الحلقة ‏الخامسة ‏عشر- ‏في ‏مكان ‏مظلم

في مكان مظلم

 ( قصة الإستحواذ الشيطاني على الطفل ستيفن سنيديكر وعائلته- قصة حقيقية من ملفات عالمي الشياطين إد ولورين وارن)

الحلقة 15

رجعت كارمن من مشوارها وركنت العربية وجريت على البيت. من ساعة ما جم بنات أختها وهي أعصابها مشدودة. البنتين كانوا قاعدين بره البيت ولورا لافة دراعها حوالين كتف ماري. سألتهم كارمن:

- في إيه مالكم؟

- طنط كارمن، في حاجة فظيعة حصلت..لو ما صدقتينيش مش عارفة هاعمل إيه.

قعدت كارمن لأن أعصابها سابت، وقالت لها:

- قوليلي..أنا هاصدقك.

- إم...ستيفن..إتحرش بماري.

برَّقت كارمن، كانت حاسة إن المصيبة هاتيجي من ستيفن، كان ده متوقع نتيجة تصرفاته الشهور الي فاتت.

- النهاردة الضهر..وإنت مش موجودة..هو ما زودهاش أوي..فاهماني؟ بس أنا لحقته.

- أوكي..أوكي..حاضر......هاشوف..هاشوفه..هو فين؟

- في أوضته.

قامت كارمن ونزلت لأوضة ستيفن، ولقته قاعد كعادته بيرسم وحاطط السماعات في ودانه. شدت السماعات وقال له في حسم:

- إيه الي إنت بتهببه ده؟ إنت خلاص إتجننت؟!

- بهبب إيه؟

- النهاردة..ماري..إنت فاهم قصدي إيه!

ماردش عليها، إبتسم والإبتسامة إتحولت لضحكة.

- خلاص..كده كفاية. ربنا يشهد إننا صبرنا وحاولنا كتير بس إنت زي ما إنت، بتسوء كمان يوم عن يوم..خلاص يا ستيفن..إكتفيت..

طلعت كارمن من الأوضة وراحت على التليفون..

وإتصلت بالبوليس.

_______________________ 

في نفس اليوم، البوليس جه وأخد ستيفن. في التحقيقات إعترف إنه كان بيتحرش بالنتين بلليل وهم نايمين، وحاول إنه يمارس الجنس مع البنت الأصغر لكنه فشل. تم نقله بعد الإعتراف لمركز الحجز وعرضوه على طبيب نفسي.

في القوت ده، كارمن كانت في شقتها، حاسة بذنب غير محتمل. آل هايرجع البيت بليل وهايغضب، كانت شاكة إنه ممكن يفرح لخبر زي ده. لكنها عملت الي المفروض يتعمل.

ستيفن كان محتاج مساعدة بأي طريقة، ودي الطريقة الوحيدة الي تقدر عليها.

أما آل رجع البيت ما غضبش، وما فرحش كمان..قال لها إنها إتصرفت صح وإن تصرفها ممكن يكون الحل الوحيد لإنقاذه.

بعد ايام إتصل الطبيب النفسي بكارم وآل وقالهم إن الولد بيعاني من الفصام، ومنفصل تماما عن الواقع ولازم يتحط تحت الملاحظة على الأقل شهرين في مصحة نفسية لأن وجوده مع عيلته في البيت ممكن يكون خطر عليهم.

إيه الي وصل ستيفن لأنه يكون مريض بالشكل ده؟ إيه الي هم عملوه في تربيته وصله لكده؟! كارمن وآل كانوا هايتجننوا.

إتمنوا إنهم كانوا ودوه لدكتور أول ما بدأ يشتكي من أصوات بيسمعها.

تاني يوم راحوا نقلوه للمستشفى، وستيفن ما نطقش ولا كلمة في الطريق، وأما وصل المستشفى إبتسملهم إبتسامة غامضة وقال لهم:

- دلوقتي مش هابق موجود معاكم علشان يكلمني، هايفضالكم..هايفضالكم كلكم..

شعر آل وكارمن بالحزن لعبارته الي إفترضوا إنها مجازية، وقالها نتيجة حالته..لكنهم كانوا غلطانين..

________________________

18

صائدا الأشباح

في منزل صغير في ليتشفيلد في ولاية كونيكتيكت، كانت سيدة عندها 42 سنة إسمها فلورنس ماك بتطفوا على مسافة كم إنش من على كرسيها الي كانت قاعدة عليه بشكل طبيعي من كم دقيقة. كانت مرعوبها وجسمها مشدود ومتوتر وهي بتبص للي حواليها.

الي كانوا حواليها هم جوزها، ديل، 48 سنة، وبنتها صوفي 21 سنة، وبطعا السيدة النحيلة والرجل الطويل الضخم المدعوين: إد ولورين وارن.

قام إد وارن وطلب من الجميع يبعدوا عن السيدة الطافية ما عدا جوزها، الي إتطلب منه يمسكها كويس، وشاور إد بإيده اليمين، وبصوت جهوري قال:

- بسم يسوع المسيح آمرك أن تترك هؤلاء الناس وترحل إلى حيث جئت.

وقع لوحة من على الحيطة وإتكسرت.. عدد من التماثيل السيراميك الصغيرة طارت من على الرف الي شايلهم وإترمت على الحائط المقابل.

فضل الزوج ماسك زوجته رغم إهتزاز الأرض تحتهم. الأربع مقاعد الي كانوا حوالين الترابيزة إتسحبوا وإتكسروا على النوافذ.

إد كان بيحاول يتفادى الأشياء الي بتتكسر حواليه، ولورين كانت متمسكة بمُسجل صغير بيسجل كل الأصوات. 

رغم الفوضى، أعاد إد عبارته بصوت أقوى وقال:

- بسم يسوع المسيح آمرك أن تترك هؤلاء الناس وترحل إلى حيث جئت.

فضل الإهتزاز مستمر لدقايق، بعدها ساد الصمت.

كل واحد فضل متجمد في مكانه، وأخيرا إلتفت إد للعائلة وقالهم:

- أعتقد إنكم في أمان..

رد السيد ماك وهو لسه حاضن مراته:

- في أمان مؤقتا..أما إتصلنا بكم يا سيد وارن قولنالكم إن طول الوقت ده بيحصل وبيهدا وبيرجع يحصل تاين.

سأل إد لورين:

- حسيتي بحاجة بخصوص الكيان الي هنا؟

- هو أكيد كيان شيطاني يا إد، مش شبح زي ما كنا فاكرين في الأول. وجوده شرير وقاسي وقوي..

شاور إد على المسجل وقال لها:

- سجلتي الي قولتيه؟

- أيوه، لسه التسجيل شغال.

قعدت العائلة تاني حوالين إد وارن وزوجته، بعد ما طلب إد منهم إنتهم يتقلوا لأوضة تانية علشان يسترخوا. وبدأ يسألهم:

- عايز أسأل سؤال مهم في البداية، هل الي بيحصل ده بيكون مُوجهة لك بشكل خاص يا سيدة ماك؟

ماقدرتش ترد عليه، لكنها هزت راسها بمعنها (أيوه)، وكمل جوزها:

- أيوه طبعا..دايما. لكن مافيش حاجة من الي بتحصل دي إذتها.

- فعلا..مافيش حاجة أذتني نفسيا..بس طبعا بترعب.

هز إد راسه في تفهم وقال:

- مفهوم طبعا، لازم تخافي..ده الهدف. هل حد في العيلة لعب بلوحة ويجا أو ورق تارزت، أو أي شيء له علاقة بالأرواح والشياطين؟

- لا أبدا..ولا عمرنا قربنا منها.

بص إد لصوفي، فقالت:

- أنا مش عايشة هنا..بس عموما عمري ما جربت حاجة من الي قولت عليها دي ولا بابا وماما كمان. إحنا عيلة متدينة وعارفين إن الحاجات دي حرام.

- طيب، ممتاز..سؤال تاني..بس رجاء ماتعتبروهوش إهانة لكم، ده سؤال لازم نسأله لكل الحالات الي بتجيلنا.. هل حد فيكم بيتناول خمور أو مخدرات؟!

- لا ابدا.. حتى وإحنا صغيرين ما جربناش الحاجات دي.

- إنتم عايشين هنا من إمتى؟

- تلات سنين تقريبا

بص إد للورين وقال لها:

- تحبي تاخدي جولة في البيت؟!

- ما اظنش..البيت صغير والي شوفته أول ما جينا كافي جدا. إحنا دخلنا لقينا السيدة ماك طافية وكل حاجة بتتكسر، فبالتالي دخلنا في وقت نشاط شيطاني واضح.

- تمام..سيد وسيدة ماك، إحنا هانحتاج نبعت لكم باحثين تبعنا هايقضوا معاكم بعض الوقت. لو مكانش يضايقكم ممكن يباتوا معاكم ليلة أو إتنين علشان يسجلوا الي بيحصل بدقة. بعدها هارجعلكم تاني ومعايا كاميرا فيديو هاسجل حوار معاكم وتحكولي كل شيء من الأول بالتفصيل. هانحتاج إننا نوثق كل حاجة حتى لو تافهة.

- مافيش مشكلة يا سيد وارن.

- الخطوة الي بعد كده إننا نجيب رجل دين، إنت مؤمنين صح؟

- إحنا كاثوليكيين لكننا مابنروحش الكنيسة بقالنا سنين.

- يعني مافيش إعتراض على وجود كاهن معانا؟

- لا طبعا مافيش.

- كويس..علشان في إحتمال نحتاج جلسة طرد شياطين.

سأل الزوج في تردد:

- ممكن تفهمني حاجة؟ ليه الشياطين دي قاصدة مراتي بالذات؟

- الحقيقة أنا معرفش، بس ممكن أما نفتح التحقيق ونسألكم أكتر نلاقي سبب.

إد في القضايا دي بيحاول يكون دبلوماسي، لأن أغلب الناس بتنكر علاقتها بالسحر أو محاولات تحضير الأرواح..إلخ. خوفا من اللوم أو تحميلهم سبب المشكلة. ممكن تكون الزوجة في الحالة دي جربت لوحة ويجا أو وصفةسحريةمعينة بدون علم جوزها، وفتح الموضوع بشكل مباشر أوإستجوابهاممكن يكون محرج لها. إد كان بيفضل دايما الإعتراف ييجي من الشخص نتيجة الحكي والدردشة مش الإتهام.

ساب الزوجين وارن عائلة ماك، وراحوا مقهى صغير قريب علشان يتناقشوا في  القضية.

المكان كان زحمة، وكانوا مضطرين يتكلموا بصوت عالي. قالت لورين:

- إحنا نبعت مايك..عنده خبرة بالقضايا المشابهة واعتقد هايقدر يقوم بالشغل.

- عندك حق.. إنت شايفة إن السبب في الي بيحصل للعيلة دي كيان شيطاني؟

- متأكدة..وهو موجود لسبب معين.

- تقصدي إنهم هم الي حضَّروه؟

- غالبا، طالما مركز على الزوجة. ممكن يكون حضر بسبب حاجة عملتها حتى لو هي مش مدركة خطورتها.

مسك كل واحد فيهم قائمة الطعام، وكملوا قعدتهم كأي زوجين، مابين دردشة وضحك وشوية خناق.

______________________________

(المزيد عن إد وارن وزوجته وقصة حياتهم وطفولتهم في كتاب عالِم الشياطين، وده لينك لقراءة الكتاب:

https://m.facebook.com/story.php?story_fbid=10158466159320929&id=559350928

)

______________________ 

اما إد وارن كان عنده خمس سنين، إنتقلت عيلته لشقة في منزل من طابقين في شارع بريدج بورت، كونكتيكت. الشقة دي كانت البداية الحقيقية لإهتمام إد بالخوارق.. الشقة كانت مسكونة.

كذا مرة إد، أو واحد من إخواته كانوا بيشوفوا أشباح معادية مرعبة. والد إد كان شرطي، وكان بيرفض أي حاجة تخوف أولاده. فكان له تفسير عقلاني لكل حاجة بيشوفوها، لكنه هو وأولاده كانوا عارفين الحقيقة، إن التفسيرات دي مش مقنعة.

جد وجده إد وارن لأمه كانوا ساكنين في الشقة الي تحتهم، وكل يوم أحد، كان جد وجده إد بييجوا يفطروا معاهم، وكان إد بيشعر بالسعادة أول ما يسمع صوت خطواتهم التقيلة البطيئة على السلم، وطرقات عصيانهم وصوت أنفاسهم.

بعد وفاة الجد، الجدة ضعفت وبقت محتاجة رعاية، وكان أم إد بتنزلها وتساعدها. لكن في يوم نزلت أم إد وإتأخرت لحد بليل. 

قبل ما يدخل الأولاد علشان يناموا، سمعوا صوت خطوات على السلم فإفتكروا إن أمهم رجعت. قام إد ونور نور السلم وإستنى أمه في أوضته..لكن صوت الي كان طالع مكانش صوتها..

صوت خطوات تقيلة، خبطات بالعصاية، أنفاس متحشرجة..

صوت جد إد الي مات من كان سنة..وبدون ما الباب يتفتح، سمع إد صوت خطوات جده بتلف في المطبخ.

في نفس الوقت ده تقريبا، لورين كانت بتدرس في مدرسة راهبات، وكانت بتحاول تخفي قدراتها على الإستبصار عن الكل علشان ما تتعاقبش. الراهبات كانوا بيقولولها إن خيالعا واسع مش أكتر، لكن في كل مرة بتأكد فيها معرفتها بشيء محدش يعرفه، أو تتنبأ بحدوث شيء،كانت بتتعاقب وبيتطلب منها تتوب وتبطل كلام عن الإستبصار.

لورين كانت عارفة إنها بتقدر تشوف الهالة الروحانية للبشر، وتقدر كمان تشوف كيانات محدش غيرها بيقدر يشوفها.

اما قابلت إد وارن وهم عندهم 16 سنة، كانت هي الوحيدة الي حبها إد، وكان هو الرجل الوحيد الي كلمته لورين.

( باقي قصة حياتهم في كتاب عالم الشياطين فبلاش نكررها تاني)

_____________________________

19

الظلام يحيقُ بنا

بعد رحيل ستيفن، ظن آل وكارمن إن الأمور هاتتحسن، لكنهم كانوا غلطانين.

زادت عددالمرات الي أفراد الأسرة بيشوفوا فيها حاجات بتتحرك بسرعة، الأصوات زادت وإحساس المراقبة بقا لا يطاق.. الأحداث دي بقت غير قابلة للتجاهل أبدا.

الحقيقة إن بعد رحيل ستيفن، الوضع بقا أسوأ بمراحل.

رغم محاولات كارمن المستمرة في إنها تصالح ماري وتهتم بيا إلا إن البنت كانت مذعورة، وطلبت إنها ترجع لأمها ووعدت كارمن إنها مش هاتحكيلها أي حاجة. 

وماري كانت عند وعدها، وفضلت لورا مع كارمن. في ليلة كانت لورا وكارمن في المطبخ، وستيفاني وبيتر بيلعبوا، ومايكل بيعمل الواجب في أوضته، سمعوا صوت هبدة هزت البيت كله. بعد ثواني سمعوا نفس الصوت وإزاز الشبابيك كان هايتكسر..بعد ثواني حصل نفس الموضوع للمرة الثالثة.

طلع مايكل جري ووقف هو اخواته حوالين آل في رعب.

- زلزال؟

- مش عارف يا كارمن.. بس لا..كأن في إنفجار.

- هم الجيران فوق؟

- لا مسافرين..راجعين بكرة بليل.

- يعني مافيش حد فوق؟

- الصوت ماجاش من فوق..الصوت جاي من جوه الشقة.

خرج آل وهو متعصب، وباقي العيلة ما إتحركوش من مكانهم لحد ما رجع وقال لهم ان مافيش أي مصر في الشقة للصوت.

رن التليفون فراحت كارمن ترد:

- كارمن..انا تانيا..

- تانيا! سمعتي صوت الإنفجار؟

- إنفجار إيه؟

- الصوت الي هز الدنيا..تلات هبدات كده..مش انت بتتصلي علشان كده؟

- لا ماسمعتش حاجة..انا بتصل علشان..بصي انا مش عارفة اقولك ايه، بس كنت واقفة في الشباك ولقيت ست شكلها غريب جدا بتبص من شباك الشقة الي فوقيكم..ست جلدها مخضر ومضيئة!

إنتظروا الحلقة ال16غدا إن شاء الله، ودعمكم مهم جدا وهو الي بيشجعني أكمل، لايك صغيرة بتسعدني جدا.

مرفق صورة إد ولورين وارن الحقيقية وصورة الممثلين الي قاموا بدورهم في الأفلام وغلاف الكتابين الي اترجموا على البروفايل هنا.