الحلقة الثالثة عشر-حصاد الشيطان
حصاد الشيطان
( عن قضية الإستحواذ الشيطاني على المزارع موريس ثريو- قصة حقيقية)
الحلقة 13
نانسي كانت متوقعة إن ليبوف ييجي بعد ما موريس حكالها كلامه معاه. صبت له وله لإد كوبين قهوة وسابتهم وراحت تكمل شغل البيت.
إتكلم إد لمدة ساعة تقريبا، وسمعه ليبوف وإحترم مِهنية إد، بس كان عارف إنه هو وعالِم الشياطين في بيت موريس لسببين مختلفين. هو جه لسبب جنائي، إما إد فأسبابه لسه مش مفهومه أوي له..يمكن هياخد فلوس من موريس؟ يمكن تعاطف؟ أسباب دينية؟ أيا كان فإهتماماتهم مكانتش واحدة، إتأكد إنه آل وران مش هايفيدوه في حاجة بالنسبة لتحقيقاته.
- ماشي يا إد، هاقدّر أول لو بلغتني بأي مستجدات..
قالها ليبوف وهو راجع عربيته.
- أكيد يا فندم..
حس ليبوف إنهم طردوه بلطافة كده، إحنا كلنا متفاهمين وإنت الوحيد الي مش فاهم إحنا بنعمل إيه.
ساق ليبوف عربيته وهو مصمم أكتر إنه يكمل تحريات ويثبت إن كان موريس نصاب أو بريء.
______________
الواحد ممكن يتصور إن الكنائس بتسعى ورا إقامة طقس طرد الشياطين، فأي إثبات هايكون أكبر لقوة الإيمان الكاثوليكي في تحدي قوى لا يجرؤ أحد على تحديها؟
بس في الواقع، الكنيسة بتخشى الإثارة والإستغلال الي بيصاحبوا القضايا الخوارقية دي وزعم إن طقس طرد الشياطين خرافة وطقس تبشيري مش اكتر.
واحد من شروط الكنيسة لإقامة الطقس ده، هو وضع الضحية تحت التقييم الطبي النفسي أولا وحيازة تقرير يفيد إنه مش مريض عقلي.
خلال التحقيقات الي تمت في قضية موريس ثريو، أعرب الأب بيتر كونلي ، المتحدث بإسم أبرشية بوسطون، في لقاء صحفي إنه خلال ال21 سنة الي أمضاهم في خدمة الكنيسة، ماشافش ولا حالة إستحواذ شيطاني حقيقية، وأضاف إن الطب النفسي ساهم بشكل عظيم في تشخيص حالات كنا بنظنها زمان مس.
لذلك، أرسلت الكنيسة طبيب نفسي علشان يقيم حال موريس، كجزء من التحقيقات الي بتحتاجها للموافقة على إقامة طقس طرد الشياطين.
إد ولورين وموريس ونانسي كانوا قاعد في المطبخ بيفطروا، وبيبلغ إد قرار الكنيسة لموريس:
- بكده هايتأكدوا إنكم ما بتتخيلوش الأحداث دي..أو إن الموضوع يكون خدعة منكم.
إد كان بيحاول يطمن الزوجين، لكنه هو نفسه كان قلقان لأن عدد كبير من أعراض موريس مشابهة تماما لأعراض أمراض نفسية وعقلية. الحالات دي شافها إد خلال مشواره المهني كتير، ورغم شعوره إن حالة موريس مش مرض عقلي، إلا إنه كان خايف إنهم ما يقدروش يحصلوا على الإثباتات المطلوبة خاصة الطبية منها.
- خلونا نأمل إنهم يبعتوا طبيب متسع الأفق مايحكمش على الحالة من سؤالين وخلاص.
فضل الأربعة صامتين، كل واحد بيفكر في إحتمالات للقاء الطبيب، لحد ما التليفون رن.ردت نانسي ولقته الأب بوير بيسأل عن إد.
- إد..الأب بوير عايزك..
بعد ما إتكلم إد دقايق، قالهم إن الأب بوير عايزهم ييجوا المسكن المرفق بالكنيسة علشان يقابلوا الدكتور الي هايفحص موريس.
_____________
أما وصولوا عند الاب بوير، موريس إبتسم إبتسامة طفولية عريضة وهو داخل عليه، كان بيحبه فعلا ومؤمن إن الرجل ده بالذات بيساعده علشان بيحبه مش أكتر، حتى إنه أهدى موريس صليب دهب بقا موريس ياخده معاه في كل حتة، وبينام وهو ماسكه. الصليب ده كان بيهديه نفسيه جدا حتى لو حالة الإستحواذ نفسها مستمرة.
مد موريس أيده في جيبه علشان يطلع الصليب الذهب وهو بيقول للأب بوير:-
- صاحبنا معايا في جيبي..
خرج موريس الصليب، لكنه فجأة طار من إيده وخبط الأب بوير في عينه الشمال. لولا إنه قفل عينه لا شعوريا كان زمانها إتعورت..الصليب كمل إندفاعه وكسر الشباك ورا الكاهن ووقع في الارض.
الكاهن إنحنى ومسك الصليب، وموريس كان لسه متجمد مكانه ومادد إيده قدامه وهو لسه مش مستوعب.
الغريب إن الكاهن وإد ولورين شافوا زي أثر حرق في كف موريس مكان الصليب.
حاولت المجموعة تهدي موريس بسرعة وتنضف المكان قبل ما الدكتور ييجي، لأانه ممكن يستنتنج فورا إن موريس هاجمهم وإنه مختل عقليا. بدءوا يتكلموا ويهزروا في اي موضوع، وبعد تلت ساعة الدكتور وصل وكان زي ما تخيله موريس بالضبط.
كان طويل وقوي وفكه مربع وعينيه رمادية ثاقبة، ولابس نضارة.
شكله الجاد قلق موريس، حس إنه بدون مشاعر وماعندوش قدرة على التعاطف، لكنه قال لنفسه إنه يمكن الدكاترة النفسيين لازم يلبسوا وش خشب كده علشان مرضاهم ما يتأثروش.
سلم الدكتور على الموجودين، وإنتهى بالسلام على موريس وإنفرد به في مكتب الأب بوير. فضلت المجموعة بره مستنية النتيجة.
بعد دقايق طلع الدكتور وطلب من إد يدخل معاهم.
أما قعد التلاتة سوا، بدأ الطبيب يسأل إد عن موريس وعلاقته به، وحاسس إيه تجاهه، وليه مهتم بقضية موريس، وإزاي الرجلين إتجمعوا سوا..إلخ.
الطبيب كان مصمم لسبب ما إن في علاقة جنسية ما بينه وبين إد!
أخيرا إد قال له في نفاذ صبر ووشه محمر من الغضب:
- بص، إحنا جينا هنا علشان نساعده في الأمور الي بتحصل له، ولو لاحظت هاتلاقي إن الأمور دي صميم شغلنا.
- طيب..أنا ما بصدقش في الأمور دي عموما..
= أيوه يعني إنت مش مؤمن ولا ديانتك إيه؟
- أنا مش هنا علشان أناقش معتقداتي الدينية معاك.
- هو سؤال، إنت مؤمن بالله؟
- بتسأل تاني أهو..
- لو هاتسألني أنا اسئلة ، وأنا مش مريض عندك، يبقا أنا كمان أسألك..
- ببساطة، مش عايز أتكلم في الأمور دي.
- إنت هنا علشان تساعدنا؟ شايف كده؟
قام إد وخرج بره الأوضة، وتبعه موريس. إد كان غاضب جدا ومسك لورين وشدها معاه علشان يخرجوا بره.
- تعالي يا حبيبتي، هانمشي من هنا..أبونا، هابقا أكلمك..
موريس ونانسي ما توقعوش إن ده يحصل، دماغهم لفت من تصاعد الاحداث الدرامي ده.
الأربعة إتكوموا في عربية إد، والأخير بدأ يسوق بسرعة وغضب. مجرد ما بعدوا عن الكنيسة كم متر موريس صرخ:
- آه..ضهري..ضهري!
- موريس حبيبي مالك؟
وقف إد العربية وجري فتح باب موريس وساعده يخرج وقال لنانسي:
- ساعديني أقلعه القميص، في دم على ضهره..
على ضهر موريس، شافوا رسم لصليب محروق على جلده.
شد إد إيد موريس ومشي به بسرعة ناحية الكنيسة.
- رايحين فين؟
- علشان يشوفوا إننا مش نصابين..
طع موريس وإد سلالم منزل الأب بوير بسرعة، وأول ما وصلوا لف إد موريس علشان الكاهن يشوفه. ونادى على الطبيب النفسي:
- ياريت تيجي تبص بصه على ده يا دكتور..
الدكتور كان بيتكلم في التليفون، فقفل الخط وخرج من المكتب.
- ها..إيه تفسيرك لده؟
فحص الدكتور ضهر موريس وقال بعدها:
- أوكي يا موريس..عملت كده إزاي في نفسك؟ أنا كنت صريح معاك وعايزك تبقا صريح معايا..
إد كان غاضب بشدة وبيرتجف، كان عارف نوعية الناس الي الطبيب منهم، وإصطدم بيهم الف مرة قبل كده. ضيق إد عينيه وقال للطبيب:
- إسمع بقا.. ياريت وإنت لوحدك حاجة من الي مش بتؤمن بيهم دول تعرفك الحقيقة، وتعرف قد إيه الرجل ده بيعاني..لو هو محتاج دكتور نفسي أكيد مش هايبقا إنت.
لف إد للأب بوير وف إحترام قال له:
- أسف يا أبونا، أحنا جينا هنا علشان نطلب المساعدة والدكتور أهاننا...ودلوقتي هانمشي..
قال الأاب بوير للطبيب وإد وموريس خارجين من الباب:
- عارف يا فندم، أعتقد إنك شخص مش محترم..إيا كان تشخيصك فمعاملتك للناس ماينفعش تبقا كده ابدا..
وسابه ومشي مع إد وموريس.
________________
قضية موريس فرينشي ثريو بقت دلوقتي شأن عام، بلاغ نانسي الي بلغته لليبوف اما موريس نزف في الحمام، إتسرب بشكل ما للصحافة، ومن هنا بدأ الصحفيين يتكالبوا على القرية ويحاولوا ياخدوا صورة لموريس أو بيته بأي طريقة.
المانشيتات توالت عن موافقة الكنيسة على إقامة طقس طرد الشياطين على مزارع في قرية وارين، بالرغم إن لسه ما فيش أي تأكيد أو موافقة على أي حاجة.
أغلب الصحف حاولت تخبي هوية موريس، لكن صحيفة صفرا إسمها بوسطون هيرالد نشرت إسمه وعنوانه بالكامل مع صور له إتصورت له بدون علم. وفضلت الصحيفة تتنزل كل يوم أخبار ملفقة مع المزيد من الصور والحديث عن إد ولورين وارن والمتاجرة بسمعتهم.
الكنيسة أعلنت أكتر من مرة إن الأمر قيد الفحص والإستقصاء، وإن النشر في أمور زي دي هاتضر بحالة موريس النفسية، لكن الصحافة ما سابتش خبر زي ده قبل ما تصفيه لنهايته.
موريس ثريو بقا حكاية على لسان كل أهل القرى المجاورة، وبقا الناس تخاف منه وتتشائم، حتى إن زباينه بطلوا يشتروا منه حاجة. الناس كانت عارفة زمان زعم موريس إن في أشباح في مزرعته، بس مكانش الوضع واصل لوجود شيطان في قريتهم بسببه.
إنتقلت قصة موريس من الصحف المحلية، للصحف الصفراء في أمريكا كلها، وبقت كل جريدة تزود تفاصيل من عندها علشان تعلي مبيعاتها عن الجرايد التانية. ودخلت الكنيسة بسبب الأخبار الزائفة دي في مشاكل، وبقت بتصر على إثباتات أكتر تعقيدا لحالة موريس، وبقت موافقتها على إقامة طقس طرد الأرواح بعيدة أكتر من الأول.
الضغط زاد على الأب بوير كمان أما رواد الكنيسة بقا يطلبوا منه في شِبه مُظاهرة إنه يطرد موريس من البلد. وبقا بيحاول في كل قداس يخطب في الناس ويوعيهم بخطورة فزعهم غير المبرر..كمان كان بيهاجم الصحفيين الي بيسربوا صور لموريس وبيلفقوا أحداث ما حصلتش.
الصحافة بدأت تهاجهم الأب بوير، وتسجل خطبه في السر وتذيع منها مقاطع غير مترابطة في سياق يبخلي الأب بوير يبان مُتعصب وجاهل.
ظهر رسام كاركاتير إسمه ليو آبوت، رسم عدد من الرسوم الساخرة الي فيها موريس ونانسي والشيطان في أوضاع مضحكة. أحفاد موريس إتضرروا جدا من الرسومات دي بسبب تنمر زملائهم في المدرسة.
الرسام ليو آبوت بعدها تلقى مكالمة من شخص بيدعي إنه موريس ثريو، بيقول له إنه مش عارف هو بيتريق على مين، وبيهدده بكارثة قريب.
خلال أيام قليلة أصيب الرسام الشاب بجلطة مخية.
___________________________
مع الوقت، أصبحت حالة موريس ثريو كابوس بالنسبة لليبوف، فطول الوقت مطلوب منه يرد على أسئلة صحفيين، ويبعد المشاغبين والفضوليين عن بيت موريس الي بقا مزار سياحي بيجيله ناس من أنحاء الولاية، ويفض مظاهرات القرويين الي بتطالب برحيل موريس من القرية.
توليه حماية موريس جه بفايدة نوعا ما، فكدة بقا له سلطة قانونية يقدر بيها يراقب موريس أو يروحله وقت ما يحب.
في يوم راح المزرعة وكان موريس بيزع بره بيته. وموريس عرف فورا إن ليبوف بيستغل سلطاته مش أكتر.
- إزيك يا فرينشي..حد مضايقك ولا حاجة النهاردة؟
- لا الدنيا هادية النهاردة..بس محدش عارف ايه الي هايحصل طول اليوم. عموما المتطفلين أنا بعرف أتعامل معاهم، بس حالتي أنا هي الي تعباني.
- إيه لسه بيجيلك العفريت ده؟
- إنت مش مصدقني حتى بعد ما شوفت بعينيك؟
رغم كل الي شافه ليبوف، إلا إنه كان قرر خلاص إنه يقفل عقله تجاه اي حاجة بيقولها موريس أو إد وارن. بس كان في جزء في لا وعيه بيتسائل دايما عن تفسير الغرائب الي بتحصل لو مكانش إدعاء موريس صادق.
- تقدر تقول إني شكاك بطبعي.
- طيب..عندي إقتراح، ماتيجي تبات معانا يوم الإسبوع ده؟ تشوف بنفسك كل حاجة..
- عايزني أبات عندك؟
- وماله..ماعنديش حاجة أخبيها..يمكن تصدقني.
- ماشي..موافق..أجيلك بكرة بليل؟
- مافيش مانع.
___________________
في الليلة التالية، الساعة 7 بليل، راح ليبوف لمزرعة فرينشي ومعاه كاميرا وإزازة ميه مقدسة إداهاله الأب بوير أما عرف إنه هايبات عند فرينشي.
ليبوف مقالش لمراته إنه رايح لموريس علشان ماتخافش وقال لها إنه في وردية حراسة.
رن الجرس مرتين، بعدها موريس فتح وبص لليبوف كأنه آخر شخص يتوقع إنه يجيله في الكون.
- عايز إيه؟
- إيه يا فرينشي، إنت مش طلبت مني آجي أبات عندك النهاردة؟ أنا جيت أهو..
إتغيرت نظرة موريس ولاحظ ليبوف إن شكله كأنه بقا واحد تاني. قال موريس:
- ما أفتكرش إن دي فكرة كويسة..أعتقد إنك ترجع بيتك أحسنلك.
- بص بقا يا فرينشي، إنت دعيتني وأنا جيت..ليه مش عايزني أشوف بنفسي إيه الي بيحصل علشان أقتنع؟
- لا مش هاينفع..أنا هاتصل بإد وارن أحسن أسأله..
قفل موريس الباب في وش ليبوف وراح يكلم إد، دقايق ورجع فتح الباب وقال لليبوف:
- إد قال مش هاينفع علشان خطر عليك.بيقولك إبقا تعالى أما يكون حد من الفريق بتاعهم هنا.
- لا ما تقلقش عليا..أنا هبات عندك النهاردة.
- لودخلت البيت أنا هاروح أنام في الشارع..
- خلاص ياعم براحتك..خليها يوم تاني..
ليبوف كان عارف إن فرينشي مش هايخليه يبات عنده اصلا لأنه كداب. ركب الشرطي عربيته، ووقف موريس من ورا الشباك يبص عليه، وعينيه بتنزف دم، وسائل أصفر سميك بينزل من بين شفايفه ووشه بيتغير لملامح مرعبة..ضحك ضحكة خبيثة وقال:
- الوغد ده مش هايعرف يمسكني..ولو حاول..هاقتله..
تابعوا الحلقة 14 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل.
شكرا لثقتكم في المحتوى الي بقدمه ومنورين دايما.
#حصاد_الشيطان
#شيرين _هنائي
Comments
Post a Comment