الحلقة الثالثة والعشرين- عالم الشياطين
__________________________________
عالِم الشياطين
سيرة إد ولورين وارِن غير العادية
الحلقة 23
عودة الكيان الشيطاني
الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.
قاموس أوكسفورد الإنجليزي.
***
ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.
بيكمل إد الحكاية:
- "بعد أكتر من ساعة مع البنت والولد دول، الولد إترعب وحالته كانت سيئة للغاية. كان لازم نحضر لطقس طرد شياطين ضروري نظرا لحالة البنت الي بتسوء، وكانت قررت فعلا تنتحر أما جيمي أنقذها وجابها للمحاضرة.
طلبت من لورين تاخد عربية وترجع هي للفندق، وركبت مع جيمي وكيندرا وروحنا بيتها بناء على طلبها، وفضلنا معاها نحرسها ونراقبها لحد ما يجيلي الرد من الكنيسة..
الصبح إتصلت بكاهن بروتستانتي بثق فيه جدا، لأن رجال الدين الكاثوليك لازم يتبعوا تعليمات الفاتيكان من صيام تلات أيام قبل الطقس وغيره من تعليمات بتاخد وقت طويل أوي وحالة البنت مش مستحملة.
بعد المكالمة بساعة، جه الراهب ومساعده، وشرحتلهم خلفية القضية مرة تانية. دخلت كيندرا علينا وكان لسه الرهبان ماشافوش حالة الإستحواذ ولا كانت البنت أصيبت بنوبة من إمبارح..فالمفروض أعمل إيه علشان أؤكدلهم الي شوفته ويشوفوه هو كمان؟ مش هايقدروا يقعدوا معانا أيام لحد ما الإستحواذ يظهر. الحل إننا نستفز الشيطان الي متلبسها ونشوف النتيجة بعينيا.
من الطرق السالمة نوعا لمعرفة إن كان شخص مُستحوذ عليه، إننا نحط صليب ورا راس الحالة من غير ما يشوفه. الراهب طلب من البنت تغمض عينيها وتعد لحد 20. المساعد قرب من ورا الكرسي وحط صليب صغير ورا راس كيندرا.
فجأة البنت فتحت عينيها وصرخ الشيطان من جواها في غضب شديد:
- إبعده! إبعده!
بدا الراهب يطلب من الشيطان إنه يكشف نفسه ويقول معاه كم شيطان. الشيطان قال إنه لوحده، بعدها صرخ بصوت مرعب:
- أنا خادم ديان!
ديان شيطان – جاثوم- ذو قدرات بتسبب الهوس الجنسي. ( ده مش إسم الشيطان الأصلي الي نطقت به كيندرا) عرفنا كده إن في شيطان وفي كيان شيطاني وراه متسلطين على البنت. الكيان ما ردش على أي أسئلة تانية وبدأ يقول كلام كفري ويصرخ ويشتم.
قبل ما يبدأ طقس طرد الشياطين، بيكون لازم إعداد ملف تحقيق وتأكيد للحالة، لكن بما إننا هانشتغل بدون حاجة لموافقة الكنيسة الكاثوليكية، وبما إن الحالة إتأكدت دلوقتي قدام الراهب، ونضيف كمان تأخر حالة البنت، فقرر الراهب يبدأ دلوقتي.
لاحظنا إن الكيان الموجود مش بيسيطر على غضبه تجاه ذكر الله أو إستخدام أي أشياء ذات قداسة. فعملية الطرد هاتكون سهلة. بعد بداية الطقس لقينا إن الكيان عنيد وبيعافر علشان يفضل موجود..وعدت ساعة ورا التانية من قراءة طقس طرد الشياطين بدون نتيجة. فضل يصرخ طول الوقت:
- البنت بتاعتي أنا..روحها ملكي أنا!
مع نهاية اليوم، الكيان رحل، لكن قبل ما يرحل وعد إنه هايرجع..
مكوناش نعرف وقتها هو قصده هايرجع لكيندرا ولا لمين. ففرضنا إنه يقصدها هي، وبدأ الراهب ياخد منها إعتراف بذنبها وإعلان لعودتها لعبادة الله، وحصنها وطلب منها تتصل به لو حست بأي حاجة تقلقها.
البت سلمتني الطرحة السودا، والقرون، وكوب الدماء، وكتاب السحر كوقاية من إغوائها مرة تانية ومحاولة الإستحواذ عليها مجددا. وبليل كنت وصلت بيتي ومعايا الحاجات دي علشان أحتفظ بها في أمان في مكتبي.
في كل لحظة بعد رجوعي من البيت، كان في كيان ماشي ورايا كأنه ضلي. في الليلة التالية بعد الغروب، كنت في المكتب وحسيت ببرودة شديدة في المكان، فقومت وقررت أشوف لو في أي حاجة بتحصل في المتحف المُلحق بالمكتب. جنب المانيكان الي علقت عليه الطرحة، لقيت كيان بيتجسد تدريجيا على شكل سحابة رمادية في أبعاد إنسان بالغ. علشان أمنع الكيان من التجسد بدأت أرش مياه مقدسة، وعرفت إن الكيان الشيطاني الي كان مستحوذ على كيندرا رجع معايا البيت.
الصبح جاتلي مكالمة من رجل إسمه روبرت جولدستورم، طلب مني ميعاد بخصوص بنته دينيس. سألته:
- الميعاد بخصوص إيه؟
الرجل كان غاضب ومتعصب معرفش ليه، بس حكالي إن بنته عندها موهبة كده هو بيعتبرها موهبة سحرية ملعونة. بنته وهي صغيرة بدل ما كانت بتلعب زي الأطفال كان بيلاقيها قاعدة لوحدها بتعمل طقوس سحرية وترسم نجوم خماسية ومعاها دم حيوانات وأشياء بشعة تانية.. أشياء مستحيل طفلة عندها 6 سنين تعرف تستوعبها أو تحصل عليها. البنت أما كبرت بقت تتحاشى تروح الكنيسة، وبيصيبها غضب شديد وخوف من رجال الدين. أطفال الجيران كانوا بيخافوا منها أوي، حتى والدتها كانت بتخاف تقعد معاها في نفس الأوضة لوحدهم!
في سن المراهقة حالة دينيس سائت، كانت أما تبص لحد وتركز فيه حتى لو مش واخد باله، كان بيخاف جدا بدون سبب، خوف غير بشري. نظرة البنت كانت غريبة جدا وقوية لدرجة إنها ممكن تعطل أجهزة وماكينات بمجرد التحديق فيها!
لاحقا شوفت البنت دي بتحدق في عربية ماشية على طريق سريع، وفجأ العربية دي بتقف وتتعطل فجأة.
بس كل ده مكانش السبب الي كان السيد جولدستورم عايز يقابلني بخصوصه. مشكلته كانت إن البنت كانت بتتحول كشخصية لشخصيات تانية منها رجالة ومنها سيدات ومنها كيانات غير بشرية. كلام الشخصيات والكيانات دي كلها فحواها تهديد للرجل وزوجته.
أخد البنت لمعالج نفسي أخضعها للحجز أيام في المستشفى، بعدها نصح الأب إنه يعرضها على رجل دين، وكان واضح إنها سببتله متاعب معينة. راح الرجل للكنيسة، لكنهم طلبوا منه ملف بحث وتأكيد للحالة، ونصحوه يجيلي علشان أكتب التقرير.
بعد ما سمعت مشكلة الرجل حددت معاه ميعاد هو وبنته يوم السبت القادم.
بليل، حاول الكيان يتجسد تاني في المتحف، وتاني رشيت مياه مقدسة. اليوم التالي، الإثنين، سافرت أنا ولورين لشغل في بنسلفانيا وأوهايو ومارجعناش البيت لحد يوم الجمعة. السبت الصبح الساعة 11 جه السيد جولد ستورم وبنته الي كان عندها 19 سنة. البنت كانت سمرا وطويلة ورفيعة، وعينيها زرقاء ولها نظرة ثاقبة فعلا. مديت إيدي أسلم عليها عادي فتراجعت وخبت إيديها وراها وبصيتلي في شك، وفضلت بصالي ومراقبة كل تحركاتي طول الجلسة.
الضيفين دخلوا معايا مكتبي، وطلبت من دينييس تقعد على الكرسي الي قدام المكتب، وأبوها قعد على كرسي وثير على مسافة مننا. شغلت شريط التسجيل وبدأت أسأل الأب عن مشكلته علشان أسجلها بالتفصيل على الشريط الي هابعته للكنيسة. حكى الأب تاني، وأضاف إن كل ما هو أو مراته بيتكلموا مع دنيس مابيبقوش عارفين هم بيتكلموا معاها ولا مع حد تاني. طول الوقت الي الأب كان بيحكي فيه، البنت مارفعتش عينيها عني.
سألت البنت:
- إنت من؟
- دينيس جولدستورم.
- عندك كم سنة؟
- أكبر مما تتخيل.
- إيه رايك في اللي والدك قاله عنك؟ هل فعلا عندك أكتر من شخصية؟
- بابا عنده بارانويا..أنا هو أنا..أنا زي ما أنا عايزة أكون.
- هل جواك شخصية أو كيان غير بشري؟
- مش مضطرة أنا أجاوب على أسئلتك المتخلفة دي!
بدأت البنت تغضب، فضلت تبص لي وهي مستنية أخاف من نظرتها. قولتلها:
- إياكي..إياكي تحاول تعملي كده معايا.. مفهوم؟
ولأول مرة من ساعة ما البنت دخلت بيتي تبص بعيدعني. كانت مرتبكة ومستغربة كأن حد ضربها على راسها. قعدت تبص على الورق الي على مكتبي وهي شاردة، وفجأة قامت مندفعة ناحية الطرحة السودا في الركن. قبل ما أحصلها وامسكها، البنت مسكت الطرحة وضمتها لصدرها في جنون، وإبتدت ملامحها تتغير لملامح الذئاب. طلعت زجاجتين مياه، واحدة مقدسة والتانية ميه عادية ووقفت بعيد عن الكائن الي كان دينيس. هاسمعك الصوت الي طلع منها وإتسجل على الشريط يومها."
إد شغل شريط وعدى منه شوية بسرعة لحد وقت معين وشغله. سمعت ضحكة شيطاني مرعبة كانت بتهز السماعات حرفيا. سمعت بعدها حوار إد معاها..
إد: إنت بتضحك عليا؟ إنت مين؟
بدأ الكيان المستحوذ على دينيس يتكلم وقال:
الكيان: أنا عارف إنت مين.. (ضحكة مرعبة)
إد: إنت مين؟
الكيان: مين مييين ميييين..
إد: إنت مين؟
الكيان: إنت مش عارفني؟ هه؟ مش عارفني؟ إنت عارف ..ولا مش عارف؟ أنا بعاني..بتألم..
(الكيان قصده إنه بيعاني ويتألم لأن تم طرده من جسم كيندرا مؤخرا، وهو شيء مشين في عالم الشياطين وبيعرض الشيطان للنبذ والإستهزاء كونه يأس بسرعة من ضحية)
إد: بتعاني ليه؟
الكيان: مين ميييين مييييين..الأسود هو لوني..لون الموت..لون الموت..لوووون المووووت!
إد: من الي بعتك هنا؟
الكيان: أنا خادم ديان..بعبد لوسيفر..النور..النور..النور..
إد: أنا عندي حاجة علشانك.
الكيان: عندك إيه مش ملكي؟ أنا ممكن أملك وأستحوذ على أي حد عايزه..إنت....
إد: أنا هاحط الحاجة دي في إيدك ,انت قول لي هي إيه.
(إد حط زجاجة المياة العادية في إيد البنت)
الكيان: إيه ده..مبلولة..
إد: صح..
الكيان: مبلولة ومش عاجباني..أنا بحب دهون البشر أما تتسيح وتتدهن على جسمي. وبحب الدم وبحب أشوفه وأشربه..
إد: طيب عندي حاجة تاني ..مياه مقدسة..
الكيان: مياه إيه؟ مقدسة؟ إنت مش راهب أصلا..
إد: لا مش راهب..
الكيان: إنت..إنت مش راهب ومش شخص عادي..إنت بين البينين.
إد: أيوه أنا بين البينين.
الكيان: إنت مش عارف حاجة! هو موجود في الجنة والنار، ومافيش جنة ومافيش نار.. في مكان، مجرد مكان ومش هاقولك أكتر من كده. ولا أقولك؟ إنت مش عارف حاجة..ولا عارف؟ إنت عارف..إنت واقف بين الجنة و النار، ومافيش جنة ومافيش نار! قريب هاتفهم!
إد: لا إنت الي هاتفهم..
الكيان: (ضحكة شيطانية) أنا هناك والمكان عاجبني..حاسس بالسلام..حاسس بالسلام..المكان عاجبني بس إنت لأ..مش عاجبني.
إد: انا عارف إنت ليه بتكرهني.
الكيان (يصرخ) ليه؟
إد: احنا أخدنا منك كيندرا مش كده؟
الكيان: انا عندي أي شخص أنا عايزه.. انا اقوى منك ومن الرجل الي جبته (قصده الراهب)
إد: هانشوف من الأقوى..إسمك إيه؟ مسمي نفسك إيه؟
الكيان (شتائم جنسية) أنا حبيب لوسيفر..عارف من لوسيفر؟
إد: إنت قول لي من لوسيفر.
الكيان: هاهاها..هو الإله الحقيقي..إنت عارف إني أما بعوز حاجة بعملها؟ أنا عندي كل حاجة عايزها!
إد: ما إنت كنت عايز كيندرا بس ما عرفتش تحتفظ بيها.
الكيان: كيندرا ما تعرفش! كيندرا ماتعرفش!
إد: ماتعرفش إيه؟
الكيان: هاتشرب الدم تاني..هاتشرب الدم وهاتشوفني وهاستحوذ عليها تاني!
إد: تاني؟
الكيان: تاني!
إد: لا مش هاتقدر.
الكيان (في غضب شديد) وإنت بأي طريقة هاتقدر تحميها مني؟ البنت بتاعتي..روحها ملكي!
إد: لا هي ولاروحها ملكك..
الكيان: هاشرب دمها.
إد: مش هاتعمل لها حاجة.
الكيان (يضحك) انا بحبها..لعبتي..
إد: كانت لعبتك، لحد ما لجأتلنا..إنت عايز تساوي نفسك بينا؟
الكيان: أنا أقدر أعمل أي حاجة عايزها!
(إد هايرمي عليه المياة المقدسة)
إد: أنت لا تملك حاجة ولا تقدر تعمل حاجة..(بيرمي الماء) دي أقوى من أي حاجة تقدر تعملها..إنت عارف ومتأكد من كده كويس..
الكيان: أنا عايز أقتلك..وهاقتلك..(صوت صراخ غير طبيعي) إنت ماتقدرش تقتلني..إيه هاتطعني في قلبي؟ ماعنديش قلب!
إد: صح إنت ما عندكش قلب.. بس عندي أساليب تانية غير الطعن (بيرش الماء المقدس) ها إيه رأيك في ده؟
الكيان (صراخ) لاا!
إد: بتحب الصليب؟
الكيان: لا!
إد..طيب هاقولك حاجة..عايزك تمشي من هنا وماترجعش تاني أبدا..
الكيان: إخرس!
إد: لا مش هاخرس..بسم الله هاتمشي من هنا..
الكيان: بسم يسوع المسيح إخرس!
إد: خلاص..بسم يسوع المسيح هاترحل ومش هاترجع تاني.
الكيان: بس هارجع تاني..ولو مارجعتش في أكبر مني هايرجع..أنا ضعيف وفي أقوى مني!
إد: إنت ضعيف وهاترحل..بسم الله آمرك أن ترحل.
الكيان (ضحك ممزوج بعويل غريب)
(إد بيرش ماء مقدس على جسم البنت كله)
الكيان: آه..نار..نار..نار! (صوت ضحكة ساخرة)
إد: عايزك تمشي من هنا وماترجعش تاني للبيت ده..فاهمني؟ إرحل!
أصوات عويل وأصوات حيوانات متعددة عالية وبتنخفض تدريجيا.
ضغط إد زرار إيقاف المُسجل، وسابنا قاعدين في صمت كامل. قعدنا دقيقة ساكتين وماكونتش عارف لسه أخرج صوت الكيان من دماغي. أخيرا قال إد:
- "أديك سمعت إيه الي بيضحك على الشباب دول وبيستحوذ عليهم..كيان شيطاني قذر. كيانات غير مرئية، ذكية، بتحمل كراهية لا تصدق تجاه البشر..كيانات حقيقية وموجودة."
هل رجع الكيان تاني وإستحوذ على كيندرا؟
- " حصل! ما عداش إسبوع واتصل بيها صديقها يستغيث. البنت شربت قربان الدم تاني ورجعت تحت الإستحواذ تاني، نفس الكيان. خلي بالك كمان إن الكيان ده بيستحوذ على البنت نيابه عن رئيسه، وقرار الرحيل مش قراره فلازم يحاول يخدع تاني ويوقع نفس الضحية تاني وإلا هايتعاقب.
المهم إضطريت ارجع تاني واحدد ميعاد تاني لجلسة طرد شياطين. "
يعني ده معناه إن الجلسة الأولى فشلت؟
- " مش قضية إنها فشلت، هي خرجت الكيان فعلا بس القضية فيها شقين، الأول ان الكيان رجع لأنه مأمور يرجع من رئيسه، ثانيا وده الأهم، البنت رجعت للمارسات السحرية تاني..بدل ما تقاوم إغراء المحاولة إستسلمت. البنت بتعاني كمان من مشاكل نفسة وتربوية خطيرة، ودايما بتفكر في طريقة تقدر من خلالها تملك كل شيء عايزاه زي ما إتعودت. وباب السحر أغراها تاني على إعتبار إنها ممكن تكون حريصة أكتر المرة دي! احنا مش بنتعامل مع كلاب شرسة هنا! دي شياطين!
المهم، بعد طرد الكيان منها مرة تانية، راحت لمؤسسة تأهيل نفسي وهي حاليا كويسة وتحت فترة علاج ومراقبة."
طيب ودينيس؟ إيه بقا مشكلتها وإزاي إتحلت؟
- " بعد التسجيل الي إنت سمعته ده، والي كانت فيه وسيطة مش مُستحوذ عليها بالمناسبة، رجعت ملامحها زي ما كانت. البنت دي مشكلتها إنها عاملة زي ما تكون علبة فاضية أي كيان ممكن يستحوذ عليها ويلعب بيها شوية ويسلمها لغيره. دينيس وسيطة بين عالمنا وعالم الظلام. الي حاولت أعرفه هو إزاي جاتلها القدرة دي.
بعد مغادرة الكيان الشيطاني الي إنت سمعته ده، البنت كانت هديت، وبدأت تتكلم معايا وتحكي.
حكاية دينيس بتبدأ من قبل ولادتها أصلا. البنت إتولد بمعرفة وقدرة على ممارسة طقوس السحر. البنت بتزعم إنها إكتسبت القدرة دي في حياة سابقة لها. كانت بتقول إنها تناسخ لروح ساحرة قديمة. إنت عارف موضوع التناسخ شائك، لكن بنقابل ناس كتير بتزعم وبوجود دلائل على إنها عاشت قبل ما تتولد حيوات تانية في أجساد تانية. لكن هل هو ده الي حصل مع دينيس فعلا؟
هانرجعلكم بكرة إن شاء لله علشان نعرف حكاية دينيس، والفرق بين السحر والشعوذة، وتحليل لورين للتناسخ. وكمان هانعرف معنى الكلام الغريب الي سمعناه في التسجيل على لسان الكيان الشيطاني..كل ده وأكتر في البوست القادم إن شاء الله.
ماتنسوش إن اللايك والشير هو الشكر الي بنتمناه منكم مش أكتر.
#إد_لورين_وارن
#عالم_الشياطين
#شيرين_هنائي
Comments
Post a Comment