الحلقة العاشرة- عالم الشياطين

عالِم الشياطين

سيرة إد ولورين وارِن غير العادية

الحلقة العاشرة

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

قضة آل فوستر- الجزء الثاني

العيلة كلها سكتت، وكأنهم بيهضموا كل الي إتقال. بدأ إد يسأل لورين عن الي شافته في البيت فقالت:

- " تحت، حسيت بعاصفة من الترددات السلبية، بس كنت حاسة إن مصدر الترددات دي فوق، في أوضة من إوض الأولاد بس ماكونتش متأكدة أنهي واحدة. أما طلعت أوضة جويل حسيت بحيرة شديدة ولخبطة، كأني مسمومة."

قالت ميج في تعجب:

- "انا كمان كنت بحس بكده!"

- " الإحساس ده خلاني افقد كل قدرة على تحديد مكاني، خرجت من الأوضة بالعافية بعدتخبط، وروحت لأوضة ميج، مجرد ماوقفت عند بابها حسيت بضغط على راسي وكتافي كأن حد بيبعدني ناحية السلالم. قررت ما أدخلش لإني حسيت بتواجد شيطاني قوي، ومش في مقدرتي أتعامل مع الكيانات غير البشرية. بس عرفت إنه موجود في أوضة ميج. إنتِ عندك شمع إسود من المستخدم في تحضير الشياطين في أوضتك يا ميج؟"

ردت ميج في ذهول:

- " ايوه عندي!"

دار إد بعينيه في وشوش العيلة، وكان واضح جدا إنهم مرعوبين، بس السيد فوستر كان باين عليه إنه حاسس بالحيرة شوية لأنه مش قادر يتوافق مع تفسيرات الي بيحصل، ومش قادر يستوعب إن كل ده بيحصل في بيته هو شخصيا. قال إد للعيلة:

-" أقترح تخرجوا كلكوا في نزهة كده بالعربية في اي مكان.. وإنتم بره البيت ياريت ما تتكلموش أبدا في أي شيء من الي حصل. وإحنا هانحاول هنا ونشوف هانقدر نعمل إيه. خليكم بعيد ساعة تقريبا."

بان عليهم الإرتياح كون إن في حاجة ممكن تتعمل تساعدهم، وفي أقل من دقيقةكانوا كلهم في العربية وبيبعدوا عن البيت.

قعد إد ولورين سوا وراجعوا التسجيل الي مكانتش لورين موجودة أثناء تسجيله، ,إتفقوا إن الأطفال مايقدروش يختلقوا كل التفاصيل دي، خاصة وإن في تفاصيل مش مذكورة في أي كتاب من اللي ممكن تكون ميج بتقراهم. دي تفاصيل يعرفها المتخصصين بس.

 كانت مهمتم دلوقتي هي معرفة تفاصيل أكتر عن الكيان الشيطاني الموجود ومحاولة إبعاده.

عادة، الزوجين ما بيقدروش يعرفوا بدقة هوية الكيانات الشيطانية من خلال إستجواب الضحايا فقط، بيحكي إد عن الموضوع ده وبيقول:

- " الكيانات الشيطانية بتميل لإنها تفضل غير ملحوظة في البداية ولمدد طويلة زي ما حصل في القضية دي. بس مع الوقت بتبدأ تظهر نشاط خوارقي نتيجة تأثر العالم الفيزيائي حواليهم بوجودهم، ومحاولاتهم لإرعاب البشر وتحطيم إرادتهم علشان يبقا سهل عليهم إختراق هالاتهم ومسهم في النهاية.

كمان الشياطين بتقدر تصنع اشياء مادية ملموسة. الأشياء الي بيعملوها دي درجة حرارتها بتكون عالية اما تلمسها، وبتوضح هنا إن في إستهلاك للطاقة الحرارية لإنتاجها. ساعات تانية الأشياء الي بيصنعوها دي بتختفي لوحدها بعد ثواني، وفي أحيان نادرة بتفضل موجودة، وعندي منها مجموعة. بنسميها (أبورت) بمعنى شيء مادي اظهره كيان روحاني."

طيب هل ال"أبورت" دي إتحللت بشكل علمي قبل كده وعرفنا مصنوعة من إيه؟

- " أكيد. الأبورت عموما مهم كأدلة بنرفقها بملف القضية أما بنقدم طلب للكنيسة لإرسال طارد شياطين. أول ما الأبورت بيظهر في قضية، باخد منه عينة وأبعتها للتحليل وتحديد المكونات .

الأبورت مكوناته أغلبا بول ، قيء وبقايا طعام مهضوم، فضلات ومواد أرضية مختلفة. يعني الأبورت ممكن يكون كومة فضلات بتظهر فجأة وسط البيت، وبيكون الكيان إما صنعها في البيت أو نقلها له من مكان تاني. 

الأبورت برضو ممكن يبقا شيء أو كتلة بدون ملامح، ومكوناتها بتكون معادن، وبقايا أمينو أسيد وعناصر طبيعية تانية. مافيش حاجة مش طبيعية في مكوناتها، لكن مشكلتنا هي جت منين وإزاي بتتجسد فجأة كده.

الكيانات الشيطانية قادرة تعمل حاجات كتير، لكن ماتقدرش تخلق شيء من العدم، على عكس إعتقاد عبدة الشيطان، فإن الشياطين مش إله، ماعندهاش القدرة على الخلق، لكن عندها قدرة على جمع مكونات من الطبيعة وعمل شيء منها."

ليه خليتوا العائلة تبعد عن البيت؟

- "علشان أقدر أحدد إيه الي في البيت بالضبط وإيه قدراته، لازم أعرضه لإستفزاز ديني. الإستفزاز ده خطير جدا ومانقدرش نضمن سلامة الموجودين أثناؤه، خاصة ,إن الأسرة دي قادرة تبعد عن البيت عادي مش محبوسة فيه زي ما بيحصل في قضايا تانية. حتى إني ساعات كنت بخلي لورين هي كمان تبعد، دورها بيكون إنتهى أصلا ومافيش داعي أخاطر بيها. الأشخاص الحساسين زي المستبصرين وأصحاب القدرات الروحانية أكتر ناس سهل بيتأذوا، وأنا مش من الناس دي، لذلك فأنا في أمان نسبيا.

بيكون معايا صلبان، مياة مقدسة..إلخ.. كل مابيكون معايا رموز دينية كل ما بيكون إستفزازي للكيان أقوى، وإحساسي بالأمان أكبر. ده مايمنعش برضو إن ساعات بيكون معايا مسدس أو مضرب حديدي، أنا إنسان برضو الأشياء المادية بتريحني، لكن طبعا مقدرش اٌقتل بيها شياطين.

المهم، أول ما ببقا لوحدي في البيت، كل حاجة كانت هادية. لو الضحايا حددوا مكان معين بتظهر فيه الظواهر الشيطانية بتوجه له على طول، لو مافيش، فبتجول في كل أوضة وأقرا الصلوات بشكل مستمر لحد ما حاجة تحصل. 

الشياطين أقسمت على معصية الله وتحديه عن طريق البشر. الشياطين غاضبة، وغيرانة من الإنسان بشكل عام، وبتعمل كل جهدها للسخرية منه وبيان ضعفه الشديد هو المخلوق من طين، قدام قوتها العاتية النارية. إيذاء البشر ساعات بيؤدي بيهم للسخط والقنوت وساعات الكفر أو الإنتحار أو القتل..إلخ. لو تم إستفزاز الكيان الشيطاني فدرجة حرارة البيت بتنزل بسرعة، أو بتعلا لدرجات مخيفة، وبتبدأ روائح عفنة تظهر، مع أصوات إنفجار أو طرقات، أو أصوات تهديد بصوت مافيش بشري يقدر يتخيله، وأوامر ليا بالرحيل. ممكن برضو أسمع صوت خطوات بتجري او تبعد، وبتكون زي فخ بيخليني اتبع الخطوات دي وابعد عن مكان تواجد الكيان الشيطاني أو أتشتت وأفقد تركيزي. ساعات كمان بتظهر كلمات خارجة على الحوائط. وساعات مافيش حاجة من كل ده بتحصل، وبدلا من  ده، الكيان الشيطاني بيبدأ يتجسد على هيئة سحابة سودا مرعبة.

ليه الإستفزازات الدينية دي بتجيب نتيجة؟ هل دي مهارة مني؟ لا أبدا.. السبب هو إن الشيطان بيكره أي ذكر لله، وأي رمز ديني. أيمان البشر بالله عموما بيثير غضب شديد جدا عنده، غضب لدرجة الألم، وده إحساس البشر مايقدروش يتخيلوه."

في قضية عائلة فوستر، الزوجين إشتغلوا سوا. إد إستخدم صليب وماء مقدس لإستفزاز الكيان، وبدئوا يروحوا ناحية البدروم. رش إد الحوائط بالماء المقدس وقال بصوت عالي:

بسم يسوع المسيح، آمر كل الكيانات البشرية والشيطانية في المكان بالرحيل وعدم العودة مطلقا. 

إستنى إد أي رد فعل، بس  مافيش حاجة حصلت. ليه إد مسموح له بإستخدام الماء المقدس برغب إنه مش راهب ولا قس؟

- " المسألة مش مسألة مسموح، استخدام الماء المقدس في البيوت متاح لكل الناس، لكن الماء المقدس الي معايا مقروء عليه صلوات من راهب متخصص في طرد الشياطين. بس عموما عايز أقولك إن الأهم من أي رمز ديني في حد ذاته، هي القيمة الي بيمثلها الرمز ده لحامله. الشيطان بيُستفز لأني مؤمن بقدرة الماء المقدس على إيذاؤه وإغضابه، فهو بيغضب ويثور من إيماني ومن القيمة الإيمانية للرموز المقدسة."

بدأ إد يمارس طقس " الإذعان" في الدور الأول بهدف إجبار الكيانات الموجودة على الإعلان عن نفسها. مافيش حاجة حصلت في الدور الأول، فبدأ الزوجين يتجهوا للدور الثاني، والي هم عارفين من البداية إن المشكلة فيه. مجرد ما إد بدأ يرفع الميه في إيده، حسوا بذعر شديد. الذعر ده كان إحساس إنتقل لهم عن طريق التخاطر بدون مسبب. وده كا ن مؤشر قوي إنهم ماشيين صح. 

- " الكيان الشيطان بيبث الرعب عن طرق التخاطر بهدف التحذير، زي ثعبان الجرس كده."

شم الزوجين ريحة سيئة، وشافوا حاجة بتتحرك بسرعو عند اعلى السلم. باب اوضة ميج اتقفل وصوته كان عالي جدا لدرجة افزعتهم. بدأ الزوجين يعيدوا تفكير في ضرورة إستكمال الطقس ده لوحدهم بدون راهب متخصص. بس في نفس الوقت لو تراجعوا دلوقتي، ممكن التراجع ده يتسبب في ضربة من الرعب يفضلوا يعانوا منها فترة طويلة.

قرروا فعلا يكملوا وبدئوا يطلعوا السلم، وكان صعود صعب جدا ومرهق. بتقول لورين عنه:

- " الوضع كان كأننا ماشين عكس تيار نهر قوي وعنيف."

وكل ماكانوا بيقاوموا كل ما كانت القوة الي بتبعدهم بتزيد. نزل الزوجين السلم تاني خوفا من إنهم يتزقُّوا من نصه ويصابوا. عند اول السلم سمعوا صوت ضحكة شيطانية مرعبة، فبدأ إد يرش الماء المقدس على السلم، ويطلع هو لورين السلم بسرعة وتصميم، مكانش ينفع يستسلموا قدام الضحكة الساخرة دي. واخيرا وصلوا للردهة قدام إوض النوم.

رش إد الردهة بالماء المقدس، وكرر أوامره بالرحيل لكل الكيانات الموجودة وعدم العودة. اتجهوا لأوضة جويل، فإنقفل الباب. فتح إد الباب وكانت الأوضة فاضية، وبدأ إد تاني في طقس الإذعان.

فضلت حجرة ميج، وكان بابها مقفول، إيه الي كان مستنيهم الناحية التانية؟ محدش عارف.

ده الي هانعرفه بكرة إن شاء الله.

ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي