الحلقة الرابعة والعشرين- عالم الشياطين

عالِم الشياطين

سيرة إد ولورين وارِن غير العادية

الحلقة 24

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

طيب ودينيس؟ إيه بقا مشكلتها وإزاي إتحلت؟

- " بعد التسجيل الي إنت سمعته ده، والي كانت فيه وسيطة مش مُستحوذ عليها بالمناسبة، رجعت ملامحها زي ما كانت. البنت دي مشكلتها إنها بقت عاملو زي ما تكون علبة فاضية أي كيان ممكن يستحوذ عليها ويلعب بيها شوية ويسلمها لغيره. دينيس وسيطة بين عالمنا وعالم الظلام. الي حاولت أعرفه هو إزاي جاتلها القدرة دي.

بعد مغادرة الكيان الشيطاني الي إنت سمعته ده، البنت كانت هديت، وبدأت تتكلم معايا وتحكي.

حكاية دينيس بتبدأ من قبل ولادتها أصلا. البنت إتولد بمعرفة وقدرة على ممارسة طقوس السحر. البنت بتزعم إنها إكتسبت القدرة دي في حياة سابقة لها. كانت بتقول إنها تناسخ لروح ساحرة قديمة. إنت عارف موضوع التناسخ شائك ومش قادرين نوصل فيه لدليل قاطع. لكن بنقابل ناس كتي بتزعم وبوجود دلائل على إنها عاشت قبل ما تتولد حيوات تانية في أجساد تانية.

دينييس كانت أداة في إيدين الشياطين، البنت مش ساحرة لأن قوة السحر بتيجي من عهد بين الإنسان والشيطان. دينيس كانت مشعوذة، الشعوذة هي قدرة على تحريف المادة والتلاعب بها عن طريق التنسيق بين جسد الإنسان وقوى كيانات روحانية. البنت دي كانت ضمن فريق من الكيانات غير البشرية، والتنسيق أو الإتفاق ده تم بينهم في حياة سابقة للبنت دي، في تناسخ سابق. البنت كانت بتتكلم عن الحياة السابقة لها بتفاصيل وعلم.

في حالة الشعوذة، الإنسان مابيبقاش قادر يأمر الكيانات الشيطانية المصاحبة له بفعل شيء نيابة عنه، زي في حالة العهد السحري كده. الكيانات بتستغل دينيس لكنها ماتقدرش تستغلهم. البنت كانت جايالي بإرادتها علشان تعرف مني بعض المعلومات في علم الشياطين ماعندهاش علم بها علشان تقدر تتحكم في الشياطين الي معاها. طبعا ماينفعش أدي حد أي معلومات من النوع ده، كأنك بتدي قنبلة يدوية لطفل.

خلال الشهر التالي، قابلت دينيس ووالدها تلات مرات، بس مكانش في إيدي حاجة أعملها علشان أصلح وضعها. كتبتلهم تقرير لفحصها في الكنيسة، وكتبت فيه ملحوظة أوصي فيها بإعطائها منهج تقدر من خلاله تعيش وتقلل من إستغلال الكيانات دي لها قدر الإمكان."

هل لورين بتؤمن بالتناسخ؟ ردت لورين وقالت:

- "ما أقدرش أؤكد لك إن التناسخ مرحلة بيمر بيها كل الناس. بس عندنا ملفات لأشخاص قدروا يثبتوا إنهم عاشوا قبل كده في أجساد تانية في عصور مختلفة. على جانب آخر، أنا برضو ماعنديش أدوات البحث الكافية الي تخلني أتأكد بنفسي من زعم الناس دي. بس عموما أما بتلاقي تدخل شيطاني في الموضوع بتعرف إن في تلاعب بالطبيعة والقوانين المألوفة لنا. هل لو في عهد شيطاني سحري بين إنسان وشيطان، والإنسان ده مات ومالوش نسل، بيرجع الإنسان ده ويتولد في جسد جديد وبيرجعله الشيطان تاني؟ هل نقدر نعتبر التناسخ لعنة من نوع معين؟ نقدر ساعتها نقول إن الحياة التانية دي (تناسخ زائف)؟ خدعة غير مفهومة بتخلي الإنسان يعيش مرتين من غير ما يموت؟ هل التناسخ التاني هو إستحواذ روح بشرية على جسد بشري مُضيف بفعل كيان شيطاني؟ ما أقدر أجزم بتفسير أو رأي لحد دلوقتي."

هل كيندرا ودينيس كانوا يعرفوا بعض قبل تدخل إد في قضاياهم؟

- " لا..ما إتقابلوش قبل كده ومايعرفوش بعض. الكيان الشيطاني اللي كان مستحوذ على كيندرا هو الي ساق دينيس لمكتبي علشان يقدر يتكلم من خلالها. فاكر كلامنا عن تشابك العلاقات؟"

هل لمس دينيس للطرحة السودا خلق بينها وبين كيندرا صلة، وقدرت تعرف من خلال اللمس فقط القصة كلها؟ أقصد إن الي حصل مع دينيس مكانش حلول لشيطان في جسدها، كان سايكومتري أو معرفة من خلال اللمس؟

- " لو فرضنا ده، فإحنا كده هاندي للسايكومتري (المعرفة عن طريق الللمس) أبعاد أكبر من قدراته. القدرات الفائقة للحواس موجودة وبتحصل، بس في القضية دي مكانش ده الي حصل.

في حالتنا، كان في كيان عاقل مستقل مختلف عن كيندرا ودينيس تدخل في الموضوع. أما الكيان ده مكانش مستحوذ على جسد اي بنت فيهم، كان بيتجسد عندي في المكتب، وأما إتكلم على لسان دينيس أول حاجة قالهالي (أنا عارف إنت من). العبارة دي بتتقالي كل مرة بتكلم فيها مع كيان شيطاني. بعدها بدأ يتكلم عن معاناته بعد طرده من جسد كيندرا وده شيء ماتعرفوش كيندرا ولا دينيس. برضو الكيان كان بيذكر إسم كيندرا على إعتبارها شخص منفصل مختلف عنه، وده بيؤكد إنه كيان مش ذكريات قدرت دينيس تعرفها عن طريق لمسها للطرحة.

بعدها الكيان بدأ يهدد بالعودة لكيندرا، وده حصل فعلا..الكيان الشيطاني بيقدر يعرف الفرق كمان بين المياة المقدسة وغير المقدسة.. إحساسة بقوة الإيمان الي بتحمله المياه بيختلف، المياه العادية مبللة، والمياة المقدسة بتدي إحساس حرارة. طبعا دي حاجة دينيس مكانتش تقدر تعملها وتفرق بين نوعين مياه باللمس."

ليه الكيانات الشيطانية بيكون رد فعلها عنيف أما تلمس الماء المقدس؟

- "المياه هي المياه.. لكن المياة المقدسة، والي قرأ عليها شخص متدين جسمه بيفيض بطاقة إيجابية آيايات من كتابه المقدس، طاقته الإيجابية دي بتنتقل للماء. أبحاث الباراسيكولوجي كمان لاحظوا تغير في طاقة الماء بتغير الأشخاص المخالطين لها. الماء المقدس موجود عند كل الأديان بالمناسبة وفكرته هي حلول طاقة إيجابية إيمانية في الماء كوسيط متنقل. الماء المقدس له قدرة على ضبط طاقة الإنسان المريض الي أساس مرضه خلل طاقي. في ناس بتتحسن بمسكة الإيد أو العناق مع حد بيحبه بينقل له طاقة إيجابية.

فالطاقة الإيجابية في الماء المقدس بتؤذي الكيان المكون فقط من طاقة سلبية، وبتدي إحساس الحمض بالنسبة له."

الكيان ذكر إنه كان عايش في سلام..فسرلي الكلام ده.

- "الكيانات الشيطانية بترتاح من إحساس الغضب والغيرة الي جواها أما بتنجح في الإستحواذ على جسد إنسان. إحساس بالإنجاز والنجاح يعني."

هل فعلا الكيانات الشيطانية بتعاني زي ما ذكر الكيان الي سمعناه؟

- " أيوه بتعاني..بتعاني بعد طردها من الأجساد الي إستحوذت عليها، بس كمان في سبب أكثر تعقيدا. الكيانات الشيطانية مدفوعة لممارسة الإستحواذ لسببين، أولهم إن مملكتهم أيا كان بتسميها إيه، مكان غاية في الظلام والشر، والكيانات بتحاول تهرب منه بأي طريقة وتقضي ولو وقت قليل جدا بالنسبة لأعمارها في أجساد بشر. وبمجرد ما كيان شيطاني أو شيطان يحتل جسد بشري، بيفتح الباب لعشرات غيره إنهم يستحوذوا على الجسد معاه. طبعا طردهم من الجسد الي تعبوا في إحتلاله شيء مؤذي ومثير للغضب.. 

السبب التاني للإستحواذ هو طبعا الي حكينا عنه، إهانة الإنسان ونزع كل بهاؤه عنه قدام عينين خالقه والبشر التانيين. فكده الإستحواذ بيضرب عصفورين بحجر."

طقس طرد الشياطين بيعمل إيه بالضبط في الشيطان؟

- " زي ماقولنا ذكر الله أو ذكر أي إيمان بإله واحد وشدة إيمان طارد الأرواح بيحسسوا الشيطان بالغضب الشديد والفشل. 

خليني اشبهلك الطقس بمرحلة الهجوم الشيطاني. في مرحلة الهجوم الكيان بيعمل ظواهر مزعجة جدا للبشر زي الخبطات والأاصوات المؤذية والروائح الكريهة الي بتدفع الضحايا للهرب من بيتهم أو الإنتحار حتى علشان يخلصوا من الإيذاء ده. تخيل بقا إن جسد الإنسان هو البيت بالنسبة للكيان ده، بيت دفع فيه كل ما يملك وعارف عواقب خروجه منه، بس طقس طرد الشياطين هو هجوم من البشر على الشياطين بنفس الطريقة، بس بدل التسبب في الإزعاج أو الإيذاء البدني، الطقس بيتسببلهم في غضب شديد وحقد على الإنسان لدرجة إنهم بيقرروا يمشوا ويسيبوا الجسد ولو مؤقتا. لو فكرت فيها من المنطق ده هاتقدر الصورة توصل لك إلى حد ما."

هل إنت مؤمن بالجحيم كمكان مكون من نار وكبريت؟

- " لا..أنا غير مؤمن بالجحيم كنيران مشتعلة زي الي بتشوفها في الدنيا. لكن من خلال كلامي مع شياطين، سمعت تعبيرات بتقول إن المكان الجحيم مشتعل أو فيه نار. أنا أعتقد إن النار في الجحيم هي نار مختلفة تماما عن النار بتاعتنا.. نار لها القدرة كمان على التعذيب النفسي مش بس الجسدي، نار مش بتحرق وتحول لرماد..نار بتعذب وتدوم. الجحيم في بُعد تاني غير البُعد الي عايشين فيه وله قوانين مختلفة مانعرفش عنها حاجة وممكن كمان لو عرفنا مانقدرش نفهم، لذلك فالشياطين بتوصفلنا حسب حواسنا كبشر."

الكيان كان قصده إيه أما قال مافيش جنة ومافيش نار، وإن فيه بس مكان ما..؟

- " ما أقدرش أقول بالضبط لأني معرفش. الكيانات الشيطانية كذابة بطبعها، وأنا إتعلمت ما أدخلش في نقاش طويل مع كيانات شيطانية. فتلاقيني بحاول أسطح الحوار قدر الإمكان وأقلبه سخرية وأحصل على إجابات بسيطة زي إسم الشيطان الموجود، وبركز على محاولة إبعاده بس. طريقة كلام الشياطين غامضة وبتثير الفضول، لكن ده بيكون طعم تاني علشان أسأله فيجاوب إجابات تهز إيماني. انا عالم شياطين مش عالم لاهوت وماعنديش قدرة على الجدال الديني."

طيب إيه موضوع دهن البشر الي ذكر إنه بيحب يتدهن بيه؟

- "الموضوع ده له جذور قديمة. في طقوس السحر الأسود، قتل الأطفال كان طقس شائع للتقرب من إبليس. كان الطفل بعد ما يتقتل بيتغلي في الماء لحد ما تطلع منه الدهون، بتتاخد الدهون دي وتتخلط بنبات ست الحسن (بيللادونا) وبعض الأأعشاب التانية وبيتدهن بيه جسم الساحرة. ده بيقول إن وقت الدهان ده بيكون الشيطان مستحوذ على جسد الساحرة وبيحس بالدهان ده على جسمه هو لأنه مالوش جسم مادي، فبعتبر جسم الساحرة جسمه."

طيب وكلامه عن الدم والتأكيد عليه كذا مرة؟

- "الدم هو هبة الحياة والدليل عليها، فالكيانات دي بتهين الهبة الإلهية دي، بالإضافة إلى إن شربها بيحسسهم بالدم ده جواهم وكأنهم عايشين."

الكيان كان بيقول إنه بيعبد ديان، إلهة السحر..هل ديان أنثى؟

- " الشياطين مالهومش جنس. زي الملايكة برضو مش إناث ولا ذكور. لكن تعامل البشر القديم مع الشياطين دي من خلال السحر خلاهم يدوها صفات دنيوية فبدئوا يتخيلوها شكل زي الحيوانات وقرون وديل، بدئوا يقولوا ده أنثى وده ذكر بناء على شخصيته وتصرفاته..إلخ. يعني كل ده خيال بشري علشان يقدر يتصور كيانات غير مادية."

ذكر الكيان إنه ضعيف، وبعدها قال إن في أقوى منه..وعرفنا كمان إنه إستحوذ على كيندرا بناء على أمر من لوسيفر. كلمنا أكتر عن الموضوع ده يا إد:

- "الكيان الشيطاني ما بيقومش بالإستحواذ على جسد لوحده أبدا. بيكون في شيطان أو أكتر كقادة، وفي شياطين تانية أصغر وأضعف بيحافظوا على الجسد المستحوذ عليه في الوقت الي بيكون في الشياطين الأكبر في مهام تانية. عندك مثلا حالة خاصة جدا في ولاية آيوا، بيقال إن لوسيفر شخصيا كان مستحوذ عليها. كان إسمعا آنا إيكلوند، والقضية دي كانت سنة 1928، والرهبان الي أخرجوه منها شافوه متجسد وسطهم في شكل شديد البهاء وكان لابس تاج."

هل كل طقوس طرد الشياطين بتنجح بشكل أو بآخر؟

- " للأسف لا..هاحكيلك قضية مهمة جدا وشهيرة حصلت في المانيا الغربية، لبنت عندها 22 سنة. جلسة الطرد الخاصة بيها إتسجلت على 43 ساعة من التسجيل الصوتي! التسجيلات الرعبة دي تم بثها على التليفزيون الألماني بعد وفاة البنت أثناء جلسة الطرد، ووفاتها أدت لضجة كبيرة وقتها."

في 8 أغسطس سنة 1976، كتبت نيويورك تايمز في تقريرها:

بعد طقس مرعب يذكرنا بأجواء فيلم طارد الأرواح الشريرة، توفيت فتاة في الثانية  والعشرين من عمرها أثناء طرد الشياطين التي كان يزعم طاردو الشياطين إستحواذهم عليها. القضية المعروفة بطرد شياطين أناليسه ميكل، جرت أحداثها المأسوية في المانيا الغريبة، وبحسب بعض المراسلين فإن طقوس طرد الشياطين أمر شائع في بلادهم.

كرد فعل على وفاة اناليسه، وجهت السلطات الالمانية لطاردي الأرواح الكاثوليك الي قاموا بالطقس معاها تهمة الإهمال العمد. المحامي العام قال إن البنت ماتت من قلة الأكل والجفاف.

الإتهامات دي خلت الرهبان مسؤلين عن موتها، ودي مكانتش الحقيقة. أناليسه ماماتتش بسبب طقس طرد الشياطين، لكن بسبب عدم قدرة جسدها على تحمل الإستحواذ وأعراضه. 

الراهب المسئول ما أنكرش سوء تغذيتها، بالعكس ركز على إيضاحه وقال إنه طلب طبيب يراعي البنت أثناء فترة محاولاته لطرد الشيطان المستحوذ عليها.

 بيقول إد:

- "الحقيقة إن طقوس طرد الشياطين إستمرت لست شهور! خلالها البنت كانت رافضة أي نوع من الأكل او المشروبات وده شيء أصلا مش طبيعي..محدش يقدر يعيش كل ده من غير مياه ولا أكل، فعايزين حد يفسرلنا إزاي عاشت مش إزاي ماتت."

الآنسة أناليسه ميكل كانت تحت درجات متفاوتة من الإستحواذ لمدة تلات سنين سابقة لعميلة الطرد. خلال الفترة دي زارت أناليسه أطباء نفسيين ومشيت على علاج فترات طويلة لكن حالتها إتدهورت.

أناليسه كانت بتصارع علشان جسمها وروحها، وطقس طرد الشياطين تم كخطوة أخيرة بعد إستنفاذ كل الحيل.

إيه الي حصل في قضية أناليسه والمعروفة لنا كلنا بإسم ( طرد الشياطين من إيميلي روز) واللي إتعمل عن قضيتها فيلم من أكثر أفلام الرعب تأثيرا.

حكاية أناليسه أو إيميلي روز هانعرفها بكرة من خلال حكاية إد واران، ومن خلال تجميع لمقالات إتكتبت عن القضية دي ومقارنة بين أحداث الفيلم والقصة الحقيقية.

تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي