الحلقة ‏الخامسة ‏عشر- ‏حصاد ‏الشيطان

حصاد الشيطان

( عن قضية الإستحواذ الشيطاني على المزارع موريس ثريو- قصة حقيقية)

 الحلقة 1٥

 موريس ملا طبق بالميه وحطه في الحمام علشان يحلق دقنه، بص في المرايا لقا نفسه إتنين!!

كذا مرة إتقال له من اشخاص مختلفين إنه بيبقا في مكانين في نفس الوقت.، بس إنه يشوف نفسه إتنين دي الي كانت صدمة بالنسبة له. كان بيفكرد دايما إن الناس بيتهيأ لها مثلا.

ماقدرش موريس يرفع الموس لرقبته، فمس الصابون عن وشه وخرج في هدوء.

____________________

حتى في وجود إستحواذ شيطاني، كان لازم شغل المزرعة يمشي باي شكل، ده أكل عيش وعيلة كاملة معتمدة عليه، ومحدش هايدي لموريس حاجة مجانا..بالعكس، الناس الي كان بيتعامل معاهم موريس بالآجل أو التقسيط في شغله بقوا يطلبوا فلوسهم كاش خوفا من فقد موريس لعقله وضياع فلوسهم.

تاني يوم من صلاة الأسقف، كمل موريس شغله في إعداد الأرض لمحصول جديد، وإمداد كشك الخضار بتاعه بالبضاعة اللازمة، وكانت نانسي  بتقلب تربة لشتلات طماطم وسمعت صوت موريس بيدق حاجة خشب في الصوبة.

- فرينشي، أجيلك اساعدك؟

ما ردش عليها..

- فرينشي؟

نانسي قلقت فدخلت الصوبة مالاقيتش اي حد ولا أثر لشاكوش أو مسامير وطبعا مافيش أثر لموريس..مجرد كوم خشب في ركن من المكان.

لفت انسي المزرعة ودورت على جوزها بس مكنش له اثر، لحظات ولقت عربيتهم النص نقل داخلة، ونزل منها موريس ومعاه بذور وطلبات للأرض.

- موريس كنت فين؟

- رحت أشتري بذور وعديت على الكشك.

- أصل كنت شغالة في الطماطم وسمعت صوت خبط في الصوبة بس ملاقيتش حد فيها.

- الاقيه إبن الحرام ده، مش كده؟ أنا هاوريه..

نسي موريس إن من تعليمات إد وارن ليه علشان سلامته إنه مايتحداش الشيطان ده خالص. لكن موريس إندفع ناحية الصوبة وجريت نانسي وراه بتحاول تشده من دراعه علشان يهدا.

- بلاش يا فرينشي..بلاش!

لكن موريس شد دراعه منها ووقف وسط الصوبة وصرخ:

- تعلالي بقا وفرجني هاتعمل إيه..

بصت نانسي في ذهول لجذع الشجرة المقطوع الي في الركن، ولقيته بيطير في الهوا ويتجه ناحية موريس. نانسي زقت موريس ووقعت معاه في الأرض، والجذع وقع عليهم.

مويس إتعور في دماغه ونزف كتير، لكنه لو كان واقف كانت إصابته هاتبقا أعنف. أخدته نانسي البيت وفضل ساكت باقي اليوم وهو كاتم غضبه.

_______________________________ 

السبت الصبح، كان إد وارن عنده، وكان جدولهم إن إد ولورين ييجوا لموريس الصبح ويمشوا العصر، وسيبوا إتنين أو تلاتة من الفريق البحثي يبات معاهم. الأاحداث كانت في تصاعد غريب، وإبتدى الهجوم الشيطاني يصيب موريس إصابات بدنية، وممكن طبعا يتقتل في هجوم من دول.

غضب موريس مكانش حد بيقدر يسيطر عليه إلا إد، صداقة لطيفة تنمت بين الرجلين خلت موريس يحس إن إد الوحيد الي فاهم بشكل كامل مشاعره وخوفه وحيرته، وإد كان بيصعب عليه يسيب موريس كتير لأفكاره وشيطانه.

يوم السبت ده نانسي إتصلت بإد وقالتله ييجي فورا، فنزل من بيته بدون فطار حتى، وأول حاجة شافها في المزرعة موريس قاعد في عربيته النص نقل ساكت وشارد. لاحظ إن السكون المريب لموريس، فقرب بهدوء من العربية وبص من الشباك. لقا دموع موريس مغرقة وشه، فخبط بالراحة على إزاز الشباك وقال:

- موريس..مالك؟

بص موريس لصديقه وقاله له وهو قرب ينهار:

- بليل كنت هاشنق نفسي..

واحدة من علامات الإستحواذ هو محاولات تدمير الشيطان لجسد الإنسان المخلوق على صورته.

- كنت خايف أوي يا إد..والصبح برضو حاولت أشنف نفسي تاني ونانسي لحقتني..ودلوقتي كان عندي رغبة شديدة إني أسوق العربية وأروح أنتحر بعيد لولا إنك جيت.

إد شاف حبل جنب موريس في العربية. قال له:

- هاتخف يا موريس ..أوعدك هاتبقا زي الفل..الكنيسة هاتلاقيلك حل..

- حل إيه؟ ما حاولوا مرة وأتنين ومافيش فايدة.

وصرخ موريس وهو بيبكي:

- لازم تخرج الزفت ده مني!

- أوعدك يا موريس..صدقني مش هاسيبك لوحدك طول ما أنا عايش لحد ما تخف، وصدقني المساعدة قربت..

وعد إد هدا موريس شوية، فدخلوا سوا البيت، وقرر إد إنه هايشدد المراقبة على موريس الفترة الجاية لمنعه من إيذاء نفسه.

_______________________ 

يوم الاحد، سمع موريس كلام إد وراح القداس في الكنيسة. قعد هو نانسي يسمعوا القداس في هدوء، وفجأة سمع موريس صوت قوي ومرعب بيقول:

- موريس!

مرة وإتنين وتلاتة سمع الصوت ده، بص حواليه بس مالاقلوش مصدر ولا كان حد سامعه غيره. فضل الصوت يهز موريس من جوه طول القداس لحد ما فقد الوعي.

_____________________ 

كريس مارشال، احد أعضاء فريق إد في منزل موريس، كتب التالي في تقريره المفصل الي بيسجل فيه كل شيء بيحصل لموريس:

" 10:30 بليل، موريس فاق من إغماؤه في الكنيسة، وجسمه كله كان بيوجعه جدا. حواليه إنتشرت ريحة وحشة جدا ودرجة حرارة الأوضة كانت متلجة مهما نحاول ندفيها. وفجأة الجو بيحرر لدرجة إننا بنعرق ونحس بالغثيان من شدة الحر.

جوز بنت موريس، السيد روجر، كان قاعد معايا من شوية، وقال ليه إن كل مرة العيلة بتتجمع في المزرعة لازم حاجة غريبة تحصل لهم. ساعات كلهم بيحسوا بالم في جسمهم بدون سبب مثلا أو حوادث بسيطة تحصل لهم.

عايز كمان أسجل إن الباحثين بيعانوا من آلالم متفرقة فجائية، زي ألم في الأسنان او الضهر أو العظام عموما وبتزول الآلام بمجرد إبتعادنا عن المزرعة.

______________________ 

نانسي مكانتش عارفة تعمل إيه، جزء منها عايز يهرب من كل الخوف والالم ده وتخرج بره الولاية كلها. وجزء منها بيحب موريس وعارف إنه مالوش غيرها، ولو سابته يوم واحد هايضيع، وهي نفسها هاتضيع من الحزن عليه.

لورين وارين إديتها كتاب صلوات تقرا منه كل ما تحس إنها تعبت أو خافت. الكتاب ده لورين بتستخدمه في بيتها وبتقرا منه طول الوقت وبتحس بالأأمان.

مع إستخدام الكتاب حصلت حاجة إعتبرتها نانسي إشارة من ربنا، صحيت يوم لقت سبح محطوطة في إيدها هي وموريس، مكانش عارفه مصدرها، بس حست براحة إن ربنا مش هايسيبهم أبدا.

__________________________ 

الجو بدأ يبقا أبرد، موريس كان مقلل من خروجه إلى أقصى حد، بي في اليوم ده كان لازم يعمل شوية تديلات في الصوبة ويلفها كويس بالبلاستيك علشان البرد. خرج بدري يشتغل، وإنشغلت نانسي في شغل البيت، لكنها لاحظت إن موريس مارجعش البيت ولا طلب قهوة حتى أو حاجة ياكلها.

نانسي راحت جري على الصوبة، لكنها لقت باب الصوبة مقفول ومستود عليه قطعة خشب علشان الهوا ما يفتحهوش. معنى كده إن موريس مش جوه. بس في إحساس غريب جه لنانسي إنه جوه الصوبة مش براها ماتعرفش إزاي.

نادت عليه لكن محدش جاوب. شالت الخشبة ودخلت الصوبة المظلمة، ولقت موريس وواقف وماسك كوب ورقي في إيده.

- حبيبي..إنت هنا..

موريس ما ردش، وطى لثواني بعدين رفع جذعه وبص لفوق بسرعة..شافت وشه إتحول لشكل مرعب بإبتسامة مخيفة..بقا شبه القرود.عينيه غاصت لجوه وبقت ثقبين أسودين، وفاحت من الصوبة ريحة سيئة جدا.

صرخت نانسي وعرفت طبعا إن ده مش موريس، مسكت الصليب الي في السلسلة ورفعته قدامها وقالت بصوت مرتجف:

- آمرك أن تنصرف، بإسم يسوع المسيح..

صرخ موريس بصوت رغوي، كأن حد بيصرخ تحت الميه، ورفع راسه لفوق تاني، وكانت فتحه فمه مش بيضاوية زي البشر، كانت مستطيلة بزوايا حادة!

إندفع من فمه شلال دم مسود وغرق حوائط وأرضية الصوبة، إنهار بعدها موريس ووقع على الأارض بيترعش ودرجة حرارته عالية.

أيا كان الي جواه فهو رحل دلوقتي، لكن أكيد راجع تاني..

مع الوقت، كل الي كان بيزور موريس من عيلته بطل يزوره بسبب المرض الي بيحسوا بيه. حتى بعض أعضاء فريق بحس إد وارن إعتذروا عن الإستمرار في التحقيقات.

لكن فضلت مورين، بنت موريس وخطيبها روجر يجولوه لفترات قصيرة كل مرة وكانوا بيجيبوا معاهم أحفاده يشوفوه ويحاولوا يسروا عنه إكتئابه.

في اليوم التالي لحادث الصوبة، كانت مورين والأحفاد وخطيبها ودايان أخت موريس جايين يتغدوا معاه. دايان وهي بتركن عربيتها شافت كيان أسود داخل لبيت أخوها، فقالت لنفسها إنها تخيلته. لكنها حست فجأة بخوف شديد وغثيان، وفضلت جوه عربيتها أكتر من نص ساعة لحد ما قدرت تخرج.

العائلة وأربعة من الباحثين كانوا متجمعين حوالين السفرة، مش عارفين إن دايان بره، لكنهم سمعوا فجأة أصوات طرقات وخربشات خلت الباحاثين يجروا يسجلوها. بعد دخول دايان البيت الأصوات توقفت.

بعد الغداء، إتجمع الأاحفاد حوالين جدهم موريس وكل واحد بقا يحكيله عن صحابه ومدرسته، بس موريس كان شارد وهو حاطط حفيدته الصغيرة على فخذه وبيهزها وبيقول:

- أول ما إبن الحرام ده يغور عني، هاقعد معاكم براحتي..

مجرد ما خلص موريس جملته، إندفع جسمه لورا وطارد البنت الصغيرة من على رجله ووقعت في الأرض، وموريس وقع بالكرسي الي إتكسر على الارض على بعد مترين.

تابعوا الحلقة ال16 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل. 

شكرا لثقتكم في المحتوى الي بقدمه ومنورين دايما.

#حصاد_الشيطان

#شيرين _هنائي