الحلقة الخامسة-عالم الشياطين

عالِم الشياطين

سيرة إد ولورين وارِن غير العادية

الحلقة الخامسة

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

قال إد:

- " في حالة تانية نادرة بيكون فيها الشبح مش مدرك انه شبح، وبيحاول يمارس حياته بشكل طبيعي. صورنا راهب في منزل االقس بورلي كان بيفتح كتاب ويقرا فيه. طبعا مش عايز اقولك إن بالنسبة لنا الكتاب كان بيتفتح لوحده! هاقول كم حكاية حصلت لنا وهاحكيلم بالتفصيل إيه ملابساتهم.

عندك مثلا حادث حصل مع أب أرمل وأولاده السبعة. الحادث حصل هنا في أمريكا من كم سنة. الأب كان بيشتكي من وجود شبح أولاده بيشوفوه في بيته، الشبح ده كان شبه زوجته المتوفاه. 

في يوم وفاة الأم، كانت سايقة عربيتها ومعاها والدتها، وراجعين من تسوق هدايا الكريسماس. الثلج كان بدأ ينزل وبدأت الأم تتوتر وتقلق من إنها ممكن ماتحلقش تروح قبل العاصفة. العربية اتزحلقت منها وخبطت في شجرة وماتت هي ووالدتها. برغم إن والدتها رحلت، إلا إن الأم مارحلتش. ليه فضلت وتحولت لشبح؟ لأن آخر حاجة كانت شاغلة بالها إنها ترجع البيت لولادها وجوزها. وده الي عملته بالضبط، رجعت بيتها بس على هيئة شبح. بعد الحادث مباشرة إبتدت حاجات غريبة تحصل مع الأب وولاده، حاجات بتتحرك ومشاهدات للأم في أوقات مختلفة. مع مرور كم شهر، بقا واضح إن سبب الأحداث الغريبة هو الأم. الأولاد بسبب صغر سنهم وحساسيتهم بقا بيشوفوا شبح الأم في هيئة نصف شفافة، وكان بيمارس حياته الطبيعية. بينضف، بيفتح الدواليب ويقفلها، بيسقي الزرع. حتى اما الجو بيكون برد بليل بيشوفوها بتقفل الشبابيك. الست في وضعها الشبحي الجديد مكانتش مُدركة إنها ميتة."

إزاي ممكن الإنسان يبقا مش مدرك ولا واعي لكونه ميت وإتحول لشبح؟

- "تسمع عن الطرف الشبحي الي بنفضل نحس بيه حتى بعد بتره؟ الشخص الي رجله اتقطعت مثلا ممكن يقعد بالشهور حاسس بيها كأنها موجودة بالضبط. في حالة الشبح بقا بيكون الجسم المادي كله مبتور.

في حالة الأم دي، إضطرينا نستعين بوسيطة روحية عندها القدرة على الغشية العميقة علشان تقدر تتواصل مع الشبح. كانت جلسة طويلة جدا، في بدايتها كانت الأم رافضة تماما تقتنع إنها ماتت، بعد ساعات قدرنا أخيرا نقنعها بالحقيقة وإستسلمت لها. وفعلا الظواهر الغريبة توقفت. ساعات كنا بنحس إننا قاسيين أوي معاها علشان كنا مصممين نبعدها عن أهلها، لكن الموضوع مش لعبة ولازم الست دي تعرف حقيقة وضعها لصالح الكل. تخيل إن عيلتها سابوا البيت ومشيوا، أو بعد سنين طويلة ماتوا، هاتفضل هي وحيدة مش فاهمة إيه الي بيحصل وبتتمنى الموت ومش عارفة تموت لأنها بالفعل ميتة! المهم، الموت المأسوي والأوضاع المُعلقة هي أهم عنصر بيمهد الطريق للإنسان إنه يتحول لشبح بعد موته."

التواصل مع الأرواح بيتم عادة بالإستعانة بالقدرات التخاطرية، ودي الطريقة الي إستخدمتها لورين مع الشبح بتاع الأكاديمية العسكرية. مكانش في ضرورة لتجسد جريير علشان يتواصل، لورين تخاطرت معاه مباشرة وأدت مهمتها بنجاح.

التخاطر، وهو قدرة موجودة عند الجميع بنسب متفاوتة، عبارة عن نقل الأفكار من عقل لعقل مباشرة بدلا من نقلها عن طريق تجسد الفكرة بالكلام أو الكتابة أو أي طريقة مادية. 

العقل زي الأذن والعين له القدرة على الإستقبال، بس المخ معقد أكتر بكتير، وله القدرة على التعامل مع المعطيات الي داخلاله بعيدا عن حدود الحواس الخمسة المعروفة. الأشباح بتلاقي إن الحاسة السادسة دي هي أفضل طريقة للتواصل. الي مش مفهوم هنا، إزاي الأشباح الغير مادية دي بتقدر تنقل أفكار للبشر؟

- " الأفكار لها جوهر معين،وجوهرها هو الذبذبات. كل المعلومات الي بتوصلنا عن طريق الحواس بتوصلنا بأنواع مختلفة من الذبذبات. جسمنا زي مايكون طبق إستقبال وفيه مُستقبل خاص علشان يقدر يستقبل الذبذات المختلفة دي. موجات الراديو مثلا مابنقدرش نشوفها، بس الراديو جواه جهاز إستقبال خاص بيقدر يستقبل الموجات دي. كل حاجة في الكون لها ذبذباتها مش بس الأفكار.. لها تردد خاص بها زي تردد قنوات الراديو مثلا. ولأن كل ذبذبة مختلفة عن التانية، المخ البشري بيقدر يفرق بين مصادر الذبذبات دي ومعناها.

المشكلة هنا إن المخ البشري مابيقدرش يفرق مابين الصوت الحقيقي اللي مصدره مادي، والصوت الي بيدي (إنطباع) إنه حقيقي. الإتنين بالنسبة له لهم نفس التردد. لذلك أما شبح يتواصل معاك عن طريق التخاطر تواصله معاك بيكون عبارة عن نقل للذبذبات من عقل لعقل. طبعا لو مُخك تردده مش مضبوط على تردد إستقبال الأفكار الشبحية دي مش هايحصل تواصل."

من خلال الرحلات الفنية الإستكشافية الي قام بها إد ولورين، لقوا إن أغلب حالات الأماكن المسكونة سببها أشباح بشرية. أكتشفوا كمان إنه برغم إن الأشباح دي بتسبب في ظواهر مخيفة، إلا إن نواياها غالبا مابتكونش شريرة. بتحكيلنا لورين عن ظاهرة مختلفة وبتقول:

- "ساعات كتير ناس بتتصل بينا وبتكون مرعوبة ومُستهلكَة تماما من المعاناة الي بيشوفوها بسبب نشاط ماورائي في بيوتهم. كنا بنروحلهم وبنحاول كتير نتواصل مع الكيان الموجود لكن بنفشل. هنا بنعرف إننا في مواجهة كيان تاني بعيدا عن الأشباح البشرية.

الشبح البشري هو كيان سلبي ذو قدرات محدودة، كل الي بيعمله انه يتجسد من وقت للتاني ويحاول التواصل، او بيحاول بس ممارسة حياته القديمة وخلاص. عموما دورة تجسده كالتالي : ظهور، تواصل، زوال. الشبح بيكون وحيد، عنده مشكلة ارضية متعلقة بحياته السابقة. خايف ومتردد أو بالكتير غاضب ومش عايز يتقبل فكرة موته. 

الحالات الي بنشوف فيها تدمير، عنف شديد، تلاعب بالبشر، صدمات.. دي الحالات الي بيكون السبب فيها كيانات مختلفة تماما."

في حالات بيقابلها الزوجين، الإزعاج الوحيد فيها بيكون إختفاء شوية حاجات، او كوبايات بتتكسر. لكن في حالات تانية بيكون فيها تدمير لمحتويات منازل كاملة، كيانات بتهاجم السكان جسديا وعقليا. الزوجين كانوا بيفترضوا في البداية إن المتسبب في الحالات دي مجموعة اشباح بشرية أصحابها كان مخربين أو أشرار أو غاضبين. لكن الافتراض ده مابيبقاش صح على الأغلب. الظواهر القاسية دي بيتسبب فيها كيانات عاقلة، ولها هدف محدد عايزة توصل له. كيانات إيجابية قوية شريرة.

الأشباح البشرية كمان ممكن تتجسد في أي وقت من اليوم، الصبح أو بليل. بينما الظواهر الشريرة العنيفة مابتحصلش إلا في غياب ضوء النهار وبتنتهي ببزوغ الفجر. 

الأشباح بتحتاج جزء من الطاقة الضوئية علشان تقدر تتجسد، بينما الكيانات الشريرة التانية بتظهر بلون أسود تماما وكأنها بتبلع الضوء مش بتعكسه. بتتجسد برضو بخلاف الأشباح البشرية على هيئة كتل كبيرة مالهاش معالم محددة، ودايما الي بيشوفها بيوصفها بأنها كيانات أسود من أي لون إسود طبيعي.

نقطة مقارنة تانية: الأشباح لو إنت خوفت منها بتختفي، بينما الكيانات الشريرة بتتجسد فقط في حالة الخوف الشديد، وبيكون تجسدها مصحوب برائحة كبريت، أو براز بشري، أو لحم متعفن. وساعات بتسيب وراها أثر من الدم أو أي سائل من سوائل الجسم البشري.

تجسدات الكيانات الشيطانية بتكون مصحوبة بإحساسهم بالكراهية والغضب والغيرة، وكل أفعالهم بتكون قاسية وعنيفة وفاسقة، حتى إنهم بيتكلموا بلغة حقيرة وبيتعمدوا إحداث أمور خادشة للحياء أو مؤذية.

وجود كيانات شيطانية بيوضح مع الوقت، وبيتطور الأمر من مجرد إزعاج وظواهر غريبة، لدمار وتدمير للرموز الدينية، وانتشار أكوام من الفضلات وبقع من البول في المكان بدون مصدر. كمان بيعلنوا عن وجودهم عن طريق الكتبات على الحوائط والمرايات بشكل معكوس. وكتاباتهم بتكون كلها كفر وكلام خارج وتهديد.

 بيحكيلنا إد عن موقف قابله وبيقول:

- "أول مرة أشوف الكتابات الغريبة، إفتكرت إن أحد سكان البيت مجنون وبيكتبها بنفسه. حاولت أمسح الكتابات الخارجة دي من على الحيطان والمرايات علشان لورين ما تشوفهومش لأنهم كانوا فعلا مفزعين وقحين، بس فشلت. كل ما كنت بمسحهم كانوا بيظهروا تاني لوحدهم قدام عينيا. طبعا عرفت وقتها إن ده مش فعل بشري، أو من فعل أشباح بشرية.

في البداية كان موضوع الظواهر الشيطانية مش مفهوم تماما بالنسبة لي، وناس كتير أوي مشتركة معايا في عدم الفهم ده. بس فعلا الظاهرة الشيطانية مختلفة تماما عن الظواهر الي الأشباح البشرية متسببة فيها. الشياطين مكانتش بس بتكتب على الحوائط، ساعات كانت كمان بتتكلم بصوت حقيقي مش عن طريق التخاطر. 

أنا ولورين بصراحة عارفين خطورة الكيانات دي، وبنتفادى التعامل معاها من الأساس. وجودنا في مكان مسكون بالشياطين بيستهلكنا نفسيا وجسديا بشكل مروع. برغم إن شغلنا هو محاولة فهم وتوثيق كل شيء عن الأرواح البشرية والظواهر الغريبة، إلا إننا كنا لازم نصادف قضايا لها علاقة بالشياطين من وقت للتاني."

إد وارن حاول طول حياته يحافظ على مسافة بينه وبين الكيانات دي ويدرسها من بعيد بس، ويحاول يساعد الناس المتورطة معاهم بأي دعم نفسي محتاجينه مش أكتر. 

من خلال مراقبة الكيانات الشيطانية، لاحظ إد إنهم بيغضبوا من أي شيء له علاقة بالله. غضبهم ده بيكون مرعب جدا وخطير بالنسبة لأي شخص متخصص في طرد الشياطين.

لكن سؤالي لإد، هل إيمان الشخص بدين معين بيؤثر على تفسيره لوجود الشياطين دي؟ وهل الشخص المؤمن بالخوارق معرض أكتر لأنه يقابلها؟

- " كلامك يبدو منطقي جدا. مافيش شيء حوالينا ما بيتأثر بإيماننا. انا مش شايف إن ضروري أي إنسان يعرض نفسه لإحتمالية تعامل مع كيانات زي دي تحت أي مُسمى. أنا ولورين مش مضطرين للتعامل معاهم، ومش بنتقاضى أي أجر على شغلنا ده، بس فزع الناس الي بتواجه المشاكل دي، والإيذاء الي بيتعرضله الأطفال بيخلينا مضطرين نتعامل معاهم. إستدعائنا بيتم بعد ما الأمور بتسوء وبيكون دورنا محاول دراسة الوضع وتقديم حلول منطقية، وطلب المساعدة من متخصصين في طرد الشياطين. لذلك، فإيمان الشخص بالخوارق من عدمه مابيمنعش حدوثها لكنه بيأثر طبعا على محاولات تفسير لغز عظيم زي ده.

الناس غير المؤمنة بالأديان عموما بتحاول تُرجع الظواهر دي لكونها ظواهر طبيعية حد بيعملها أو لها تفسير فيزيائي، أو بينكروا حدوثها بشكل عامة. الناس دي ماشافتش أي ظاهرة من النوع ده بنفسها وإلا مكانوش تمسكوا برأيهم الحاد ده. كل شيء ممكن يتفسر بشكل علمي أو روحاني لو العلم فشل في تفسيره والمشاهدات أكدت إن له بُعد خوارقي.

لو إنت ماشي بره منزل مسكون وما إديتش نفسك فرصة تدخل أو تسمع من الي جوه، عمرك ما هاتشوف الي بنشوفه. إحنا بنقابل ناس مرعوبة ومنهارة، هدومهم مقطعة وعفشهم محروق ومخنوقين من ريحة الكبريت أو الفضلات، بيعانوا من أصوات عويل وصراخ صادره من كل مكان، ومش عارفين يخرجوا من المكان أصلا..ناس مُحاصرة. الحالات الي بنشوفها بيفشل العلم في إيجاد تفسير مُقنع ليها.. إيه تفسيره للأشياء الي بتطير، والعفش الي بيتحرق قدام عينيك؟ لازم المواقف دي تتشاف علشان الشخص المتشكك يقدر يحكم بنفسه. وإحنا قبل أي تحقيق بنحاول قدر المُستطاع نستبعد أي تدخل بشري أو خدعة في الموضوع."

الزوجين من خلال أبحاثهم، لقوا إن الظواهر الشيطانية بتحصل على مراحل. في البداية النشاط الماورئي بيكون بسيط مشابه لنشاط الأشباح البشرية لحد ما الكيان الشيطان يثبت نفسه في المكان، بعدها بيبدأ يختار ضحاياه بدقة..

إزاي الكيانات دي بتختار ضحاياها؟ وإيه هي التلات مراحل للإستحواذ الشيطاني؟ تابعونا في الحلقة السادسة وأشهر قصة للزوجين وارن، قضية الدمية أنابيل كاملة، وبتفاصيل مش موجودة في الأافلام الي إتعملت عنها.

تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.

الحلقات بتنزل بالترتيب في صفحتي الرسمية علشان الي حابب يقراها كلها بدون ما بوستاتس الشخصية تقاطعه.

#إد_لورين_وارن

#عالم_الشياطين

#شيرين_هنائي