الحلقة التاسعة- حصاد الشيطان
حصاد الشيطان
( عن قضية الإستحواذ الشيطاني على المزارع موريس ثريو- قصة حقيقية)
الحلقة التاسعة
________________________________
بلدة وارن في ولاية ماساتشوستس، كان عايش فيها أعداد كبيرة جدا من السكان الأصليين للولايات المتحدة(الهنود الحمر- لكني لا أفضل تلك التسمية..المترجمة) وكانوا بيمارسوا شعائرهم الدينية الي جزء منها بيكون سحر أو عبادات وثنية. لمئات السنين كان غرب ماساتشوستس بيضج بأغانيهم وصلواتهم وطقوسهم. وكان أهم وأقوى فرد في القبائل هو المُعالج، الي بيقدر يطرد الأرواح الشريرة من الأجساد.
مكانش السكان الأصليين فقط هم الي مارسوا طقوس طرد الشياطين، إنما لسبب ما، كانت ماساتشوستس معقل لطاردي الشياطين عبر العصور، يمكن ده بيرجع إلى ممارسات قديمة جدا جلبت الشياطين للأرض دي.
سنة 1692 كان في حادث مدينة سالم الرهيب، وهو الحادث الأشهر على الإطلاق في الولايات المتحدة، وفيه تم إحراق عدد كبير من النساء بتهمة السحر.
الأحداث الي سبقت الإعدام الجماعي ده، كانت إن في فتيات كتير فجأة بقوا بيعانوا من آلام شديدة وأعراض غريبة من تشنجات وهلاوس وأعراض خوارقية تانية.
واضح إن في شيء في أرض الولاية دي، شيء أقدم من ساحرات سالم، شيء بيرجع وبيصيب عدد من الناس بشكل عشوائي كل فترة.
الي حصل في سالم زمان بدأ بطقس سحري تافه جدا، وهو إن شاع بين الفتيات لعبة يقدروا من خلالها يشوفوا وجه عريسهم المستقبلي بإستخدام بيضة وزجاجة فارغة، مع إنشادهم المستمر( غني، فقير، شحات، حرامي)
في مرة، بنت من القرية عملت كده هي وصديقاتها، وإتفاجئت برؤية طيف على هيئة تابوت، وكانت دي علامة على إنها هاتموت بدون زواج.
بالفعل البنت بدأت تصاب بأعراض إستحواذ وماتت بسببها، وإنتقل الإستحواذ من بنت للتانية ومن بيت للتاني وتوالت الأعراض الغريبة والوفيات.
أحد الرهبان سأل بنت من الي حصلتلهم الأعراض:
- إنت شوفتي الشيطان؟
- الشيطان جالي ونام معايا وأمرني بخدمته.
الشيطان جه للبنت المذكورة في صورة رجل طويل لابس إسود وشعره ابيض. مع بنات تانية زارهم الشيطان على شكل حيوان.
في الحالتين، كان بيقولهم إنه الرب وإنهم لازم يخدموه 6 سنين، وفي المقابل كان بيمنحهم عطايا كتير. كان بيديهم كتاب وبيخليهم يحطوا عليه علامة بدمهم.
العهد كان بيتضمن ضم ناس تانيين للإستحواذ ده بممارسة طقوس سحرية معينة. الحقيقة وعلى عكس الشائع، الشيطان إستحوذ على عدد كبير من الرجال والنساء مش النساء فقط، لكنهم بيذكروا ساحرات سالم النساء بإعتبار إن الوباء جه على يد عدد من الفتيات.
يُقال إن من الساحرات الي تم إعدامهم عدد ما ماتوش بالشنق، وإضطروا يحطوا عليهم حجارة لحد ما ينسحقوا.
جزء من إيمان أغلب الأديان بيعتمد على الإقرار بوجود الشيطان، وبكونه كائن حقيقي مش مجازي. ولحد دلوقتي كل رجال الدين بيمارسوا أشكال مختلفة من طرد الشياطين. فلاسفة زي أفلاطون ذكروا المس الشيطاني وأعراضه..في سفولكليس ويوريبيدس هانلاقي برضو ذكر لنفس الأعراض. هيرودوت وبلوتارك وعدد من المؤرخين والكتاب القدامى ذكروا نفس الموضوع.
إسم الشيطان (ديفِل) مشتق من ال اليونانية (ديابولوس) ومعناه بالعربي (ذو الإفتراء) وبيطلق الإسم على أعلى كيان شيطاني موجود وهو إبليس.
( المترجمة: لمعرفة المزيد عن الإستحواذ الشيطاني وطقوس طرد الشياطين وكل ما له علاقة بعلم الشياطين رجاء قراءة كتاب عالِم الشياطين من ترجمتي بالعامية المصرية في الرابط التالي:
https://www.facebook.com/176490199090944/posts/3701825806557348/
)
_____________________
بعد ما حلم موريس بكل تفاصيل يوم مقتل أمه، وشافها وحس بيها من وجهة نظرها وكأنه هي بالضبط، بدأت حالة موريس تسوء بعد إنتقاله هو ونانسي وبناتها للمزرعة في وران وإستقرارهم فيها سنة 1982.
في يوم قرروا يروحوا يزوروا والد نانسي في نيويورك، كانت الشمس بدأ تغرب وهم في الطريق في عربية موريس.
الجو كان جميل والعائلة كانت مسممعة جدا في الطريق، وفجأة بدأت العربية تبقا أسرع، وحس موريس إن دواسة البنزين بتنزل لتحت لوحدها مش بإرادته.
وطى موريس وحاول يشد البدال بنفسه وهو بيحاول يحافظ على إتزان الدريكسيون. ..العجلات كانت بتشيط.
درس فرامل لكن برضو العربية فضلت مندفعة قدام، بعدها حس بحد بيشيل إيديه بقوة من على الدريكسيون.
نانسي كانت بتصرخ لأنها مش عارفة تتحرك كأن حد حاطط عليها صخرة.
- فرينشي..إنت إتجننت؟!هاتموتنا..وقف العربية..وقفها!
العربية كانت بتتفادى الإصطدام بالعربيات التانية لوحدها، غمضت نانسي عينيها في ذعر وجسمها بيتأرجح بعنف نتيجة المناورات الي بتعملها العربية على سرعة عالية.
دقايق وبدأت العربية تبطأ تاني وترجع لطبيعتها.
- موريس إنت بتعمل إيه بالضبط عايزة أفهم؟
كان لسه جسمها بيترعش من الرعب، وموريس بيحاول يتحكم في عجلة القيادة تاني.
- إنت شايفة قدامك إن مش أنا الي عملت كده..أعملها إزاي وإيديا ورجليا ما بيتحكموش في العربية؟
فضلت نانسي تعيط لحد ما وصلوا. الزوجين ما بطلوش تفكير في السبب الي خلا العربية تعمل كده.
خلال شهور، كان في عاصفة جليدية غمرت المزرعة بالجليد. كانت نانسي قاعدة بتقرا الجريدة جنب الدفاية، وكان الليل في أوله، و موريس جنبها وقام يعمل قهوة. نادته نانسي وهو في المطبخ وقالتله:
- شكل العاصفة هاتستمر طول الليل.
لكنه ما ردش عليها. ده كان غريب لأن موريس كان بيحب أوي يتكلم عن الطقس وخاصة العواصف. مجرد ما كانت بتفتح السيرة يفضل يتكلم ويفتكر كل عاصفة قامت من يوم ما إتولد، وإزاي إن جو ماساتشوستس لا يقارن بجو ماين.
نادت عليه نانسي تاني:
- موريس!
برضو ما ردش. فكرت في إنه راح أوضة النوم لأانه كان تعبان طول اليوم. يمكن هاينام شوية قبل العشا.
عدت نانسي عبر المطبخ وراحت أوضة النوم بس مالاقيتهوش، لكنها شمت ريحة شبه ريحة عفن البطاطس.
- إيه الريحة دي؟!
فضلت تدور على مصدر الريحة لكنها مالاقتهوش. نادت على بنتها مورين علشان تيجي تدور معاها على موريس. البنت دورت لكن مالقيتهوش في البيت أو براه.
نانسي ومورين كانوا مستغربين أوي لأنهم كانوا هايشوفوه لو كان راح ناحية باب البيت.
خرجوا في العاصفة وفضلت نانسي تنادي عليه، دقايق وظهر موريس من جوه الحظيرة.
- أنا أهو..جاي..
مشي موريس ناحيتهم ونص جسمه غايص في التلج، نانسي لاحظت أن موريس سايب طبعا أثر عميق أثناء مشيه، لكن مافيش أثر بيدل على إنه راح الحظيرة.
التلج مكانش بالكثافة الي تغطي أثر عمقه حوالي نصف متر خلال دقايق من ساعة ما موريس قام راح يعمل قهوة لحد دلوقتي.
- موريس، هو أزاي مافيش أثر لرجليك وإنت رايح الحظيرة؟
- مش فاهم؟ ما أنا هناك من الصبح أكيد التلج غطى الأثر.
ونفض موريس حذاؤه ودخل البيت عادي جدا. لكن نانسي كان قلبها هايقف من الرعب، أمال مين الي كان قاعد جنبها من بدري وراح يعمل قهوة؟!
سكتت نانسي وخافت تقول لموريس حاجة وهو مش ناقص. لقت موريس راح المطبخ وهو بيسأل عن العشا. دقيقة ولقيته راجع ماسك كوباية قهوة في إيده..ده مالحقش يدخل علشان يطلع بكوباية قهوة سخنة من جوه..لحق عملها إزاي؟!
الأغرب ان الموريس الي رجع من المطبخ هدومه ناشفة تماما مش زي موريس الي رجع من بره والتلج كان مبهدل هدومه.
راحت ناحيته وحطت إيدها عليه، مسكت إيديه لقيته دافي، مش درجة حرارة واحد شغال من الصبح بره في التلج.
- لا فهمني بقا في إيه؟ إنت مش ساقع ليه؟ إنت طول اليوم زي مابتقول بره ودلوقتي مش ساقع ولا هدومك مبلولة..ليه؟! في إيه مالك؟
ريحة غريبة ظهرت فجأة، ورفع موريس حواجبه وبصلها كأنها من كوكب تاني، بعدها قعد على كرسيه وولع سيجاره وقالها:
- المفروض إنها عاصفة صعبة فعلا، بس لا تقارن أصلا بالعواصف الي كنت بشوفها في ماين وأنا صغير..ما تجيش فيها فتفوتة أصلا..!
________________________
خلال الوقت ده، موريس كان بيعاني من صعوبة في النوم رغم إنه كان طول عمره بينام بسهولة وفي أي مكان وتحت أي ضغط عصبي.
مهما يهلك نفسه في الشغل، لازم يصحى مفزوع كل ليلة من كابوس..الحقيقة هو كابوس واحد بيتكرر كل يوم، وفيه بيشوف رجل شرير بيدق مسامير في ضهره وبيضحك.
في يوم صحي الصبح بعد ليلة ماعرفش ينام فيها بسبب تكرار نفس الكابوس. مهما يصحى وينام يرجع يحلم بيه تاني. موريس مكانش عارف معناه أو المفروض يعمل إيه..الرجل الي في الحلم مكانش باينله ملامح، في البداية ظن موريس إنه أبوه، بس ساعات كان بيلمح ماحه الي كانت شيء خارج من أفلام الرعب.
أما صحي اليوم ده الصبح، أول ما نانسي وقعت عينيها عليه صرخت:
- موريس..إيه الي على ضهرك ده؟!
- في إيه مش فاهم؟
- كأن في حاجة مكتوبة على ضهرك..
إفتكرها بتهزر، لكنها طلبت منه يبص في المراية علشان يتأكد. لف وبص لضهره في المراية وصرخ من المفاجأة. كان في أربع كلمات محفورة على ظهره كأن حد مخرمهم بمسامير. سألت نانسي موريس عن معنى الكلمات لأنها مكانتش مكتوبة بالإنجليزي. موريس مكانش عارف يقرأ الكلام بسبب إنه معكوس وبسبب إنه مابيعرفش يقرأ بمهارة. طلب من نانسي تقراها زي ما هي شايفاها.
- لا بورتاي إست أوفراي.. مكتوبة كده
فكر موريس لثواني، الكلمات شبة الفرنسي.. أدرك أنه فعلا فرنسية ومعاناها (الباب مفتوح)
- ايوه يعني إيه يا موريس؟ باب إيه وبيودي لفين؟ إيه الي حصل لك؟!
موريس عرف إن الكلمات لها علاقة بالحلم، في باب وفي حد فتحهوله وهو مش عايز يدخل في اي أبواب..بس الخوف كله إن الوقت يكون فات.
طيب هل ده ممكن يكون تحذير؟ طول عمره كان بيجيله تحذيرات وكان بيتجاهلها، بس يفهم التحذير إزاي؟
_____________
في يوم لطيف مشمس، كان موريس ونانسي رايحين يشتروا حاجات من المدينة، مجرد ما ساق موريس شوية حس إنه دايخ، وقال لنانسي:
- ابوكي مش فاضله كتير..
تابعوا الحلقة العاشرة بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل.
شكرا لثقتكم في المحتوى الي بقدمه ومنورين دايما.
#حصاد_الشيطان
#شيرين _هنائي
Comments
Post a Comment