الحلقة الأخيرة- عالم الشياطين

عالِم الشياطين

سيرة إد ولورين وارِن غير العادية

الحلقة 26 والأخيرة

قضية آل بيرون

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

سألت إد وارن إيه علامات الإستحواذ الشيطاني، والي مش موجودة في حالات الخلل النفسي والعقلي، فجاوب:

-"1-  إن الشخص يعرف بعض أحداث مستقبلية غير معروفة ويصرح بيها أثناء حالة الإستحواذ.

2- الشخص المُستحوذ عليه يتكلم بلغات غير معروفة له طول حياته ويكون كلام ملتزم بقواعد اللغة مش أي كلمات متناثرة.

3- إن الشخص يبقا عنده قوى بدنية وقدرات عقلية غير موجودة في البشر.

4- إن الشيطان المستحوذ على الأنسان يعلن عن نفسه عن طريق كسر لقانون طبيعي أو تلاعب فيه.

لو علامة أو أكثر ظهروا على شخص، ده بيلفت نظرنا لوجود شيء غير طبيعي، وبنبدأ مرحلة التحقيق والـتأكد والتسجيل بعدها بغرض تحويل الحالة للكنيسة.

كل دين له طقوسه الخاصة بطرد الشياطين. ربما يخيل للبعض إن الطقوس دي قديمة ومابقاش حد بيمارسها، لكن بأكد لك إن في أمريكا الشمالية لوحدها أقيم أكتر من 600 طقس لطرد الشياطين ما بين سنة 1970-1980.

في الأديان الأخرى غير المسيحية، هاتلاقي إن مش أي رجل دين برضو يقدر يقوم بطقس طرد الشياطين، لازم يكون دارس وشخص قوي الإيمان وأعصابه قوية. في اليهودية، بيقوم الكاهن المختص بقراءة بعض أجزاء من التوراة على المستحوذ عليه، وبيكون معاه عشر رهبان تانيين من المعبد.

لكن حتى بعض أتباع الديانات الأخرى بيلجئوا لطارد شياطين كنسي، يمكن لأن المسيح نفسه مارس الطقس ده، أخرج الشياطين من الأجساد وأعاد الحياة للموتى!

موثق إن المسيح مارس الطقس ده و مُسجل في إنجيل لوقا:

(الذي يسمع منكم يسمع مني، والذي يرذلكم يرذلني، والذي يرذلني يرذل الذي أنزلني. فرجع السبعون بفرح قائلين: يارب حتى الشياطين تخضع لنا بإسمك، فقال لهم رأيت الشيطان ساقطا مثل البرق من السماء. ها أنا اعطيكم سلطانا لتدوسوا الحيات والعقارب وكل قوة العدو ولا يضركم شيء. لكن لا تفرحوا بهذا أن الأرواح تخضع لكم، بل إفرحوا بالحري أن أسماءكم كتبت في السماوات.)

أنا إشتغلت مع رجال دين من أغلب الأديان، ولاحظت إن أغلبهم سنهم مابين 40-80 سنة، وأهم حاجة شوفتها فيهم هي التواضع والتعاطف مع ظروف الناس وهمومها، وبيحملوا طبعا ألقاب مختلفة حسب ديانتهم..كاهن.. قس..راهب..شيخ..يوجي..لكن كلهم بيحملوا شيء من الحكمة والطيبة والتعاطف الي مابشوفهومش في الناس العادية، وده منبع الطاقة الإيجابية الي بتقويهم وتساعدهم على محاربة الشياطين.

طقس طرد الشياطين بيقام الصبح من أول الشروق لحد قبل الغروب، وممكن يقام في بيت أو مكان مقدس أو مستشفى تابعة للكنيسة في الحالات الي ممكن تحتاج رعاية طبية أو مهدئات أو تغذية..إلخ.

قبل يوم أداء الطقس، رجل الدين بيعد نفسه روحانيا عن طريق الصيام والصلاة والإعتكاف لمدة 3 أيام على الأقل. كمان لو الرجل الدين بيشتغل مع مساعدين، فهم كمان بيخضعوا لنفس فترة الإعداد.

الضحية يوم الطقس بيلبس ملابس واسعة وخفيفة وينام على السرير في أوضة خالية من الأثاث ومن أي شيء ممكن يتفك أو يطير أو يتحرك. ممكن بس نحتاج حاجة نحط عليها شموع و الكتاب المقدس وأي أشياء مباركة ممكن نحتاجها.

أنا كعالم شياطين دوري في الطقس هو المساعدة والملاحظة فقط. رجل الدين هو الي بيتحمل الطقس وتبعاته بالكامل.

في طقوس بتمشي بسلاسة طبعا، لكن الأأغلب بيكون فيه أهوال..بداية من ثورات الشيطان والأصوات الغريبة المخيفة الي بصدرها عن طريق الضحية، مرورا بالتعدي بالضرب والخنق على مؤدي الطقس، وصولا لتقطيع جسد الضحية ورفعها للأعلى ولوي جسمها أو إصابتها بحروق أو جروح غائرة.

في حالة لطفلة عندها 13 سنة كان مستحوذ عليها جاثوم، شوفنا آثار عضة بتظهر تدريجيا على دراعها، آثار عضة حيوانية بينزل منها لعاب مقزز بتخترق الجلد. شوفت شياطين بتنفخ جسد الضحية لضعف حجمها لحد ما الجلد بيتشقق وينزف. كل الآثىار دي بتختفي تماما لو غادر الشيطان جسم الضحية.

في قضية شهدتها سنة 1977، إستحواذ جماعي حصل لعدد من الراهبات والرهبان في الفاتيكان! كان الرهبان بيتقيئوا مسامير وزجاج مكسور وفضلات حيوانات. أنا شوفت الحالات المسجلة على شرائط فيديو بس لكن مكانش مسموح ليا بفحص أكبر.

بس ممكن أحكيلك قضية شهيرة جدا، وهي قضية آل بيرون.

سنة 1971، عائلة بيرون إنتقلت لمنزل ريفي مكون من 14 حجرة في مزرعة في هاريسفيل، رود آيلاند. الأم كارولين والأب روجر وخمس بنات بدؤوا فورا في ملاحظة أشياء غريبة بتحصل بمجرد سكنهم في البيت.

الموضوع بدأ بحاجات تافهة، كارولين كانت بتلاحظ إختفاء مكنسة أو بتلاقي مكانها متغير لوحده..كانت بتمسع صوت إحتكاك في أدوات الطبخ بدون مصدر.. كانت بتلاقي اكوام تراب أول ما تخلص تنضيف.

أما البنات فكانوا بيلاحظوا وجود أطياف بتدور حوالين اليبت، بس مكانش حد من الأطياف دي بيعمل حاجة أكتر من مجرد المرور.

كارولين سألت عن تاريخ البيت، وعرفت إنه كان مملوك لعائلو واحدة لتمن أجيال، وإن في أشخاص من العائلة ماتوا في ظروف غامضة أو قاسية. عدد من أطفال العائلة دي غرقوا لوحدهم في بحيرة قريبة، وواحد من العيلة مات مقتول، وعدد كبير منهم شنقوا نفسهم جوه البيت!

إكتشفت كارولين كمان إن في سيدة إسمها بيتشيبا كانت عايشة في البيت ده، وكانت بتمارس عبادة الشيطان، ولقوا قبرها في مكان قريب في المزرعة. في زعم إن السيدة دي كانت السبب في قتل وغرق عدد من الأطفال المذكورين.

بدأت بعد كده حركة غريبة ورائحة لا تطاق تفوح في البيت مع برودة بعض الأاماكن فيه. كان واضح كمان إن الأصوات والروائح متمركزة أكتر في البدروم الي كانت أرضيته ترابية مش متبلطة.

مع الوقت، بدأت كارولين تلاحظ عضات وخدوش في جسمها، وساعات كانت بتفقد الإحساس بالوقت أو بيعدي وقت وهي مش مدركة هي عملت فيه إيه.

أثناء الأحداث دي، كنت أنا ولورين في جولة في رود آيلاند مع مجموعة من الباحثين، وتواصل معانا روجر علشان نيجي نشوف مزرعته."

بتبتسم لورين كأنها إتفكرت حاجة وبتكمل كلام إد:

-" دي القضية الوحيدة الي إضطردنا منها!

روحنا في زيارة للمكان، وحكيتلي كارولين إنها بتشوف سيدة طويلة لابسة رمادي بتمشي في المكان، وساعات كانت بتشوفها متعلقة مشنوقة قدام البيت.

كلامها أقنعني فورا لأني حسيت بعدد كبير من الكيانات في المكان ومنهم عشرات الأشباح البشرية لأطفال. بسبب تعدد الكيانات الموجودة، إقترحت أعمل جلسة أستحضار وأحاول أتواصل مع أي كيان بشري موجود علشان نقدر نوصل لخيط يوصلنا لمعلومات.

بيتنا مع العائلة يوم، والصبح قعدنا كلنا حوالين ترابيزة، وكانت كارولين قاعدة قيرب مني، وبدأت أدخل في خالة الغشية..لكني إترعبت فورا وحاولت أتراجع لأن الي كان بيحاول يتواصل معايا كان شيء شرير جدا وغاضب.

فتحت عينيا لقيت الحضور كلهم واقفين بعيد، وكارولين طايرة هي وكرسيها عن الأأرض، وإبتدت تتلكم بلغات غريبة جدا وكل حاجة حوالينا كانت بتتهز.

حاول إد يتكلم مع الكيان الي حضر، وكان واضح إنه مستحوذ فعليا على كارولين، لكن الكيان كان بيتكلم بلغة غريبة ومصمم عليها. وإبتدت كارولين ترجع لوعيها لحظات وتصرخ، لكن الكيان كان بيرجع ويستولي عليها تاني.. مر حوالي ربع ساعة على الوضع ده، ونزل الكرسي مكسور على الأأرض وفاقت كارولين وهي مش فاكرة اي حاجة.

هنا تدخل روجر بيرون وطردنا لأنه ظن إننا السبب في اللي حصل مع زوجته! 

إحنا طبعا مشينا، هم حرين تماما. بعدها عرفنا إنهم فضلوا عايشين في البيت عشر سنين لحد ما أحوالهم المادية إتحسنت، وإتنقلوا لبيت تاني. بس للأسف الكيانات دي إنتقلت معاهم، وإتوفت كارولين بعد إنتقالهم مباشرة بس محدش حكى تفاصيل وفاتها. وفضلت الأشباح ملازمة باقي أفراد الاسرة"

كملت لورين ضحك، وبدأ إد يضحك معاها.. سألتهم لو في حاجة تاني مضحكة حصلت لهم. ردت لورين:

- " آه طبعا في  حاجات كتير مضحكة..مرة كان عندنا صحابنا وزمايل لنا وكنا مشغولين جدا والتليفون فضل يرن بشكل مستمر، خوفت يكون في حد في مشكلة مستعجلة. رفعت السماعة ولقيت سيدة بتقول لي وهي متنرفزة وزهقانة:

- إنتي لوريين ويرن؟ او وارن..أو ايا كان يعني؟

- أيوة أنا لورين وارن..ممكن إسم حضرتك لو سمحتي؟

- آه طبعا.

- أيوه إسم حضرتك إيه؟

- سيليا هايدن.

- طيب يا فندم في حاجة ممكن اساعدك فيها؟

- أمال أنا بتصل بك ليه؟ هو إنتي البصيرة الي بتطلع في الراديو؟ كنتي بتتكلمي عن عفاريت وجوزك شيطاني باين.

- هو كلامك تقريبا صح، انا مستبصرة وجوزي عالم شياطين. اقدر اساعدك إزاي يا سيليا؟

- بصي يالورين الموضوع خطير. فعلا في مشكلة غامضة جدا هنا..هو..إنت متأكدة إنك نفس الست الي كانت في الراديو؟ الي هي كانت بتحكي عن العفاريت وكده.

- أيوه أنا و الله..حضرتك قوليلي بس إيه هي المشكلة الغامضة علشان بس معايا ناس وبنشتغل.

- ياريت بقا يكون عندك وقت لمشكلتي..

- هافضيلك وقت..إتفضلي.

- ماشي..أنا حطيتهم هنا فوق البوتوجاز يا لورين..أنا دايما بحطهم هناك قبل ما آكل ودلوقتي مش لاقياهم..إختفوا!

- إيه الي إختفى؟

- طقم الاسنان! دايما بحطهم فوق البوتوجاز وكده يبقا فيه عفريت ولا بتاع شيطاني الي بتقولوا عليه ده أخدهم..أنا دورت فعلا مش لاقياهم.

بدأت أضحك وأغطي السماعة ومش عارفة آخد نفسي! المهم قولتلها:

- لا دي مشكلة فعلا.

- إنت بتضحكي؟ هه؟ بتضحكي؟ آكل إزاي أنا دلوقتي؟

- سيليا..بصي أنا عارفة طقم الأاسنان فين..مش انا مستبصرة؟

-فين؟

- مدي صباعك السبابة كده قدامك..

- حاضر..اهو..

- حطي بقا الصباع ده في بُقك وعُضي عليه بالراااحة..أهو شوفتي..الطقم في بُقك من الأول!

الست سكتت شوية وفجأة صرخت:

- يالهوي! إنت فعلا عرافة! لازم اقول لإيريني على الموضوع ده!

وقفلت السماعة علشان تحلق تقول لإيريني..طبعا صوتها كان باين إن مخارج الحروف مضبوطة، يبقا أكيد لابسة الطقم أمال بتتكلم كويس إزاي! "

ضحكنا كتير..و إتمنينا تكون كل القضايا بالخفة دي!

فعلا..إد وارن ولورين وارن عاشوا حياة حافل، غير عادية، ساعدوا وألهموا ناس كتير، ,أضافوا أكتر لعلم الشياطين. أيا كان رأيك فيهم، فمحدش يقدر تجاهل وجودهم أبدا.

__________________ 

توفي إدوارد وارن سنة 2006 بأزمة قلبية، وتوفيت لورين وارن سنة 2019

في سلام أثناء نومها. دفن الزوجين في مدافن عائلة وران في قبرين متقاربين، ولحد النهاردة بيروحلهم مئات الزوار، وبيحاول بعض المجانين إستحضار روحهم بإستخدام لوحات ويجا!

شكرا لمتابعة ترجمتي للكتاب وأتمنى أكون عند حسن  ظنكم.

تحياتي ومحبتي

شيرين هنائي.