الحلقة الرابعة- في مكان مظلم
في مكان مظلم
( قصة الإستحواذ الشيطاني على الطفل ستيفن سنيديكر وعائلته- قصة حقيقية من ملفات عالمي الشياطين إد ولورين وارن)
قعدت كارمن في حجرة المعيشة تراجع بعض الفواتير، وسمعت صوت صراخ ستيفاني.رمت الورق من ايديها وجريت على أوضة ستيفاني، ولقت البنت على الباب واترمت في حضنها.
- حبيبتي مالك؟
- في واحدة ست هنا يا ماما..في الأوضة!
- إيه؟!
- ست..ست كانت واقفة هناك وفاتحالي دراعاتها.
ستيفاني كانت خايفة جدا وبتتكلم وهي بتعيط وماسكة في كارمن.
- طيب إهدي يا حبيبتي..تعالي ندخل سوا ووريني شوفتي ايه..
- شوفت ست!
- ماشي، وريهالي..
وقفت كارمن شايلة ستيفاني في وسط الأوضة وسألت بنتها:
- هي فين؟
ستيفاني شاورت على التسريحة والمراية وقالت:
- هنا..كانت واقفة هنا..
- طيب تفتكري راحت فين؟
- معرفش!
قعدت كارمن على طرف السرير وفكرت ان غالبا ستيفن حكى لأخته عن البيت ورعبها. سألت ستيفاني:
- ستيفن حكالك حاجة قريب؟ حكايات بتخوف مثلا؟
- لا
- فين ستيفن؟
- بره مع جايسون.
بصت كارمن للمراية وشافت الشباك منعكس عليها. سألت ستيفاني:
- تفتكري ستيفن هو الي عمل نفسه ست وظهرلك من الشباك وخوفك؟ بيلاعبك يعني؟
- لا طبعا! إزاي..الست كانت واقفة هنا مش في الشباك ولا في المرايا!
- انا اعتقد يا حبيبتي إن حد كان بخوفك من الشباك وانتي ما اخدتيش بالك وفكرتي ان في حد معاكي في الأوضة.
- لا..انا شوفتها..كانت واقفة هنا!
- طب بالعقل يا حبيبتي، دخلت منين؟ وراحت فين؟
ستيفاني بصت في الأرض وكشرت وسكتت.
- مالك؟
- مش مصدقاني..
- لا يا حبي انا مصدقة انك شوفتي حاجة، احنا بنتكلم بقا الحاجة دي عبارة عن ايه..بس مصدقاكي..اتفقنا؟
- ماشي..
تعالي بقا نشرب حاجة ساقعة سوا..
- لا مش عايزة.
- تطلعي تلعبي بره؟
- براحتك..
باست كارمن ستيفاني وخرجت تدور على ستيفن لحد مالقيته واقف مع جايسون بره. نادت عليه وقالتله في عصبية:
- انا مش قولتلك ما تقولش لإخواتك على موضوع البيت؟
- ايوه قولتيلي.
- امال حكيت لستفاني ليه؟
- ماحكيتلهاش!
- انت خوفتها من شباك اوضتها؟
- لا..لا..انا وجايسون كنا..
- ستيفاني قالت انها شافت ست قدام التسريحة،وكانت فاتحة دراعتها وبتبصلها بصة غريبة..مراية التسريحة في وش الشباك..يبقا من الي خوفها؟!
بصلها ستيفن وعينيه وسعت، للحظة إفتكرت كارمن إنه هايعترف بالي هو عمله، لكنه نظرته تحولت لرعب حقيقي وهو بيسألها:
- بجد؟ يعني هي شافت..شافت حد في أوضتها؟
- ستيفن، أنا مش عايزة تهريج، بطل الهزار الي بتهزره معاها ده.
- بس أنا لا حكيتلها حاجة ولا خوفتها من الشباك.
- أمال ليه بتقول إنها شافت ست في أوضتها؟!
- يمكن علشان فعلا هي شافت ست في أوضتها!
- ماشي يا ستيفن..هاصدقك..يمكن هي سمعت حد فينا بيتكلم عن البيت وإحنا مش واخدين بالنا. المهم، لو سمحت ما تتكلمش عن البيت تاني، لو حبيت تتلكم عنه إتكلم معايا أنا بس؟ مفهوم؟
- بس أنا ماقولتش..
- لو سمحت ممكن تقول حاضر؟
بص ستيفن في الأرض وهز راسه ومشي ببطء وإنكسار ناحية جايسون. كارمن بعتتله بوسة في الهوا فإبتسم بالعافية. قال ستيفن لجايسون:
- بقولك، أنا راجع البيت..
- إيه؟ زعقتلك؟
- لا..ليه بتقول كده؟
- اصلها نادت عليك وكلمتك بعيد، وملامحها كانت مكشرة كده.. مش عارف..انت كمان شكلك متضايق، مالك؟
- أشوفك بعدين..سلام..
مشي ستيفن ناحية البيت وإبتدا يفكر..ستيفاني شافت حد عندها، هل هو نفس الشخص الي هو بيسمعه؟ يعني هو مش مجنون ولا بيتخيل! بس ده مش هايحسن الوضع، مامته مش هاتصدقه ولا هاتصدق ستيفاني برضو.
في أي مكان بيروحه ستيفن في البيت، بيحس كن حد ماشي وراه أو مراقبه. طبعا كان بيحتفظ بالإحساس ده لنفسه لأن محدش هايصدقه، بس كون ستيفاني شافت حد ده معناه إنه مش مجنون.
_____________________________
أما وصل آل بليل،كانت كارمن والأولاد بيتفرجوا على التليفزيون في الصالة وريحة الأكل الشهي مالية الشقة. أول ما سمعوا البا ببيفتح جريت كارمن عليه ووراها الأولاد.كلهم كانوا بيضحكوا ويهزروا ..ماعدا ستيفن.
آل فتح شنطنته وأعلن إنه جايب هدايا للكل.. بطريق لعبة لبيتر، كراسة رسم والوان لستيفاني، وسنارة صيد سمك لستيفن.. لكن ستيفن يادوب إبتسم إبتسامة خفيفة أما شاف هديته وشكر آل بدون ما يلمس العبة الفخمة.
صيد السمك كانت هواية بتجمع آل وستيفن، وكان بقالهم فترة ما بينزلوش يصطادوا لأن سنارة ستيفن إتكسرت، وكان بيحلم بواحدة تانية..آل كان فاكر إن الهدية هاتخلي ستيفن يطير من الفرحة، أو حتى يتحمس شوية.
لاحظت كارمن الوجوم، فقالت وهي بتحول تغير الموضوع:
- وهديتي أنا فين؟
قام آل وحضنها وهمس في ودنها فضحت.
قعدت العائلة حوالين الشفرة وإتعشوا وضحكوا كتير ماعدا ستيفن أكيد. بعد العشا أخد آل البيرة وخرج يأجر شريط فيديو للسهرة وبدأت كارمن تشيل بواقي الأكل في التلاجة.
شوية وجه ستيفن يساعدها، قالت له هي بتضحك:
- خير؟! إنت عيان ولا عايز حاجة مقابل المساعدة؟
سكت ستيفن وساعدها شوية بعدها قال:
- أنا هاغسلك الأطباق مقابل حاجة تعمليهالي..
- أنا برضو قولت كده.. خير؟
- ممكن تزلي تحت تجيبيلي صندوق العدة بتاعة الصيد من أوضتي؟
- أكيد طبعا يا حبيبي، ومش لازم تغسل لي الأطباق علشان أجيبهولك. إرتاح إنت..
نزلت كارمن جابت الصندوقـ فخطفه من إيدها وحطه على السفرة وفتح علبة السنارة الجديدة وأبتدا يركبها وهو مبسوط، شوية ورجع آل فشد كرسي وقعد جنبه.
- حلوة؟ عجبتك؟
- جميلة..
خرج آل من جيبة تصريح صيد وحطه قدام ستيفن وقال له:
- إيه رأيك نجربها بكرة سوا؟
- بجد؟!
فضلوا يتكلموا فترة طويلة عن الرحلة وهايروحوا فين وهايعملوا إيه فيها، لكن آل هو الي كان بيشد الكلام من ستيفن وده مكانش المعتاد بينهم..في حاجة مش مضبوطة في الولد، شيء مظلم مخيم عليه وسارق سعادته.
فجأة سأل ستيفن آل بدون مقدمات:
- بابا، هو لو حد بيسمع أصوات مالهاش مصدر، بيكون مجنون؟
آل إتفاجي، شرب كوباية ميه لحد مايفكر هايرد يقول إيه بعدها قال:
- لا مش بالضرورة..في ناس كتير بتسمع أصوات أو بتشوف حاجات، بس الأشخاص دي بتكون تحت ضغط نفسي شديد، فلو حد مضغوط نفسيا ممكن يشوف ويسمع أي حاجة..خاصة كمان لو الشخص ده مضغوط نفسيا ومريض..فاهمني؟
بص له ستيفن في فضول وتساؤل، كمل آل:
- ماما حكيتلي عن الي حصل في التليفون، وأنا مش شايفك مجنون خالص. بس إسمع يا بني، إنت لازم ماتقولش لحد من أخواتك عن الي بتسمعه أو تشوفه ولا المفروض تقول لحد من صحابك او جيراننا..شوفت أما حكيت لستيفاني خافت إزاي؟
غمض ستيفن عينيه في غضب مكتوم ورف رتسه لفوق، هو ماقالش لستيفاني، ليه مصممين يزلقوا الي حصل فيه؟
- إنت محتاج تهدا يا ستيفن، الرحلة الي هانطلعها بكرة أنا وإنت لوحدها هاتهديك ووتروق دماغك. ماشي؟
- ماشي..
قام آل وستيفن علشان يشوفوا الفيلم الجديد. ستيفن إتجه للحمام ولسه هايحط إيده على الأكره سمع صوت واطي بس واضح بيقول:
- ستيفن؟ إنت لازم فعلا تنزل هنا..
- ستيفن؟
بلع ستيفن ريقه وبعد خطوتين عن الحمام، وبص لباب البدروم المفتوح، شاف حركة تحت في الضلمة، كأن حاجة رمادي بتتحرك.
- تعالى يا ستيفن..
جري ستيفن مفزوع للصالة وهو بينهج.إتكوم على الكنبة والف دراعاته حوالين صدره وبص للتليفزيون بينما الكل بيضحك....
تابعوا الحلقة الخامسة غدا ان شاء الله.
في الصورة عائلة سنيديكر مع ابنة اخت كارمن وإد ولورين وارن.
Comments
Post a Comment