الحلقة السابعة عشر- حصاد الشياطين
حصاد الشيطان
( عن قضية الإستحواذ الشيطاني على المزارع موريس ثريو- قصة حقيقية)
الحلقة 17
موريس سمع صوت فيليب إبنه بينادي من بعيد وه جاي جري وقال له
- بابا..الرجل المجنون ده كان عايز منك إيه؟
- إنت شوفته؟
- أيوه..شوفته وهو رايح لك وكان حافي! هو راح فين؟!
__________________
في اللية دي حلم موريس بطفولته، بيوم من أيام الشتا الباردة..
كان راجع من المدرسة في عز عاصفة ثلجيه، وكان كل الأولاد أهلهم جم خدوهم إلا هو. غطى وشه ورقبته بالشال بس كام الثلج بيحرق جلده ويسيح وينزل جوه هدومه. كان بيترعش وهو مش شايف قدامه غير أبيض في أبيض.
مجرد ما موريس وصل نصف المسافة بينه وبين بيته كان الثلج وصل لركبه ومابقاش حاسس برجليه كلها. إنهار جنب شجرة واتكوم حوالين نفسه، وبعد دقايق مابقاش باين منه حاجة، إتغطى كله تلج. بدا يعيط وهو مش حاسس بجسمه كله وعيه بيروح.
موريس مابقاش حاسس بالبرد، كل حاجة بقت بيضا، وفي وسط البياض ده شاف وش رجل بشعر ولحية بني، وعينيه طيبة ورحيمة، وبدل الجواكت التقيلة زي ما توقع،كان الرجل لابس رداء أبيض خفيف. الرجل بص لموريس وإبتسم.
برغم برودة الجو، إلا إن الرجل مكانش باين عليه إنه بردان خالص، بالعكس كان بيشع دفء.
مالالرجل عليه ومد إيديه وشال موريس من وسط التلج ومشي بيه، ومقالش ولا كلمه في الطريق.
غاب موريس عن الوعي شوية، وفاق لقا نفسه في سريره، وأمه جنبه بتشربه شوربة دافيه وبتقول له إنها لاقيته فجأة نايم قدام البيت.
- يسوع هو الي أنقذني يا ماما..
_
كان عدى على اليوم ده أكتر من أربعين سنة، بس موريس فاكر الصوت، والملامح كويس اوي..
الرجل الي جاله في الحلق هو نفسه الي شافه في العاصفة.
وبكى موريس..
____________
أغلب الأيام كان إد ولورين مع موريس ونانسي، وفي غيابهم كان بيقعد أحد فريق المحققين ويسهر يحرسهم بليل.
بعد يومين من لقاء موريس بالرجل الغامض في الحقل، الأوضاع هديت تماما في البيت وكان بيمارس حياته بشكل طبيعي جدا، حتى إن الباحث كريس ماكنيل إتصل بإد وقال له:
- أعتقد إن الظواهر الشيطانية إنتهت. ظهور الرجل الغامض كان إشارة لموريس إنه شفي.
لكن إد كان شاكك في صحة إستنتاج كريس، ممكن ظهور الرجل ريح موريس نفسيا شوية، لكن قطعا الشياطين مش هاترحل بالسهولة دي.
- لا يا كريس خلي بالك وما تتسرعش..نفسي أصدق في الي بتقوله ونرتاح كلنا، بس ماشوفتش شيطان بيغادر جسد من تلقاء نفسه بالشكل ده للأسف.
____________
ماعداش ساعتين إلا وإتأكدوا إن شك إد كان في محله..
بعد الفطار والقهوة، إنقسم فريق البحث نصفين، كريس مارشال فضل في البيت مع نانسي علشان يسجل لو حصل حاجة، وكريس مارشال راح مع موريس الصوبة يساعده في زراعة بعض البذور.
ماكنيل وقف جنب موريس وهو بيروي الشتلات الصغيرة الي بيحبها كأنها ولاده، قال له موريس:
- بص لازم توريها على قد حاجتها وتعرضها للشمس برضو على قد حاجتها علشان لا تعفن منك ولا تتحرق..
مامنيل مكانش مهتم أوي بفنون زراعة الطماطم، بس كان شغله الي لازم يؤديه هو ملازمة موريس طول الوقت. الجو كان حر في الصوبة، فخلع موريس قميصه، وقلده كريس ماكنيل ووقف الإثنين بفانلاتهم الداخلية، وبدأ كريس ماكنيل يروي الطماطم مع موريس علشان ينجزوا الشغل بسرعة ويطلعوا من الحر ده.
إندمج ماكنيل في الري، بس قاطعه صوت غريب جاي من وراه بيصرخ فيه:
- إنت حطيت مكعب تلج في ضهري!
إلتفت ماكنيل في ذعر، ولقا وش موريس لازق في وشه، ملامحه متع=غيرة ومرعبة وريحة أنفاسه صعبة جدا.
- موريس، خضيتني مالك في إيه؟ محدش حط حاجة في ضهرك..
موريس ما ردش، وإلتفت ببطء بعيد عن الشاب المذهول.
ماكنيل شاف على فانلة موريس من ورا بقعة دم بتكبر وتوسع..مصدر البقعة كان خطوط وما يبدو إنه حروف.. نادى موريس وقال له:
- موريس، أنا بقول نرجع البيت نرتاح شوية..تعالى..
لف مامنيل دراعه حوالي موريس وطلع بيه بره الصوبة ونادى كريس مارشال وطلب منه يحضر الكاميرا.
في المطبخ، مسح الشابين ضهر موريس بفوطة مبلولة، ونانسي كانت شبه متوقعة الي حصل فجابت لموريس ملابس تانية بسرعة ووقف تشوف في إيه.
لدهشتهم، مكانش في أي أثر لجرزح على ضهر موريس، بصوا تاني على الفانلة لقوا فيها دم وأثر خدوش وحروف!
لكن الشابين إستنتجوا أخيرا إن إد كان عنده حق..للأسف.
_________________
للأسف الشديد، كل محاولات إد ولورين في الإسراع بقرار الكنيسة فشلت. الموضوع كان روتيني جدا وماقدروش يوصلوا لوعد بأي تحرك سريع قريب.
بدأ إد يفكر بطريقة تانية، إنه يلاقي طارد شياطين خارجج الكنيسة الكاثوليكية، وهو كان على معرفة بعدد من رجال الدين من كنائس تانية، أو رجال دين منشقين عن الكنيسة الكاثوليكية..
وكان الأسقف روبرت ماكينا هو الإختيار الأنسب لحاجة معقدة زي حالة موريس ثريو.
ماكينا كان عايش قريب من بيت إد لورين وارن في مونرو. وتم إبعاده من الخدمة في الكنيسة الكاثوليكية بسبب إصراره على إقامة القداس باللغة اللاتينية. إستقل روبرت ماكينا وأنشأ دار عبادة خاص بيه في مونرو بدون مساعدة من روما.
لكن الأسقف هارينجتون مكانش عايز يستعين بمنشق حتى لو سبب إبتعاده سبب غير مخزي، وكان شايف إن دي معصية بشكل ما.
__________________________
حاولوا تاني مع معالجين روحانيين، وقساوسة، لكن مكانش في أي تأثير يّذكر. نانسي في آخر مرة قابلوا فيها معالج روحاني، مكانتش عارفة جسد موريس هايستحمل تجربة تانية ولا لأ.. الرجل كان أنهك تماما، لكن رغم ضعفه وهزاله إلا إن كريس ماكنيل صوره وهو شايل تمثال لقديسه يزن 300 كيلو، كان محطوط في المزرعة. موريس شاله بكل سهولة ونقله من مكانه لآخر المزرعة بدون ما يلهث حتى.
في تقرير كريس دون إن حرايق عديدة إشتعلت في الصوبة، صوت عربيات بتقرب من البيت، لكن مابيلاقوش لها أثر..الضور بقا بيخفت وبعلا لوحده..والأهم إن كل الي في البيت أصبحوا أضعف جسديا، واغلب الباحثين أعتذروا عن الإستمرار في القضية.
موريس نفسه مابقاش مستحمل يستنى أكتر، بقا عصبي أو شارد طول الوقت. مابياكلش ومابيهتمش بأي حديث دائر. ساعات كان بيقوم ويروح وييجي في الأوضة في غضب كأنه حيوان حبيس..وفي مرة سمعت نانسي صوت إنفجار، ولقت طفاية السجاير الكريستال منفجرة ومالية المكان شظايا.
__________________
بعد ايام، جت حفيدة موريس كارلا الي عندها أربع سنين مع مامتها علشان يزوروا موريس زيارة سريعة، وكان متولي المراقبة يومها أحد تلامذة إد وارن وإسمه فالوكيفتش، وهو واحد من أمهر تلاميذ إد وارن وأكثرهم إحتمالا.
كان بقاله كم يوم مع الأاسرة ومسجل عدد كبير من الأنشطة الشيطانية الغريبة، والي ما إنقطعتش لحظة طول فترة أربع أيام.
فالوكيفيتش كان مهتمته إنه يحمي الطقلة أثناء الزيادرة ويحط عينه عليها. دار بينهم حوار لطيف مضحك وسألها:
- تحبي نرسم شوية؟
وافقت كارلا، فجاب الشاب ورق والوان ورجعلها وقعد جنبها على الأرض وقال لها:
- ها..نرسم إيه؟
البنت فكرت شوية وكان باين عليها إنها عايزة تقول حاجة بس مترددة، بس قررت فجأة تقول:
- نرسم الوَحش..
- انهي وحش؟
- الوحش الي في البيت..
وإختفت إبتسامة فالوكيفتش..
بدأت البنت ترسم فورا..وأما خلصت رسم شاف الباحث الشاب الرسمة الي كانت شبه فكرة أي طفل عن (العو) بس كان في هالة حوالين راسه.
- كارلا إنت شوفتي الوحش ده قبل كده؟
- ايوه..
- فين؟
- في كذا مكان..
- طب ممكن توريني بيستخبى فين؟
- أه ممكن..
كارلا مسكت إيد فالكوفيتش ووديته أوضة موريس ونانسي وشاورت على السرير.
- الوحش مستخبي هنا؟
- أيوه.
- وبيستخبى فين كمان؟
البنت غطت بُقها بإيدها وضحكت..
- وريني فين كمان..
البنت مسكته من إيده وودته الحمام وشاورت على المرحاض.
الشاب فكر إنه تصرفات البنت تصرفات أطفال عادية، أماكن كل الأاطفال بتعتقد إن العو بيستخبى فيها.
كارلا تقريبا فهمت إنه مش مصدق، فسحبته من إيده تاني وشاورتله على سلالم المخزن الملحق بالبيت.
- الوحش بيستخبى في البدروم؟
- ايوه..هو عايش تحت دلوقتي..
فتح فالوكيفتيش الباب ونور النور، وشال البنت ونزل بيها السلالم. مكانش في حاجة جواليه غير أكوام خشب للدفاية، وصناديق بطاطس وأكياس بذور واسمدة..بدروم عادي جدا.
- مافيش حاجة هنا يا حبيبتي..
بس كارلا شاورت على الركن البعيد وبعدين صرخت..
تابعوا الحلقة 18 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل.
شكرا لثقتكم في المحتوى الي بقدمه ومنورين دايما.
#حصاد_الشيطان
#شيرين _هنائي
Comments
Post a Comment