الحلقة الثانية- عالم الشياطين-سيرة إد ولورين وارن غير العادية.

عالِم الشياطين

سيرة إد ولورين وارِن غير العادية

الحلقة الثانية

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

الي واجههة إد ولورين وارِن في أولى ساعات صباح اليوم ده مكانش شبح. وكمان مكانش كيان هم بس الي شافوه، كان في عدد كبير من الناس في أزمنة متفرقة بلغوا أنهم شافوا نفس الكيان الأسود الشبيه بإعصار.

الي شافوه شيء أكثر شؤما من مجرد شبح، دي ظاهرة ماورائية بيسموها تجسد لكيان شيطاني غير بشري، خارق. الكيان غير البشري بيكون مشحون بطاقة شيطانية سلبية ذكية، بيقودها غضب عارم تجاه الله والإنسان.

كينونة الكائن ده وقدراته ونواياه هم أساس علم الشياطين.

لحد وقت الحادث ده، كان إد ولورين بشتغلوا في الخفاء، ومش بيدوروا على أي شهرة أو ثراء من شغلهم ده. كانوا بيشتغلوا مع متخصصين لتقصي حالات المواجهة الحقيقية مع كيانات شيطانية. ودايما هاتلاقيهم في مكان أي حادث غريب بيحصل.

الزوجين وارِن بدئوا في تقصي الوقائع الماورائية في منتصف الأربعينات، وفضلوا في الضل تماما لحد منتصف السبعينات.

مثلا، في سنة 1972، ظهر شبح خادم من القرن التاسع عشر لمشرف الخدم في قصر ريفي في ويست بوينت، وبدأ في التحرش بضيوف القائد العام للجيش، صاحب البيت.

وكان الجيش نفسه هو الي تواصل مع إد ولورين وارِن لمواجهة الكيان العنيف ده وطرده. وهانحكيلكم حصل إيه مع الجيش في صفحات تالية من الكتاب.

وفي أوائل سنة 1974 ابتدا ظهور الزوجين بشكل علني أكثر، وكان بيرافقهم دايما طارد أرواح وهو الي بيقوم بالطقس الروماني الكاثوليكي لطرد الكيانات الشيطانية. في نفس السنة حصلت حادثة شائعة لحالة أشباح صاخبة في نيوإنجلاند، وإبتدا الناس يعرفوا إد ولورين أكتر خاصة بعد تدخلهم في قضية "رعب أميتيفيل" الي ذكرنها قبل كده.

الغريب إن إد ولورين كانوا شخصين عاديين جدا، مش بينتموا لأي طائفة غريبة ولا بيمارسوا أي طقوس غير الصلوات الي كل الناس بتمارسها. غير أنهم كانوا بيفضلوا دايما يكونوا بعيد عن الأضواء ويركزوا في شغلهم وفي دراستهم.

إد إتولد 1926، وكان مظهره دايما بيديك إيحاء أنه جارك البقال مش عالِم شياطين أبدا. أما لورين، فإتولدت في مكان يبعد عن شريك حياتها المستقبلي بكام ميل بس، سنة 1927. كانت نحيفة وجذابة وتحسسك أنها ست بيت أنيقة. مش هاتقدر تخمن أبدا انها عندها القدرة على الإستبصار والوساطة الروحية، ودول هبة من ربنا ماسعيتش إنها تتعلمهم.

السؤال الي كان بيتسئلوه دايما، وأكيد إنتم كمان بتسألوه، إيه الي حصل في أمتيفيل؟ إجابة الزوجين إتأخرت لحد سنة 1978 لحد ما أقاموا محاضرة علنية في مبنى البلدية في مسقط رأسيهما في مونرو. القاعة كانت مليانة عن آخرها والناس كانت واقفة في الممرات أو قاعدة على الأرض. وكل الحديث الي كان سائد قبل المحاضرة كان عن الأرواح والأشباح والشياطين.

أخيرا، إد ولورين طلعوا على المسرح، وقال إد:

- "دلوقتي بس، أقدر أشارككم بعض تحقيقاتنا في منازل مسكونة، وخاصة منزل أمتيفيل حديث الصحافة من فترة بسيطة. هانحكيلكم بعض المواقف والأهم، هانشرحلكم بعض مباديء وأسس علم الشياطين علشان نقدر نفهم اللي بيحصل حوالينا."

شاور إد لشخص معين، فبدأت الصور تتعرض على البروجيكتور وسط ذعر الناس وتخوفهم من الي هايشوفوه.

- "في الصور دي، هانشوف منزل مسكون بالفعل. الست اللطيفة الي في الصورة دي هي ببساطة شبح!"

محاضرات الزوجين ماكانتش محاضرات لحكاية قصص مرعبة، كانت بتهدف عموما لتبسيط علم الشياطين علشان الناس تعرف إن أغلب مشاهداتهم الغريبة في الواقع مش غريبة، ولها تفسير علمي عادي بعيدا عن الشياطين. وإن بالفعل في بعض الوقائع اللي بتؤكد وجود الخوارق وبيحاولوا يشرحوا للناس ليه الوقائع دي بتحصل وإزاي.

-"مسألة وجود اشباح مش مسألة إيمان بوجودهم بس، وجودهم هو دليل على شيء ما. السؤال المهم هو ليه تجسدات الأشباح بتظهر؟ وليه بتتدخل في حياة البشر؟"

السبب الي خلا الزوجين وارن يعملوا المحاضرات دي بيرجع لعشر سنين فاتوا، أما باب الخوارق الي كان مقفول من قرون إتفتح مع إهتمام الناس فجأة بالسحر والغوامض كموضة من موضات الستينات، أعقب الإهتمام ده تزايد كبير في عدد الظواهر الغامضة. ومن هنا بدؤوا في التفكير في طريقة يوصلوا بها للناس خطورة الممارسات دي عن جهل، لأن أغلب المتضررين كانوا في سن الشباب الجامعي. فأقام الزوجين عدد من المحاضرات في الجامعات بتحذر الشباب من خطورة التعامل مع الكيانات الماورائية واستخدموا الأفلام الوثائقية والصور والتسجيلات الصوتية الحقيقة لبيان خطورة الممارسات دي. بعدها ظهر إد في عدد من البرامج التليفزونية والإذاعية لنفس الغرض، وطبعا قوبل بترحيب وإنتقاد في نفس الوقت، لكن الإنتقادات ماكانتش بتصمد كتير قدام الأدلة المرئية والمسموعة الي كانوا بيعرضوها.

نرجع لمحاضرة مبنى البلدية. بعد الإنتهاء من عرض الصور، إبتدت أسئلة الجمهور لإد ولورين. قام رجل كبير في السن لابس نظارة وقال لإد:

- " أنا في سن والدك يا إد وارن، لكن عمري ما قابلت أي ظاهرة غريبة من الي بتتكلموا عنها دي. إنت شوفت شبح بنفسك؟ شوفت بعينيك الحاجات الي بتطير لوحدها الي في الفيديوهات دي؟"

- " أنا شوفت فعلا عدد كبير من تجسدات الأشباح، والكيانات الي انتم شوفتوها على الشاشة النهاردة كلها من تصويري أو من تصوير مصور للخوارق بيشتغل معايا. السنادي هانسافر إنجلترا علشان نوثق ظهور السيدة البُنية في قاعة رينهام، شبح الليدي دوروثي والبول، من أشهر أشباح إنجلترا. مكان ظهورها مش بعيد عن منزل القس بورلي، أكثر الأماكن المسكونة شهرة في العالم. أنا ولورين شوفنا الراهبة الي بتسكن المكان وكانت ماشية في الطريق. في زيارتنا الجاية هانحاول نصورها. بالنسبة للأجسام الي بتطير من تلقاء نفسها، أنا شوفت الظاهرة دي بكل أشكالها، والي في الصور كانت نتيجة نشاط شيطاني مش شبحي. في القضية الي صورت منها الصور دي، شوفت تلاجة وزنها 400 باوند بترتفع في الهوا لوحدها، وفي قضية تانية شوفت مكتبة بتطير وتقع على الأرض بعنف لدرجة زلزلت المكان. عموما، أغلب حالات الإرتفاع الذاتي بتكون بسبب الكيانات غير المرئية سواء كانت من أصل بشري أو شيطاني. لذلك، وكإجابة عن سؤالك، أيوه أنا شوفت أشباح وشوفت ظاهرة الإرتفاع الذاتي."

سيدة شقراء سألت إد:

- "في الكتاب الي إتعمل عن قضية رعب أمتيفيل، الكاتب ذكر إن الأشباح مابتقدرش تعدي فوق الأسطح المائية. هل ده صحيح؟

- " لا مش صحيح، دي خرافة قديمة. الكيانات الماروائية ما بتتأثرش بالحدود المادية أو بالمسافات."

شاورت لورين لمراهق قاعد في الصف الأول علشان يقول سؤاله التالي:

- " يعني إيه خوارق؟"

- "لو دورت على الكلمة دي في القاموس، هاتلاقي إن معناها (ظواهر يحدثها الله وملائكته). لكن الحقيقة المصطلح نفسه مابقاش بيستخدم بالمعنى ده. الخوارق دلوقتي بقت بتشمل أي ظاهرة مسببها كيان لا ينتمي لعالمنا المادي. أي ظاهرة بيتسبب فيها كيان غير بشري هي ظاهرة خوارقية أو ماورائية. فخلينا نقول إن الظواهر الخوارقية الخيرة من صنع الله وملائكته، أما الظواهر الشريرة فمن صنع الشياطين."

شاور إد لسيدة وسط الزحمة علشان تسأل، فرفعت راسها لفوق وقالت:

- " لو أنا مُت بكرة مثلا، هل هابقا لشبح؟"

- " إحتمال، بس مش بالضرورة أي حد يموت يبقا شبح. لكن لو موتي بشكل عنيف ومفاجيء، في حادثة مثلا، وماقدرتيش تتقبلي فكرة إنك موتي، هايكون في إحتمال إنك تفضلي مرتبطة بالعالم المادي لحد ما تتقبلي فكرة الرحيل. في الوقت الي هاتاخديه لحد ما تتقبلي الموضوع هاتفضلي مرتبطة بكل مكان أو شخص مألوف لك ومش هاتحسي إن في شيء إتغير. هاتقدري تشوفي وتسمعي عيلتك، لكنهم مش هايقدروا يسمعوكي أو يشوفوكي. طبعا ده هايخليكي تتسائلي عن السبب الي مخليهم مش بيتواصلوا معاكي، وهاتدوري على طريقة تجذبي بيها انتباههم. مع الوقت هاتلاقي أن ابسط طريقة هي انك تحركي الحاجات الي حواليهم، او تخبطي على البيبان. لكن كل الي هاتعمليه ده هايرعبهم وهايخليهم يدوروا على إد ولورين يلحقوهم! هانحاول نتواصل معاكي ونقنعك بحقيقة وضعك، وهانساعدك تتقبلي وتستسلمي لفكرة الموت والرحيل."

- " إزاي دخلتم قضية أمتيفيل؟ وايه الي أضفتوه للقضية غيركم ما قدرش يضيفه؟"

ردت لورين بأن سؤاله طويل وإجابته بالتالي هاتكون طويلة، لكن السائل مكانش عنده مانع يسمع. قالت لورين:

- " تدخلنا في القضية بدأ في فبراير 1976، اما جاتلنا مكالمة هاتفية من منتجة تليفزيونية من نيويورك، وسألتنا لو كان عندنا وقت نبص على قضية البيت المسكون في لونج آيلاند. قولتلها اننا هانحتاج تفاصيل أكتر قبل القبول أو الرفض. حكتلنا بإختصار عن الشاب الي قتل عيلته وزعم انه كان تحت تأثير شيطاني، وعن عيلة لوتز الي تعرضت لأحداث شيطانية مفزعة وهربت من البيت في نص الليل. تحقيقات الشرطة والجهات المختصة بالمارورائيات ماوصلتش لحاجة، وسألتني لو ممكن نعمل جلسة تحضير ارواح ونشوف لو أن في أرواح أو شياطين ورا الظواهر دي. قولتلها إننا ممكن نبص على البيت، ونأجل مسألة الجلسة دي لوقتها، فوافقت فورا.

روحنا لونج آيلاند وقابلنا جورج وكاثي لوتز لأول مرة وكانوا مقيمين في بيت والدة كاثي. قابلناهم هناك لأنهم كانوا رافضين تماما الإقتراب من بيتهم، وإدونا المفاتيح. ما اتكلمناش كتير مع آل لوتز علشان نفضل محايدين ومانتأثرش بآرائهم. طبعا مش بنتهمهم بالتدليس أو الجنون، لكننا كنا بنحاول نلتزم بالعلم قدر الإمكان. سألناهم بس كم سؤال علشان نقيس مدى وعيهم وطريقة تفكيرهم، وكانوا ناس عاقلة جدا..ناس مرعوبة جدا! جورج طلب مننا طلب واحد، إننا لو قدرنا ندخل البيت ياريت نجيبله عقد الشراء من الدولاب، وطبعا وافقنا وطلعنا على طول على البيت.

البيت كان جميل جدا. إد ركن العربية قدامه ودخلنا البيت سوا. كل الي شوفناه لأول وهلة هو مجرد بيت مهجور وكل حاجة متسابة مكانها، حتى الأكل كان لسه على السفرة مكانه وجرايد من منتصف السبعينات مرمية على الترابيزة. دواليب المطبخ والتلاجة كانت مليانة أكل ومعلبات. الغسيل كان متطبق ولسه ما اتحطش في مكانه. حتى المجوهرات والفلوس كانوا في مكانهم على التسريحة في أوضة النوم. كل ده أكدلنا إن الناس دي مش مُدعية ولا نصابة. كل ممتلكاتهم وعقد شراء البيت هنا.

غادرنا البيت وجهزنا لعمل جلسة إستحضار، وكلمنا فريقنا المختص وجبنا الكاميرات ومسجلات الصوت. كنا 17 شخص. منهم تلات وسطاء روحانيين؛ أنا وأتنين ثانيين. قبل ما نبدأ الجلسة، إد بدأ في إستفزاز الكيانات الموجودة ببعض الطقوس الدينية. وهي دي الطريقة الي بنعرف بيها لو في وجود شيطاني في المكان. الكيانات دي بتُستفز من أي رموز دينية لكننا مانقدشر نتنبأ برد فعلها بالضبط."

كمل إد القصة وقال:

- " كان رد فعلهم يومها عنيف جدا. حسيت ساعتها بخفقان شديد في قلبي إستمر تلات أسابيع بعد الجلسة. اكتر من نصف المشاركين حسوا بإضطرابات جسدية مختلفة، بس قدرنا نسجل نشاط خوارقي غير عادي نتيجة وجود كيان غير بشري."

سألت سيدة من الحضور:

- " انا سمعت إن القس المذكور في كتاب رعب أمتيفيل مكانش موجود في الحقيقة."

- " القس المذكور حقيقي وهو صديقنا، لكن مش كل المذكور في الكتاب من وقائع حصلتله، الي حصله كان أكثر بكتير والرجل عانى بشكل مش طبيعي بسبب تدخله في القضية دي."

أخيرا، شكرالزوجين وارن الحضور لكنهم ما قدروش ينهوا المحاضرة لأن الناس بدأت تلتف حواليهم ويحاصروهم بالأسئلة. 

- " إزاي بتعرفوا أن التواجد الخوارقي تواجد شيطاني مش شبحي؟"

- " في البداية ساعات مابنبقاش قادرين نعرف الفرق بين التواجد الشيطاني والشبح الغاضب. الإثنين ممكن يكونوا مؤذيين جدا، وساعات كمان بيكون في تعاون بين الأشباح دي والكيانات الشيطانية الموجودة في نفس المكان. لكن الكيانات الشيطانية هي الوحيدة الي بتقدر تعمل تأثيرات حادة زي إشعال الحرايق والإنفجارات والإخفاء والنقل ورفع أجسام كبيرة في الهوا. في حالات الإستحواذ الشيطاني الكيان بيفصح عن نفسه بشكل مباشر وفي بعض الأحيان بيقول إسمه كمان. لو سمعت تسجيل لشخص مُستحوذ عليه هاتقدر تفرق بسهولة بين الكيان البشري والغير بشري."

- " طيب ليه ما عرضتوش تسجيلات زي كده في المحاضرة؟"

- " كنا متعودين نعرض التسجيلات دي على الحضور، لكن ده أكبر تجمع وقفنا قدامه وكانت هاتبقا مخاطرة لو حد فيكم إتأثر بشكل أو بآخر بالتسجيلات دي أو حصل حالة فزع عامة. عموما سماع ومشاهدة التسجيلات الحيقيقة بيأثر سلبا على بعض الناس."

فضل الناس تسأل لمدة ساعة كمان قبل ما الزوجين يقدورا يروحوا بيتهم. لكنهم كانوا متعودين على كثرة الأسئلة، وده كان الهدف من المحاضرات دي، التوعية والإجابة على التساؤلات. طبعا كان في تشكيك من البعض وزعم بأن كل ده نصب. وكان رد إد:

- "مافيش إنسان أيا كان ميوله وتفكيره بينكر وجود أمور مالهاش تفسير في العالم. لكن برضو مافيش إثبات قاطع بيؤكد وجود كيانات ماورائية أكتر من تكرار الظواهر الغريبة. في بيوت مسكونة في كل أنحاء العالم، في ظواهر غريبة مالهاش تفسير."

في صورة من مقتنيات إد، بتوضح شبح لطفل صغير. قال عنها إد:

- " ده مثلا مش شبح. الكيانات الشيطانية بتقدر تتجسد بأشكال كتير. لو دققت هاتلاقي الطفل ده مالوش عينين. ودي تعتبر بصمة للكيانات الشيطانية. اي تجسد شيطاني في شكل بشري لازم تلاقي فيه حاجة ناقصة، حاجة مش طبيعية ومش هاتلاقيها في تجسدات الأشباح البشرية."

إد ولورين بيشوفوا دايما إن الإهتمام بالغوامض وممارستها قنبلة موقوتة. قال إد بخصوص الموضوع ده:

- " خلال العشر سنين الي فاتوا، كان في تزايد غريب لممارسة التواصل مع الكيانات الماورائية، ليه؟ الناس معتقدة إن كل ده مش حقيقي، ومش مصدقين أن الكيانات الشيطانية موجودة وخطيرة جدا. بيمارسوا العاب زي الويجا وتحضير الأأرواح بشكل عشوائي تماما. شوف الجرايد والمجلات بيتكلموا عن الممارسات دي إزاي اليومين دول، بيتعاملوا على إنها موضة وحاجة نتسلى بيها!"

بعد 34 سنة، الزوجين لسه مكرسين حياتهم للتوعية ومحاربة المفاهيم الخاطئة. ودايما إد بيكرر جملته الشهيرة:

-" الكيانات الشريرة بتتواجد في حياتنا بأشكال كتيرة، وكل الي قولناه ده مايجيش حاجة في اللي لسه هانتكلم ونحكيلكم عنه!"

إيه الأغرب من الي قريناه في الحلقتين الي فاتوا؟ وأزاي إد ولورين دخلوا مجال الخوارق في طفولتهم، وإيه الي حصل أما الجيش الأمريكي إستدعاهم للتحقيق في قضية غريبة جدا؟

إستنونا بكرة إن شاء الله في الحلقة الثالثة.

لينك الحلقة الأولى في أول كومنت. ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي