الحلقة الرابعة عشر- عالم الشياطين
عالِم الشياطين
سيرة إد ولورين وارِن غير العادية
الحلقة 14
الشبح: هو كيان ماورائي، غير مادي، لاعقلاني. وغالبا ما يكون غير محسوس أو مُدرك من قِبَل حواس الإنسان. ذلك الكيان في مقدوره أن يكون مرئيا في بعض الأحيان ككيان عدائي يسبب المشاكل والرعب للبشر.
قاموس أوكسفورد الإنجليزي.
***
بيبتسم إد وبيفتكر أوائل إيامه في شغله كمحقق في الخوارق وبيحكيلنا:
- " كنت لسه مش واخد زمان على مخاطر المهنة دي. واحد من القدام في مهنة طرد الشياطين قال لي: عمرك ما هاتدخل بيوت وتواجه كيانات شريرة وترجع حياتك زي ماكانت أبدا. بمجرد ما تخطي برجلك في عالمهم المظلم هاتعيش في خطر للأبد إنت وكل الي بتحبهم. غضب عنك هاتبقى وحيد، وغير اي رجل تاني. وماتنساش إن القوى الي إنت بتتعامل معاها أذكى من أي شخص فاني، وعندهم حكمة ومعرفة عصور كاملة.
أفتكر ليلة ما أخدت المرايا السحرية من ستيفن كانت باردة والطريق كان عليه كتل تلج، فسوقت على مهلي، وكان معايا لورين. كان أول مرة آخد شيء مُدنس زي كده معايا البيت، فكنت قلقان من إن الشيطان المُرتبط بها يصب غضبه عليا فبقيت واخد حذري زيادة أكتر كمان وأنا سايق. المهم بعد خمس أميال كده من بيت الرجل، نزلت في حفرة. في الظروف العادية الحفرة مكانتش هاتفرق في العربية الحفرة كانت صغيرة. بس الي حصل دمرلي جنط العجلة الجديد والعجلة نفسها تماما. حاجة مش ممكن تحصل أصلا..العربية إتحدفت ناحية الجهة المعاكسة وبقت العربيات تزمر وتحاول تتفادانا بفرق كم إنش بس. معجزة إننا ماموتناش.
ركنت غيرت العجلة ولسه هاتحرك شوفت عربية نقل بمقطورة كانت جاية من الشمال عادي، فجأة غيرت حارتها وبقت في وشنا..العربية مكانش عليها أي علامة ولا لوحة أرقام ولا أي حاجة خالص كأنها خارجة من المصنع. وفجأة بدأت العربية ترمي علينا جالونات من مادة جيلاتينة خضراء وغرقت العربية، بقا مستحيل أشوف حاجة قدامي، حتى المساحات فشلت في إزالة المادة السميكة دي إلا بعد جهد طويل. بصيت من الشباك مالاقيتش العربية النقل.
نزلت نضفت الإزاز ومشيت كم ميل، ولقيت نفس العربية تاني وكررت كل الي عملته وغرقتنا بالمادة البشعة دي تاني!
مرة تالتة الوضع إتكرر، وبقا واضح إن في حاجة خوارقية في الموضوع. وقفت بالعربية شوية ومسحتها.. وإتحركت بعد فترة ولقيت تاني نفس العربية وإتكرر نفس الموقف للمرة الرابعة!
إتعودت بقا على حدوث مواقف مشابهة في طريقي من أو إلى القضايا الخوارقية، بس عمري ماشوفت المادة الخضراء دي تاني حتى إن ريحتها المقرفة لزقت في العربية فترة طويلة، وكانت ريحة شبيهه بالبول، ومافيش ولا عربية بلغت يومها عن إنها شافت أو حصل معاها حاجة زي كده.
موقف العربية النقل إتكرر طول الطريق..أكتر من اتناشر مرة ومكانش في قدامي أي طريقة علشان أهرب منها أو أتفاداها.
الدنيا هديت ساعة ولا حاجة والطريق كان ماشي كويس، لحد مالاقيت عربية ملاكي جاية نحايتنا من ورانا بسرعة خارقة، وكانت الليل دخل، بس العربية دي مكانش فيها أي نور من أي نوع فمالاحظتهاش غير أما قربت أوي. العربية قربت جدا جدا وكانت هاتخبطنا فعلا بس إنحرفت فجأة يمين وعدتنا بفرق كم بوصة. بصت لورين للعربية وحست كأنها الشيطان نفسه شخصيا.
كملت الطريق والعربية دي قدامنا، شوية ولقيته طالع كوبري بيؤدي لتل، ففرحت إني خلصت منه. بس مجرد ما طلع الكوبري على بُعد ميل كده، وقف العربية ولف بيها في عنف ونزل بسرعة رهيبة زي الطلقة ناحيتنا. مكانش في أي حاجة تتعمل علشان اتفاداها إلا لو قرر هو يقلل السرعة أو ينحرف يمين أو شمال. صوت العربية وهو جاي كان عالي جدا. قولت للورين تنزل في الدواسة، بقا قدامي ثواني أختار فيها حاجة تنقذنا، الف وارجع، ولا أمشي على طول؟ معرفش ليه حسيت إن التصرف الصح هو إني أمشي على طول. آخر حاجة قولتها للورين " إستغيثي بالملاك ميكائيل!". غمضت عنيا وبقيت خلاص مستعد للإصطدام..وقبل الإصطدام بكسر ثانية، العربية إختفت!"
واضح طبعا إن الكيانات الشيطانية كيانات ذكية، لها غريزة الدببة وحبها للتلاعب بضحايا بدلا من إفتراسهم مباشرة. علشان كده، الذكاء الشيطاني ده هو الي بيميز الظواهر الشيطانية عن إي ظاهرة خوارقية تانية.
ولطبيعة عمل إد ولورين، لاحظوا كمان إن الكيانات الشيطانية بتطور خططها وبتبدأ بمستويات تلاعب أقل وصولا لمحاولات القتل.
التحرشات دي بتبدأ ساعات من قبل ما يستقبل إد ولورين إتصال عن قضية خوارقية. بيدينا إد مثال و بيقول:
- "التحرشات دي بتحصل مرتين تقريبا في السنة، بعد الغروب. بس آخر مرة حصلت كانت الصبح. بعد الغدا، التليفون رن، ردت لورين بس مكانش في حد على الخط. بعدها بدقيقة رن تاني بس مكانتش رنة متقطعة طبيعية، كان بيرن بشكل مستمر زي جرس المطافي. اما لورين ردت سمعت صوت مبحوح حيواني جاي من التليفون. إتضايقت واديتني السماعة، وسمعت نفس الصوت. مجرد ما قفلنا السماعة، كلبنا الجيرمان شيبارد ابتدى ينبح يبشكل عنيف بره البيت. ثواني وسمعنا ضوضاء جاية من المكتب..الأثاث بيتحرك..حاجات بتتكسر..الوضع ده إستمر عشر دقايق. طبعا أي حد مكاننا كان هايجري يشوف إيه الي بيحصل، بس نصيحة، محدش المفروض يشوف وضع زي ده بعينيه قدر الإمكان.
عدينا ساعة، ونزلنا المكتب...كانت خرابة! اللوحات مقطوعة، الملفات متكومة ومقلوبة..كل حاجة حرفيا في الأوضة أو على الحوائط متكومة في النص.
الكيانات دي موجودة طول الوقت في البيت، بتقدر تشوفها بطرف عينك وهي بتسمح في عالم وسط بين العالم المادي والروحاني..بس إحنا وصلنا لإتفاق معقول، هم مايضايقونيش، وانا مش هارشهم بالماء المقدس."
طيب ليه بقا المكتب إتدمر؟
- " قبل أسبوع أو إتنين من بداية أي تحقيق بتحصل الحاجات دي. تقدر تقول إنذار أو تخويف. مجرد ما ده بيحصل، بنعرف إن شخص ما في مكان ما بيتعرض لأحداث خوارقية عنيفة، وغالبا مايعرفش من إد ولورين أصلا..لكن مع الأايام حياتنا بتتقاطع بشكل ما. وزي مابقول دايما، في خطة طويلة المدى الكيانات دي بتحطها ومابنقدرش نكشفها أبدا بشكل كامل."
الأشخاص الروحانيين والأتقياء هم الأكثر عرضة للمضايقات الشيطانية. حكالنا إد مرة عن الأب بيو، وإزي إنه كان بيدخل القلاية يلاقيها مقلوبة، والحبر الي بيكتب بيه مرشوش على الحوائط. الكيانات دي كانت بتظهر له على هيئة رهبان بتحيط بالسرير بتاعه، بيكتشف بعد كده إنهم مسوخ..كان بيمسكوه ويضربوه في الحوائط ويخبطوه على الأارض.
مرة شاف كيان من دول متنكر في هيئة الأب أوجستينو داخل عليه القلاية. الكيان المتنكر ده طلب منه يعيد نظر في طريقة حياته كشخص بعيد تماما عن متع الدنيا..وبدأ يتلاعب بالكلام والآيات وتفسيرها علشان الأب بيو يتهز. الأب بيو حس إن كل ده مش ممكن يطلع من الأب أوجستينو، فطلب منه يردد معاه (فليتمجد يسوع)، فإختفى الكيان فجأة وساب وراه ريحة كبريت خانقة.
- " هدف الشيطان العام هو دفع الإنسان للكفر.. والشياطين بتحس بالإنجاز فعلا أما تتلاعب بإيمان شخص مؤمن بالأساس. الكيانات دي تقدر تعرف حياتك كلها بماضيها وحاضرها، وبعض لمحات خاطفة من المستقبل. أما بتعامل مع شخص ممسوس، أول حاجة الكيان بيقولهالي على لسان الضحية هي: إدوارد، أنا عارف إنت من!."
بالرغم من إن إد مش رجل دين، إلا إنه بيقوم بعمل قريب جدا من عملهم إلى جانب تحقيقاته الماورائية. الشيء الوحيد الي مايقدرش يمارسه بدون تصريح هو طقس طرد الشياطين.
بعد سنين طويلة من دراسة مخططات الشياطين ومحاولة فهمها، عالم الشياطين العصري قدر كمان يدخل التكنولوجيا لتسجيل وبحث الظواهر الي ارهقت الاف من الباحثين قبله، وقربنا بشكل كبير من فهم المخططات دي. بيقول إد:
- في تلات خطوات بينتهجها الشياطين أثناء محاولات التلبس بالبشر وهم : الإبتلاء – الهجوم – الإستحواذ. وفي حالات نادرة، بيكون في خطوة رابعة وهي: القتل أو الموت نتيجة للإستحواذ. لو مافيش حد ساعد الضحية ووقف تدهور الأمور، الخطوات بتمشي دايما بترتيبها.
خلال فترة الإبتلاء، إستراتيجية الشيطان بتكون خلق أجواء من الذعر والخوف بينتج عنها طاقة روحانية سلبية. الطاقة السلبية دي بتبدأ في تحيطم إرادة الإنسان وقوته النفسية والجسدية. أطفال عائلة فوستر كانوا في مرحلة الإبتلاء، زيهم زي الساحر زيلنر. أما قضية الدمية أنابيل فكان المفروض تتصنف في مرحلة الإبتلاء برضو وبداية الهجوم. لو مكانش حد إتدخل وأوقف النشاط الشيطاني في القضايا دي كانت هاتتحول للمرحلة الأاصعب وهي الإستحواذ. عموما كل النشاطات دي مكانتش هاتحصل لو مكانش حد فتح باب المفروض كان يفضل مقفول."
الكيانات الشيطانية مالهاش قدرة على إختراق حياة البشر بدون إذن منهم. بيكمل إد وبيقول:
- " محدش يحب يتعرف على شيطان بنفس المنطق الي بيه محدش يحب يستكشف فيروس. الأشباح البشرية بتحاول تتواصل مع البشر لتوصيل رسالة معينة ساعات، وده مابيحتاجش إذن من البشر علشان يحصل التواصل، بينما في حالات الكيانات الشيطانية، الشيطان محتاج دعوة منك بإرادتك الحرة. في قانونين بيحكموا إختراقهم لعالمنا، قانون الجذب، إنك تفكر دايما في التواصل معاهم، وقانون الدعوة، لازم تدعوهم للدخول في حياتك.
هاديك مثال على قانون الجذب.. في قضية أنابيل، الممرضتين كانوا في حالهم عادي إيه الي خلا الشياطين تحاول تاخد منهم إذن للدخول في حياتهم؟ تفكيرهم الكتير وإهتمامهم بالطعم الي رموه الشياطين والمتمثل في الدمية أنابيل. رغم نيتهم الصافية إلى حد الحمق، لكن الشيطان لقا منها مدخل مثالي.
مثال تاني لقانون الجذب، أما يكون في شخص عنيف أو قاتل أو أو..بيصدر طول الوقت طاقة سلبية، الشياطين بتنجذب له تلقائيا..ممارسي السحر مثلا مثال قوي. أي ممارسات بتصدر طاقة سلبية بتخلي هالة الجسم أغمق، وبتبقى لها أثر الدم في أنف الضواري.
كمان الحالات اللي الإنسان فيها بيسيب أي حاجة تتحكم فيها..حالات الإكتئاب والغضب الشديد واليأس..لو ماقدرتش تتحكم في نفسك حاجة تانية هاتيجي تتحكم فيك.
بالنسبة بقا لقانون الدعوة، الإنسان ممكن يستدعي كيان شيطاني من خلال طقس سحري ما أو أي قناة مشابهة تؤدي غرض الرغبة في التواصل.
بالتالي، فإننا كعلماء شياطين أو رجال الدين معرضين للهجوم المستمر لأننا فعليا في قناة مفتوحة بيننا وبين الكيانات دي غصب عنا، إحنا عايزين وموافقين نتواصل معاهم لهدف أكبر، فلازم نتعلم نخلي علاقتنا بهم مستقرة أغلب الوقت لأطول فترة ممكنة."
إيه هو السحر، وإيه هي عبادة الشيطان؟ وإيه الي بيحصل بعد خطوة الإبتلاء؟ كلام كتير عنهم وعن جلسات الإستحضار ولوحات الويجا هانقراه بكرة إن شاء الله.
تابعونا البوست الجاي بكرة إن شاء الله. ماتنسوش إن اللايك والشير هو الشكر الي بنتمناه منكم مش أكتر.
#إد_لورين_وارن
#عالم_الشياطين
#شيرين_هنائي
____________
Comments
Post a Comment