الحلقة العاشرة- حصاد الشيطان
حصاد الشيطان
( عن قضية الإستحواذ الشيطاني على المزارع موريس ثريو- قصة حقيقية)
الحلقة العاشرة
في يوم لطيف مشمس، كان موريس ونانسي رايحين يشتروا حاجات من المدينة، مجرد ما ساق موريس شوية حس إنه دايخ، وقال لنانسي:
- ابوكي مش فاضله كتير..
صوت موريس كان مختلف، كان أعمق بكتير من المعتاد. خلص موريس كلامه وأغمى عليه.
نانسي فضلت فترة تفوقه، وأما فاق قالها إنه تمام بس داخ شوية وعايز حاجة مسكرة ياكلها.
- موريس، إنت قولت حاجة رعبتني قبل ما يغمى عليك..قولت إن بابا هايموت..قولتها بصوت مختلف..ليه قولت كده؟
- انا ماقولتش حاجة..
رغم أنه مكانش فاكر إنه قال حاجة، بس كان حاسس بقرب الموت بيخيم حواليه.
- تعالى نلكم بابا، عايزة أتطمن إنه كويس.
___________________
كلمت نانسي أبوها وكان كويس بس للأسف مات بعدها بساعات. طيب من الي بيحاول يحذرهم؟ وليه؟
إبتدت نانسي تفتكر الإحساس الي كان عند موريس قبل ما أبوه ي قتل أمه، وكانت من فترة قررت تكتب في دفتر كل حاجة بيحس بيها موريس بالتاريخ، وتاريخ حدوثها، وكانت بتحط الدفتر تحت السرير. أحداث كتير بسيطة تراكمت في الدفتر لحد ما ختمت بيوم وفاة أبوها
موريس مكانش موافق على الي بتعمله، كان محتاج يتجاهل الحاجات الغريبة الي بتحصل دي ويتمنى إنها تختفي لوحدها. بعد وفاة الأب، طلب موريس من نانسي تطلع الدفتر وتقراله كانت كاتبة إيه عن إحساسه يوم وفاة أمه، كان عايز يستعيد اليوم ده ويحدد الإشارة لحدوثه أو التحذير حصل إزاي.
راحت نانسي أوضتهم ونزلت تحت السرير تجيب الدفتر الي كان بقالها فترة ما بتكتبش فيه، لكنها أما خرجته إتفاجئت إنه محروق لدرجة التفحم.
- الدفتر إتحرق!
- بتبصيلي كده ليه؟ مش أنا الي حرقته!
فضلت نانسي تقلب في ورقه المكرمش المسود وتعيط، كانت محتفظة جواه بكام صورة قدام لبناتها، وكلهم إتفحموا.
- إزاي ده حصل؟ إنت الي حرقته صح؟ عمرك ما كنت راضي عن كتابتي فيه.
- أنا ماعملتش كده..لازم تصديقيني!
- متأكد يا فرينشي إن مش إنت الي حرقت الدفتر؟
نانسي عرفت من الخوف في عينيه إن مش هو الي حرقه، إلى جانب إنه عمره ما كذب عليها أصلا. لو كان عايز يتخلص من الدفتر كان طلب منها ترميه أو كان قطعه قدامها. بس ليه يحرقه وليه يرجعه مكانه تاني؟ موريس كان رجل طيب ومش ممكن يعمل كده.
موريس كان خايف، وكذلك نانسي..لو إن في حد أو حاجة قدرت تحرق الدفتر وهو تحت السرير، فممكن تحرق إيه تاني؟
الأحداث الغريبة دي كان بتهدد اي زواج، تينا سابت موريس بسبب الي بيحصل له، لكن نانسي كانت أقوى، نانسي كانت ممكن تستحمل أي حاجة بس تفضل جنب موريس الي كانت متأكدة إنه إنسان نقي وطيب فعلا. مكانش في حل قدامها غير إنها تقف جنبه وتشوفله حل، لازم يطلبوا مساعدة.
- موريس..بقولك..ماتيجي نشوف قس ولا كاهن في الكنيسة؟
كان موريس بيشرب قهوته الصبح أما قالتله الإقتراح ده، وبان على وشه الإرتياح. كان مكسوف يفسر الأامور بمنظور خوارقي، وكان نفسه حد يقترح إقتراح زي ده.
- يبقا نروح نشوف الأب بوير بعد الفطار.
____________________
الأب بوير، الكاهن المُسن كان لسه مخلص القداس أما وصل موريس ونانسي الكنيسة. الزوجين مكانوش منتظمين في حضور القداسات لكن الأب بوير كان عارف إنهم بييجوا يصلوا من وقت للتاني، ووافق على مقابلتهم في مكتبه فورا.
المكتب كام صغير ومشمس، على الأأرضية كان في سجادة من طراز شرقي وقدام المكتب الخشبي كان في كنبة قعد عليها الزوجين. قالت نانسي للأب بوير:
- أبونا..لازم تساعدنا..في حاجات غريبة بتحصل لنا. موريس عمال يجيله رسايل تحذيريه، أعتقد إنها من روح أمي..
نانسي بدون قصد منها ماقالتش للكاهن كل الي بيحصل، غصب عنها مكانتش عايزاه يحكم عليهم بالجنون. كانت متوترة وفضلت تقفل في شنطتها وتفتحها.
الأب بوير طول سنين عمله، سمع كتير عن ناس بتزعم إن الأموات بيبعتوا لها رسايل. أفضل طريقة للتعامل في المواقف الي زي دي هي معرفة الرسالة الي عايزة الروح المزعومة توصلها.
- ليه والدتك عايزة تتواصل معاكم؟ تفتكري عايزة تقول إيه؟
- مش عارفة..يمكن أمي مش موافقة على عيشتي مع موريس بجواز مدني مش في الكنيسة..
- خلاص إحنا فيها..تتجوزوا في الكنيسة.. أنا هاجوزكم بنفسي.
_________________________
في 19 مايو 1984 إتجوز موريس ونانسي في كنيسة سانت بول بحضور عدد قليل من الأهل والأصدقاء القدامى.
بعد المراسم، راح موريس ونانسي، وأخته الصغيرة وجوزها، وأخو نانسي ومراته علشان يتعشوا سوا في مطعم بسيط. وظن موريس وزوجته إن الأحوال هاتبقا أفضل بعد ما عملوا الي المفروض يهدي والده نانسي ويرضيها.
لكن ظنهم مكانش في محله، فكل الأحداث الغربية بدأت تتسارع وتزيد بعد جوازهم.
___________________
بعد زواجهم بشهر، كان في شجرة ضخمة سقطت على البيت بعد عاصفة رعدية قوية، فنزل موريس في اليوم التالي وسط الأعشاب المندية من المطر ومعاه المنشار الكهربا علشان يقطع الشجرة لأجزاء ممكن يشيلها وينقلها.
موريس كان خبير في إستخدام المنشار الكهربا حتى مع الخشب المبلل، لكن طول ماهو شغال كانت بتجيله رؤيا إن المنشار بيفلت من إيده ويعوره..فجأة إيده سابت المنشار والنصل إترشق في الحذاء الي كان لابسه ووقف. بدأ دفقات من الدم تسيل من الفتحة، لكن موريس مكانش حاسس بأي ألم. فضل يقول لنفسه إنه ما إتعورش وهو ماشي تجاه البيت والدم مغرق الأرض وراه.
مجرد ما وصل البيت وقعد على كرسي بره وقلع الحذاء والشراب الغرقان دم، ما لاقاش ولا خدش حتى في رجله. موريس إترعب، لكنه ما إتفاجئش.
نانسي صرخت أما شافت الدم، ومكانتش مصدقة الي حصل ولا إن الدم ده مالوش مصدر حقيقي. موريس إتعصب عليها وسابها ومشي، لأانه مكانش قادر يفكر تاني إن لسه الأحداث الغريبة بتستمر وإنه لازم يلاقي لكل حاجة سبب.
- مافيش يا نانسي..مافيش حاجة ..إدخلي جوه..
__________________
خلال الأسابيع التالية، إشتعلت النار في المزرعة تلات مرات بدون سبب. الحريق الأول كان في في المخزن والمكان إتصفى تماما. رغم أن المخزن كان قريب من البيت إلا إن مجرد ما الحريق إشتعل حرق كل حاجة بسرعة رهيبة خلال الدقايق الي أخدها موريس لحد ما وصل له.
تاني حريق كان في كشك بيع الخضار قدام البيت على ناصية الطريق. إتحرقت محتوياته لكنه هو نفسه كان شبه سليم.
الحريق التالت كان جوه البيت نفسه، في أوضة شيريل بنت نانسي في نص الليل.
برضو مكانش في أي سبب للحريق.
الحرائق أرعبت موريس، وخليته يفضل صاحي طول الليل ماسك كشاف وبندقية علشان يلحق أي حريق تاني أو يمسك الجاني. بس موريس مكانش له أي اعداء في القرية ولا خارجها.
وصل تفكيره إن الحرايق لها صلة مباشرة بالحاجات الغريبة الي بتحصل له، كان بيسمع أصوات طرقات وأنفاس تقيلة وخطوات، وبيشم روايح سيئة طول الوقت. بس إيه الصلة؟
_________________
في أكتوبر، كان موريس بره في ساحة البيت مع كيث خطيب شيريل، وكان بيساعدوا بعض في إزالة ورق الشجر الجاف.
موريس وهو شغال إتكعبل وقع على جزء من لحاء شجرة. قام موريس وشال اللحاء ومشي ناحية كيث علشان يبص معاه عليه. قال كيث وهو بيبص على اللحاء:
- عامل زي قفاز البيسبول..
- هانهزر؟ خده يا كيث، ده جزء مني! خده وإدخل بيه البيت وبص عليه في الضلمة.
شيريل سمعت موريس بيزعق لكيث، خرجت تشوف إيه المشكلة، ولقت موريس مصر يدخلوا يحطوا اللحاء في الضلمة.
شيريل كانت إتعودت على الحاجات الغريبة الي بتحصل في المزرعة، فأخدت اللحاء من سكات، وهي داخل البيت كيث همسلها:
- الموضوع سخف أوي..
- خده على قد عقله، ماتزعلوش..
أخدت اللحاء في أوضتها وضلمت النور، لدهشتهم لقوا اللحاء بينور كأنه لمبة 30 وات!
- يا يسوع! إيه ده؟!
بعدها موريس أخد اللحاء وعلقه جنب سريريه. فضل نوره يشع لأيام، بعدها نزله وعلق مكانه صليب. محدش فهم ولا حتى موريس نفسه معنى كلمته إن اللحاء جزء منه.
حاجات تانية غريبة بدأت تحصل بعد موضوع اللحاء ده، الصلبان كانت بتنزف، بعض النباتات والأخشاب كانت بتنور، حرايق بتشتعل في الأوض..بس محدش كان بيتضر أكتر من الضرر النفسي فقط.
______________________
قبل الكريسماس، بدأت الأحداث تاخد منحنى خطر على حياة موريس نفسه..
قرر موريس ونانسي في الكريسماس ده إنهم يزينوا المزرعة كنوع من التغيير والبهجة بعد الضغط العصبي الي عاشوه الفترة الي فاتت.
عمل موريس صليب خشبي طوله ست أقدام علشان يعلقه فوق سطح البيت في مواجهة الطريق.
طلع السلم الخشب الكبير وسنده على جدار البيت، وإبتدا يطلع وهو ماسك بإيد واحده، وبالتانيه شايل الصليب.
وصل السطح وثبت الصليب بالمسامير، ونزل جاب فرع النور الي هايلفه على الصليب، وهنا حصلت حاجة غريبة في طريقه للصعود مرة تانية.
عند آخر سلمة، ولسه هايحط رجله على السطح، حس بالسلم بيلف من تحته كأنه حد عايز يوقعه.
صرخ موريس ومسك في السطح، وبص تحته مالاقاش حد جنب السلم. لسه هايعدل نفسه لقا السلم بيتحرك تاني بس بعنف أكتر. حاول موريس يمسك في أي حاجة ما عرفش. وقع على الأرض من إرتفاع طابقين. نزل موريس على كتف، وصرخ من الألم، لكنه كان مصمم يخلص المهمة دي.
حط السلم، وشال فروع النور على كتافه وبدأ يطلع وهو ماسك كويس في السلم ومتأكد إن السلمنفسه ثابت.
مجرد ما وصل السطح، السلم إتحرك، وحاول موريس يمسك في مواسير الميه لكن فشل، والمرة دي وقع على راسه من أعلى السلم.
داخ موريس، لكنه مافقدش الوعي. صمم أكتر إنه يعلق الزينة فوق الصليب وبقت مسألة عِند، كأنه تحدي إيماني او صراع مابين الخير والشر.
لف موريس الزينة حوالين كتافه، وشال الشاكوش في إيده، وكان متعصب ومستعد يضرب أي حد يقرب منه بشاكوشه.
المرة دي، في نص السلم، السلم وقع بيه، وسلك لمبات الزينة لف على رقبته وبدأ يخنقه كأن حد بيشده. فضل موريس يصرخ وهو بيتخنق:
- سيبني..إبعد عني..عايز مني إيه..
قبل ما موريس يتخنق، السلك فك. وقام موريس وهو مقرر إن كده كفاية، الصليب متعلق وتمام ومش لازم نور عليه.
حكى موريس لنانسي الي حصل، وكانت خايفة جدا وطلبت منه ياخد باله من نفسه. وعدها، بس إزاي ياخد باله من شيء غير مرئي أصلا؟
________________________
مع بداية السنة الجديدة، قرر موريس ياخد نانسي ويسافروا يغيروا جو في فلوريدا. مكانتش أجازة طويلة، هم كم يوم، بس موريس كان عايز يعوض نانسي عن الشد العصبي الي عاشته، وكان مخطط ياخدها في رحلة بحرية ويأجر قارب. خاصة إن طقس فلوريدا حار والجو هايبقا حلو ومشمس.
فعلا اجروا قارب، نزلوا المحيط به تحت الشمس، مجرد ما غاب الشاطيء عنهم، سحاب أسود بدأ يظهر فوقهم، والرياح كانت هاتقلب القارب بيهم.
بدأت أمطار باردة جدا تنزل عليهم، وعطل محرك القارب وسط المحيط...
تابعوا الحلقة ال11 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل.
شكرا لثقتكم في المحتوى الي بقدمه ومنورين دايما.
#حصاد_الشيطان
#شيرين _هنائي
Comments
Post a Comment