريس وكل واحد بقا يحكيله عن صحابه ومدرسته، بس موريس كان شارد وهو حاطط حفيدته الصغيرة على فخذه وبيهزها وبيقول:
- أول ما إبن الحرام ده يغور عني، هاقعد معاكم براحتي..
مجرد ما خلص موريس جملته، إندفع جسمه لورا وطارت البنت الصغيرة من على رجله ووقعت في الأرض، وموريس وقع بالكرسي الي إتكسر على الارض على بعد مترين.
__بعدها قرروا إن مافيش أطفال تيجي لموريس تاني
______________
لاري إلوارد كان من الباحثين الي بيقضوا الليل مع موريس أغلب الأيام. كان قاعد في يوم مع موريس ونانسي وكان معاهم داني سانت لورينت المُصارع الضخم، الي كان لاري سعيد بوجوده لأنه الوحيد الي هايقدر يحميهم كلهم بدراع واحد!
لاري ما قربش قبل كده من واقعة ماورائية للدرجادي، وكان معاه تعليمات واضحة من إد ولورين بإنه يدون كل حاجة يشوفها، ومايوريش الي كتبه أو يحكيه لأي حد من الباحثين أو مه موريس ومراته.
بس لاري ماقدرش يقاوم إغراء تجربة صغيرة كده. كان سمع في محاضرة في معهد إد وارين عم تأثير الماء المقدس على الممسوسين، والمزارع الضئيل الي قدامه مكانش باين إنه ممسوس أصلا.
- موريس، بقولك..هو إيه يحصل لو إنت شربت الإزازة دي؟
موريس بص للاري دقيقة، حس فيها الأاخير بتلج ماشي على ضهره وجسمه بقا يترعش. نانسي كانت بتتكلم بس سكتت أما شافت بصة موريس ووشه الي إتغيرت ملامحه، ومد إيده وشرب رشفة واحدة من المياة المقدسة.
ربع دقيقة وجسم موريس تشنج، وعينيه إتقلبت لفوق، وبدا يترعش ويتقيأ دم.
رغم ذعرهم، بدأ الباحثين يصوروا الي شافوه بالكاميرات، بعد فترة بسيطة فاق موريس وكان باين عليه التعب والذهول. سأله لاري:
- موريس، إنت فاكر إيه الي حصل لك؟
موريس مكانش فاكر اي حاجة ولا حتى الماء المقدس.
نانسي كانت بتنضف الدم من على الأرض، وقالت لهم في هدوء:
- كفاية تجارب النهاردة..لو سمحتوا..
_________
حس موريس إن عذابه ده له صلة مباشرة بأبوه، وقرر إنه يروح يزور قبره لأاول مرة في حياته. موريس كان مُعقتد إنه لو واجه نفسه وقدر يسامح أبوه بعد كل الي يعمله، ممكن يرتاح شوية.
إد كان قلقان من الزيارة دي، لكن مكانش عايز يخوف موريس خصوصا في حالته النفسية دي، فقال له:
- روح طبعا..بس خد معاك مياة مقدسة وكاميرا. لو اي حاجة حصلت عايزك أنت او نانسي توثقوها..التوثيقات دي مهمة في إقناع الكنيسة.
فعلا أخد موريس ونانسي زجاجة ماء مقدس وكاميرا بولارويد وسافروا للمقابر في هوليوك.
الجو كان لطيف وبشاير الربيع بدأت تظهر. في العربية كان موريس بيسمع أغاني كانتري وبيغني معاها، وبدأت عينيه تدمع وهو بيفتكر حياته العجيبة، وبيتخيل الحياة الي كان نفسه يعيشها زي باقي الناس.
بصت نانسي له وحاولت تخرجه من حزنه وقالت له:
- تعالى نروح مطعم ولا حاجة بعد ما نخلص..أو نتمشى في الغابة شوية.
وصلوا المقابر الساعة إتنين ونصف، وإتجهوا مباشرة لقبر ماكسيم ثريو. رغم دفء الجو، إلا إن بخار أبيض بدأ يطلع من فم موريس. خلع موريس قبعته وقرب من القبر ومن وراه نانسي شايلة الكاميرا.
القبر كان بيحوي كل الي حبه وكرهه وخاف منه، أبوه وأمه وذكرياته كلها قدامه..
نزل على ركبه وبدا يصلي. نانسي وقفت جنبه وكانت حاسة بقلق شديد حاولت ما تظهرهوش دلوقتي خالص.
خلص موريس صلاته وقال بصوت واضح لأبوه:
- أنا عايز أبقا إبنك..ومحتاجك تبقا أبويا..
مجرد ما خلص موريس عبارته، قوى غير مرئية أطاحت بيه لورا زي ما حصل بالضبط على سلم الكنيسة ويوم ما كان شايل حفيدته على فخذه.
جريت نانسي عليه وكان بينزف من أنفه.
- فرينشي..فرينشي إنت كويس؟
- كويس..
بس موريس مكانش فعلا كويس..
_________________
نانسي كانت في أوضة النوم بتسرح شعرها، وسمعت صوت موريس بينادي في ذعر من بره. خرجت جري لقته في الممر وشيء ما غير مرئي بيقذفه من ناحيه للتانية بعنف وهو عامل زي العروسة بدون اي إرادة منه. فضل يصرخ:
- سيبني في حالي..سيبني في حالي..
القوى دي حدفته للسقف وسابته ينزل في الأرض وهو بيصرخ من الرعب. نانسي نزلت على ربكها وفضلت تصلي وتأمر اليكان الموجود بالإنصراف بحق يسوع المسيح.
بعد ما توقفت الظاهرة، موريس فضل نايم متكوم مكانه مارضيش يقوم، أو بمعنى أصح، مكانش في عضمة في جسمه سليمة تساعده يتحرك.
______________________
موريس بعدها بكم يوم كان بيعتني هو ونانسي ببعض الحيوانات، أما سمعوا صوت عربية جاية من بعيد.
- مستني حد يا موريس؟
موريس هز راسه (لأ). قربت عربية بيضا وركنت قريب من البيت، خرج منها رجل وكان فيها عدد تاني من الرجالة فضلوا جوه. الرجل الي قرب من موريس كان شاب مهندم ذو ملامح عدوانية.
- عندي شعور إني جيت هنا علشان أساعد بطريقة أو بأخرى.
نانس ما إرتاحتش للشاب، مكانش عارفة تحدد السبب. قالت له:
- إحنا مش عايزين مساعدة من حد..سيبونا في حالنا بقا. متشكرين لتعبكم وإتفضلوا إمشوا من هنا.
ونانسي بتتكلم، رجل تاني خرج من العربية، وصوب كاميرا تصوير فوري تجاه موريس ونانسي.
الكاميرا بعد ثواني طلعت الصورة الملونة. موريس هجم على الرجل الي معاه الكاميرا وشد الصورة قطعها من إيده وصرخ فيه:
- إطلعوا برة وإلا هابلغ الشرطة..
الرجالة كانوا بالفعل في نص طريقهم للهرب، وبعدت العربية قبل ما أبوابها حتى تقفل بالكامل.
موريس ماقدرش يمسك نفسه من إنه يضحك على منظرهم رغم غضبه.
- شوفتي خلعوا إزاي!
نانسي ما ردتش لأنها كانتش مشغولة في النظر للصورة المقطوعة الي وقعت من الرجل.
- فرينشي..بص..
موريس أخد منها الصورة وهو خايف يبص فيها من تعبير وشها المرعوب. شاف في الصورة نانسي غاضبة وهي بتبص للرجل الي نزل من العربية، وموريس باصص ناحية الكاميرا في غضب.
- مالها الصورة؟
- فرينشي! بص تحت رجليك في الصورة..
تحت رجلين موريس في الصورة كانت حلقة نار بدون مصدر..
_____________________
إقترح الأسقف هارينجتون إن موريس يجرب معالجين روحانيين، مش طادري شياطين. يمكن يكون في فرصة لعلاجه. موريس ونانسي كانوا متحمسين لتجربة أي شيء من طرف الأسقف، وأخدوا معاهم في اللقاء ده الصورة الي معاهم.
وصل الزوجين منزل الأب بوير، وقدم الأسقف المعالجين رونالد أوكنور وروبرت أبروتزي.
- سيد ثريو، إحنا جينا وعندنا أمل نقدر نعالجك، بس الصراحة عرنا ماشوفنا حالة زي حالتك زي ما وصفهالنا الأسقف والأب بوير. الفكرة كلها إننا بنصلي علشان الأشخاص المرضى، وإحنا عندنا موهبة الشفاء وهي موهبة من ضمن القدرات الفائقة للحواس..بنقدر نعالج بعض الأمراض بيها وبدون مقابل..
قال نانسي وهي بتوريهم الصورة:
- عندنا إستعداد نجرب كل حاجة، كل يوم موريس بيتعرض للموت..بصوا الصورة دي كمان؟
بص المعالج الأول في الصورة وإداها للتاني الي بانت على وشه علامات الفزع، وقطع الصورة هو بيقول:
- مش صح تشوفوا الصورة دي تاني..إنسوها خالص وماتفكروش فيها ولا في أي شيء سلبي.
نانسي إستغربت من الفعل ده، بس قالت لنفسها إنهم عارفين شغلهم، والأسقف هو الي باعتهم.
- سيد موريس، عايزين نصلي لك..موافق؟
وافق موريس، ووقف بين الرجلين، وكل واحد حط إيد على راس موريس وبدأ روبرت يصلي الأل. فورا إتخشب جسم موريس وكأنه إتكهرب، لكن روبرت كمل صلاته وغمض عينيه.
فجأة دوت ضحكة مجنونة من موريس بصوت مش صوته. رفع المعالجين إيديهم عن موريس للحظة من الفزع، وبعدين رجعوها تاني بسرعة.
بدأ الدم وسائل أصفر تاني يخرج من بين شفايف موريس في كميات كبيرة. نانسي جريت لمطبخ الأب بوي وجابت فوطة إستخدمها روبرت في تنضيف وش موريس أثناء إستكمالهم للصلاة.
فضل المعالجين يصلوا ربع ساعة، بعده أعلنوا إن مهمتم إنتهت بنجاح، واكد ونالد على نانسي إن موريس هايتحسن.
بس نانسي كانت شبه متأكدة إن مافيش حاجة هاتتحسن.
_____________________
حاول موريس يكمل حياته، ويقوم بشغل المزرعة.
كان راكب الجرار وسط محصول الطماطم ، وبيفتكر الايام الي كان فيها طفل وردليه مش واصلة للدواسات..إفتكر ابوه القاسي وتعذيبه له، وتسائل ليه هو بالذات الي تكون حياته بالبؤس ده؟
رفع راسه للسما وصاح بالفرنسية:
- ليه يارب سايبه يعذبني كده؟!
نزل موريس عينيه عن السما ولقا رجل واقف قدام الجرار! الرجل كان لابس ملابس شتوية عادية وشعره طويل وملامحه مريحه.
موريس ماشافش الرجل ده قبل كده بس كان شكله مألوف..ايا كان ماكانش بيحب أبدا حد يدخل مزرعته بدون إذن بالشكل ده.
وقف موريس الجرار وسأل الغريب بطريقة جافة:
- بتعمل إيه هنا؟
- كفاية شغل وإطفي الجرار.
- إنت مالك؟ لسه عندي لفة كمان وعايز أخلص قبل الليل..
- مش كفاية الي إشتغلته النهاردة؟
صوت الغريب كان مألوف جدا، بس موريس سمعه فين؟
- لا لسه قدامي شوية كمان..إنت عايز حاجة مني؟
- هايجيلك فلوس كتير قريب يا موريس، وإفتكر الي حصلك وساعد الناس بالفلوس دي..دلوقتي إقفل الجرار و كفاية شغل النهاردة.
حاجات كتير غريبة حصلت لموريس، ومكانش قادر يحدد كينونة الرجل ده، هل خيال ولا حقيقة..خير ولا شر؟ موريس ماقدرش يحكم، ولا كان واثقق في حواسه من الأساس.
طريقة كلام الرجل كانت ودودة، بس آل وارن حذوره من تجسد الشيطان الي ممكن يظهره في صورة خيرة ويخدعه. فقرر يتجاهل الرجل ده وحاول يكمل شغله بالجرار، لكنه لقا العجلتين الكبار نايمين.
بص للغريب لكنه مالاقهوش، على مرمى بصره في كل الإتجاهات مالاقاش حد.. لقا أثر خطوات، فنزل مشي وراها لحد ما لاقاها إختفت وسط الحقل..الرجل مشي كم خطوة وأختفى في الهوا!
لو كان خيال ولا شبح إزاي هايسيب أثر رجلين؟ أمال من ده وراح فين وإزاي؟!
سمع صوت فيليب إبنه بينادي من بعيد وه جاي جري وقال له:
- بابا..الرجل المجنون ده كان عايز منك إيه؟
- إنت شوفته؟
- أيوه..شوفته وهو رايح لك وكان حافي! هو راح فين؟!
__________________
تابعوا الحلقة ال17 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل.
شكرا لثقتكم في المحتوى الي بقدمه ومنورين دايما.
#حصاد_الشيطان
#شيرين _هنائي
Comments
Post a Comment