الحلقة السابعة عشر-عالم الشياطين

عالِم الشياطين

سيرة إد ولورين وارِن غير العادية

الحلقة 17

قضية رُعب أمتيفيل

الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.

قاموس أوكسفورد الإنجليزي.

***

ملحوظة: الكتاب تحقيق بيجريه الكاتب جيرالد بريتل مع الزوجين إد ولورين وارٍن، وفيه بيستخدم صيغة المُتكلم، وكل البوستات التالية هاتكون على لسانه.

بيحكي إد وبيقول:

- " أما تجتمع أركان القضية الخوارقية، بتكون ظاهرة قدامنا ومتأكدين من إنها حقيقة مش تخيلات ولا لها تفسيرات أخرى. ده بيحصل بعد جهد كبير من جمع إدلة وإستجواب شهود..كل واحد بيحكي لنا الي حصل مابيقدرش يحدد نقطة معينة بدأت عندها الأحداث، وبنفضل نسأل كتير جدا عن تفاصيل ممكن تعتبرها الضحية مالهاش لازمة فمش بتذكرها. بندور دايما على الآتي:

1- تاريخ الضحايا وتاريخ أجدادهم إن إحتجنا.

2- تفاصيل الظاهرة الخوارقية.

3- وجود نسق معين لتكرار تفاصيل الظاهرة دي، يعني مابنكتفيش بإن حدث واحد حصل وما إتكررش وبنعتبرها على أساسه قضية خوارقية.

4-العلامات والرمزيات.

5- تصاعد الأحداث ووضوع الخطة الشيطانية.

6- تناسق كل الي فات ده مع بعضه في سياق واحد.

خليني أحكيلك قصة آل لوتز المعروفة بقضية رعب أمتيفيل، وهي قضية ما شاركناش فيها إلا بعد هروب الأسرة من الحصار الشيطاني، وكان دورنا فيها توثيقي وبحثي فقط، وقدرت لورين تأكد وجود كيان شيطاني في البيت زي ما حكيتلك قبل كده.

هنبدأ بتاريخ منزل أمتيفيل نفسه، يعني مش هانبدأ القصة زي ما إتحكت أول مرة بالظواهر الي مر بها آل لوتز في البيت. البيت نفسه كان مملوك لأسرة من سبع أشخاص..عائلة ديفوز، وسكنوا فيه أوائل الستينات.

الساعة واحدة من صباح يوم 13 نوفمبر 1974 – وهو يوم بيعتبره علماء الروحانيات من أكثر الأايام في السنة نشاطا في الظواهر الروحانية- قام الإبن الأكبر من عائلة ديفو بقتل كل أفراد أسرته الستة رميا بالرصاص من بندقية ضخمة، وماحدش من الجيران سمع صوت الطلقات!

بعد حادث القتل ده ب13 شهر، قام جورج وكاثلين لوتز بالإنتقال لمنزل أمتيفيل أثناء عطلة الكريسماس – برضو فترة نشطة بالأحداث الشيطانية- والي حصلهم بعد كدهه زي ماقولتلك إتحكالنا من جورج لوتز بعد هروبه وأسرته من المنزل. 

جورج كان شخص أنيق ومهندم وساعات بيتقل في الشرب شوية، وبقول ساعات يعني مش مدمن. خلال الفترة الي عاشها في البيت ده، كان قاعد دايما قدام الدفاية ومكانش أبدا بيحس بالدفا..دايما بردان لدرجة التجمد رغم إن مقياس حرارة البيت كان دايما بيشير إن درجة الحرارة مرتفعة.

في القضايا الي حققنا فيها، لاحظنا إن الكيانات الشيطانية بتتلاعب بالطاقة الحرارية وغالبا ما بتسحبها لغرض التجسد، فبتكون النتيجة إن درجة حرارة المكان بتنخفض جدا بشكل مفاجيء. بنسمي الظاهر دي (البرد الروحاني). ومن فروقها عن البرد العادي إنك مهما تتدفى وتتغطى مابتحسش بالدفا، كأن البرد بيخترق جسمك نفسه.

سحب الحرارة كمان بيتم كأحد خطوات إرهاق الضحايا وتشتيتهم وهدم عزيمتهم. كاثي زوجته كانت كمان بتشتكي من إنها بقت عصبية وبتتخانق دايما مع أولادها، وكان بيجيلها أحلام فيها تفاصيل من قضية قتل آل ديفو، وبتحس بأن حد بيحضنها في المطبخ، الحد ده كانت بتحس إنه ست. كمان الأولاد بقوا عصبيين وخلقهم ضيق، وكذلك كلب العائلة.

بدأ بعد كده الزوجين يشتكوا من أطنان من الذباب بتغطي كل حاجة في حجرة النوم في الطابق العلوي. الميه في المراحيض بقت سودا.. تمثال سيراميك على شكل أسد، بقوا يلاحظوا إنه بنتقل جوه البيت من تلقاء نفسه. طفل من الأطفال إيده إتهرست وعضمها إتكسر تماما قدامهم بسبب إنغلاش شباك عليها، لكن في المستشفى لقوها سليمة! وفي نص الليل، كان دايما جورج بيسمع صوت فرقة موسيقية جاي من الشارع، وطبعا الصوت مالوش مصدر.

أثناء فترة إقامة آل لوتز في البيت، كنا بنقيم حاضرات في الجامعة عن الي بيحصل للضحايا تحت تأثير فترة الهجوم الشيطاني، وكان منها موضوع صوت فرق العزف دي بالذات..وماعنديش فكرة عن مخزاها الحقيقة لحد دلوقتي لكنها ظاهرة شائعة في العالم.

آل لوتز كمان قالوا إنهم كانوا بيمروا بنوبات من البرودة المفاجأة اوالحرارة المفاجأة بالإضافة إلى رائحة فضلات كريهة للغاية..طبعا عارفين ده معناه إيه.

كمان الإتصالات الهاتفية كانت مشوشة بدون سبب. أخو كاثي لوتز إكتشف فقده ل1500 دولار من جيبه أثناء زيارته لهم، وكان المبلغ مخصص لدفع تكاليف فرحه."

الفلوس دي فعلا إختفت؟

- " معرفش..بس الفلوس بتختفي في البيوت الي تحت هجوم الشيطاني. أكيد فقدان مبالغ مالية هايضغط على أعصاب الضحايا، وده المطلوب. 

بس بيني وبينك إنت والأباجورة دي، أعتقد إن الفلوس دي ما إختفتش، هي إنتقلت ليد ساحر ما في مكان تاني. أمال إنت فاكر السحرة الي بتطلب فلوس من الشياطين، الشياطين بيجيبوها منين؟ وزي ماقالت لورين، علاقات البشر متشابكة، والشياطين بتشابك العلاقات دي أكتر وبتستغلها ببراعة شديدة. الفلوس بتختفي من البيوت المسكونة وتظهر في جيوب السحرة!

كل الي حصل ده خلى أعصاب آل لوتز على آخرها، حتى إنهم بقوا بيشكوا في صحتهم العقلية. في يوم لقا جورج ظل أسود على هيئة شيطان محروق جوه الدفاية!  عموما الكيانات دي بتحب تتجسد أو تظهر نفسها جوه النار، فالدفاية مكان مناسب لألاعيبهم طبعا.

كمان الأسرة شافت تجسد لابس عباية بغطاء رأس واقف عند السلم.. برضو هاتلاحظ إن الكيانات دي بتتجسد على هيئة الرهبان بزيهم المألوف. 

الإبنة الصغرى ميسي، كان عندها حكاية منفصلة..كانت بتشوف خنزير مسمي نفسه جودي، وبيقولها إنه ملاك!"

سؤالي عن الخنزير ده، هل ممكن يكون كيان حقيقي مادي؟

- "ما شوفتهوش بعينيا..بس مش ضروري للكيانات الشيطانية إنها تتلبس في جسد حيوان مثلا علشان تظهر لحد في هيئة حيوان. هي طبعا ما تقدرش تتجسد في هيئة حيوان أو إنسان كامل بدون عيوب شكلية ظاهرة زي ما حكينا في اول لقائنا، فبتعمل حاجة تانية..بتعمل إسقاط لصورة الحيوان في عقل الضحية مباشرة..فمحدش بيقدر يشوف التجسد ده غير الضحايا المقصودين..فاهمني؟ الكيانات الشيطانية والأشباح البشرية عندها القدرة دي.

الأشباح البشرية مابتقدرش تتجسد غير على هيئتها البشرية أو هيئتها وقت وفاتها فقط، اما الكيانات الشيطانية فعمر ما كان لها جسد مادي، بتتخيل الشكل الي عايزة تظهر عليه وبتسقطه مباشرة في عقل الضحية.

رغم إن الزوجين ماكانوش متدينين، إلا إن جورج كان عارف قس، خلينا لأغراض الخصوصية نستخدم الإسم الي إستخدمه جاي آنسون في كتابه عن القضية دي..هانسميه الأب مانكوزو الي كان محامي في المحكمة الكاثوليكية ومعالج نفسي. اول ما وصل البيت وابتدا يباركه، سمك صوت ذكوري مرعب بيأمرة يبعد. وفعلا بعد من المفاجأة والخوف. بعدها الأب مانكوزو إتصل بالزوجين ونصحهم يبعدوا خالص عن الحجرة في الطابق العلوي، والي كانوا بيشوفوا فيها الذباب، وهي برضو الي الصوت الي أفزع الأب كان جاي منها. المكالمة كانت مليانة تشويش وجورج مافهمهاش غير بعد إنتهاء القضية أصلا. بعد المكالمة دي الأب مانكوزو أصيب بحمى لا تستجيب للأدوية، وطفح جلدي شديد جدا خاصة في باطن الكف، وكان شكله مشابه لآثار الأوتاد الي كانت في يد المسيح أثناء صلبه وغيرها كتير من مصائب لا تصدق وما إتذكرتش في الكتاب الي إتكتب عن القضية.هروب العائلة كان مغامرة طويلة، إنفجر فيها باب البيت في وشهم حرفيا، وكان في مادة خضراء لزجة بتطاردهم على السلالم.. الوضع كان كارثي فعلا وماقدروش ياخدوا أي حاجة من أغراضهم من البيت. أما قابلت جورج لوتز وسألته عن الي شافه أثناء هروبه، قال لي: إنت عارف يا إد وارن أنا شوفت إيه.

أحداث رعب أمتيفيل حصلت أثناء موسم الكريسماس، لكن في حادث بشع آخر حصل أثناء موسم عيد الفصح سنة 1974 وإستمرت تمن اسابيع تقريبا لحد ما إنتهت على يد طقس تطهير كنسي محترف. 

ودي هاتكون قصة آل بيكفورد الرهيبة..

تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.

#إد_لورين_وارن

#عالم_الشياطين

#شيرين_هنائي