الحلقة ‏الرابعة ‏عشر ‏- ‏حصاد ‏الشيطان

حصاد الشيطان

( عن قضية الإستحواذ الشيطاني على المزارع موريس ثريو- قصة حقيقية)

 الحلققة ١٤

. ركب رئيس الشرطة ليبوف عربيته، ووقف موريس من ورا الشباك يبص عليه، وعينيه بتنزف ده، وسائل أصفر سميك بينزل من بين شفايفه ووشه بيتغير لملامح مرعبة..ضحك ضحكة خبيثة وقال:

- الوغد ده مش هايعرف يمسكني..ولو حاول..هاقتله..

فقد موريس الوعي ووقع على الأرض، وفضل مكانه لحد ما نانسي رجعت البيت بعد نص ساعة من مشوار تسوق. رمت الأكياس على الأرض وقعدت جنبه تفوقه:

- إيه الي حصل؟

- مش عارف..شكلي أغمى عليا..الباب كان بيخبط روحت أفتحه. ده كان ميعاد ليبوف الي إتفق عليه، الساعة 7..

- ومن كان على الباب؟ وليبوف راح فين؟

- مش عارف..أغمى عليا قبل ما أفتح..يمكن جه وماحدش فتح له..يمكن رجع في كلامه..

- أحسن..أنا مش مرتاحة له..شكله عايز يوقعك في أي مشكلة وخلاص.

_____________________

تاني يوم، صديق قديم لموريس راح يزوره، وكان شغال مقاول في ولاية تانية وبقاله كتير ما زارهوش، لكن أما سمع المشكلة راح له فورا. 

دخلته نانسي المطبخ وقعدته مكان ما موريس بيحب يقعد كعادته جنب الشباك. سحب الكرسي الي قدام صديقه وقعد وقال له:

- إيه يا موريس، ليه ماقولتليش إنك تعبان؟ بص جبتلك إيه؟ لسه راجع من كندا أول إمبارح..

طلع من شنطته زجاجة مياة مقدسة من كنيسة سانت جوزيف.

- جبتهالك مخصوص أما قريت الخبر..

كان موريس لسه لا سلم على صاحبه ولا بص له أصلا، كان باصص من الشباك. نانسي اُحرجت وأخدت الهدية من هنري وحطيتها قدام عينين موريس وقالتله:

- بص يا فرينشي..بص هنري جابلك إيه من كندا؟

- مش عايزها..

موريس كان بيتكلم بطريقة آلية وهو لسه باصص من الشباك في شرود. قربت الزجاجة منه تاني وقالت له:

- خدها يا موريس..دي بركة..

- لا..مش عايزها دلوقتي..

- طيب هارش عليك شوية منها وأشيلها..

بلت نانسي صباعها وأول ما لمست جبهة موريس جسمه إتشنج، وبدأ الدم ينزل من بين شفايفه..نقطة المية الي لمست جبهة موريس إتحولت لدم أصلا. 

قبل ما هنري ونانسي يفوقوا من الصدمة، قام موريس ودخل الحمام وقفل على نفسه. هنري إتأكد من الي قراه في الصحف وخاف فعلا لكنه تماسك.

بعد ربع ساعة خرج موريس من الحمام كأنه أول مرة يدخل المطبخ في اليوم ده.

- هنري! جيت إمتى؟ حمد الله على السلامة..إنت قاعد من بدري؟!

هنري مسك أعصابه وتعامل عادي مع موريس، وفضل معاهم طول اليوم لحد العشا، بس مكانش قادر يرفع عينيه من على موريس من قلقه.

بليل أما جه وقت رحيل هنري، بدأ الصديق يقتنع إن مشكلة موريس طبيه، فرينشي كان طبيعي جدا طول اليوم ومش شكل حد ممسوس.

مجرد ما وصل هنري أول المزرعة حس بدوار غريب وألم فظيع في معدته..صداع كأن دماغه هاتنفجر..إتجمد في مكانه في العربية من الألم وفضل يدعي إن الألم يخف شوية علشان يقدر يرجع بيته، لكن الالم زاد وزاد معاه ريحة شيئة جدا في العربية.

بعد ساعة، قدر يفتح الشباك، وفكر يرجع بيت موريس تاني من التعب، لكنع فضّل يرجع بيته أحسن..فضل يقاوم شعور الدوار لحد ما خرج من القرية، وكل ما كان بيبعد كل ما بقا يتحسن. أما وصل بيته فضل يتقيأ طول الليل تاني.

مراته قالتله أما شافت تعبه:

- مش لازم تروح لموريس ده تاني..ايا كان الي في بيته فشكله ما عجبهوش هديتك.. بلاش يا هنري تقرب للرجل ده تاني.

هنري مكانش قادر يجادل لأنه كان مرعوب..

____________________ 

هنري حكى لنانسي في التليفون الي حصل معاه، وهي بدورها حكت لإد وارن أما جالهم. في حضور موريس بدأ إد يشرح الي حصل:

- عامل الخوف.. ده الي بيحاول الشيطان يعمله أول ما يحس بتهديد. هدية هنري أغضبت الشيطان، والي أغضبه أكتر إن في حد بيحبك وبيحاول يساعدك، ولازم الشخص ده يبعد.

رغم إن هنري لاحقا شهد في الإبرشية باللي شافه أما زار موريس، إلا إنه ما راحش بيت موريس تاني أبدا.

_______________

نانسي كانت في السرير قلقانة، وموريس كان نايم جنبها ودافن وشه في المخدة. من أول ما دخلت تنام وهي سامعه صوت زي صوت الميه بس مش منتظم. كانت فاكراه صوت من الحمام. بعد شوية أدركت إن الصوت جاي من تحت، من تحت السرير تحديدا، وكان صوت كأن في حيوان بينهش لحم نيء.

إترعبت وماقدرتش تتحرك أو تتكلم..إستنت يمكن الصوت يروح لوحده، لكنها بدأت تسمع صوت عواء مكتوم من الكائن الي بياكل تحت السرير ده.

نانسي ما قدرتش تنام ليلتها، ولا في أي ليلة تالية تاني..

___

مع إقتراب المواسم والأأعياد الدينية، الظواهر الشيطانية  بتزيد وبتكون خطرة. حاول إد بكل الطرق يستعجل الكنيسة في الموافقة قبل ما يحصل شيء خطير.

لكن إسبوع مر وماجاتش الموافقة.

بعد عيد الفصح بيومين، تلقى موريس مكالمة من الأب بوير وطلب منه فيها يجيله بيته المرفق بالكنيسة. ظن موريس إنهم بعتوا طبيب نفسي تاني علشان يفحصه، فقرر يستنى إد ولورين ويروح معاهم، فطلب إد من هنري لوبا صديق موريس يجيلهم على الكنيسة علشان يشهد قدام الطبيب بعد ما فشل في إنه يلاقي رئيس الشرطة ليبوف في بيته أو في القسم بسبب مرضه ورحيله للعلاج في مدينة قريبة، أما الشرطي برنارد الي شاف الي حصل لموريس قبل كده تراجع لسبب غير معروف عن الشهادة أو الإجلاء بأي تصريح للصحافة عن الموضوع ده.

المجموعة وصلت، ولدهشتهم لقوا الي مستنيهم مع الأب بوير رجل دين كاثوليكي، وإندهشوا أكتر أما عرفوا إنه الأسقف تيموثي هارينجتون الي كلمهم عنه الأب بوير قبل كده.

الأسقف كان من أصل آيرلندي، قصير القامة، أصلع مع بعض الشعر الرمادي الخفيف، ولابس نضارة.

بعد ما عرف الوضع الأسقف الي فيه موريس والضغط النفسي عليه من الصحافة والناس، قرر ييجي يقابله بنفسه. إتجمع الحضور حواليه ودار حوار طويل مريح بين كل الأطراف. وأخيرا قال الأسقف هارينجتون:

- موريس..أنا هاصلي لك..ممكن تقف؟ سيد وارن وسيد لوبا، ممكن تقفوا وراه كل واحد على جنب؟

إد قلق من تصرف الأسقف، كان خايف الأمر يفلت من إيدهم والرجل يتضرر. كمان موريس ممكن يهاجمهم كلهم.

وضع رجل الدين كفه على راس موريس وبدأ يقرأ صلاة القديس الملاك ميخائيل. نانسي في هدوء فضلت تكرر الصلاة في سرها.

- يا مار ميخائيل رئيس الملائكة، دافع عنا في المعارك وكن عوننا ضد شر الشيطان ومكامنه..

مع بدأ الصلاة، بدأت ملامح موريس تتغير وجبهته تورم، وشكل بؤبؤ العين ياخد هيئة غريبة مرعبة. وإتكلم موريس بصوت غليظ عميق.

- أنا في عمق روح الرجل ده، روحه ملكي..

كمل الأسقف صلاته وفضل موريس يصرخ:

- ماتقدرش تدمرني أبدا..ماتقدرش تجبرني أرحل..

كمل الأسقف الصلاة، ووقع موريس على ركبه. رش الأسقف المياة المقدسة على المزارع بإستمرار، لحد ما موريس تبول على نفسه وفاق.

ركع الأسقف جنب موريس وحط كفه هلى كتفه وبص لعينيه وقال له:

- إنت أخويا وأنا عايز أساعدك.

هز موريس راسه وعينيه دمعت. قامت نانسي والأب بوير ويغيروا ملابس موريس، بعدها قعد مع الأسقف يشربوا قهوتهم.

- بدعي ربنا إن صلواتي تكون نفعتك..

- وأنا كمان يا حضرة الأأسقف..الف شكر لك.

لاحقا قالت لورين لإد إنها مشافتش حد يعمل الي عمله الأسقف وهو مش مستعد كده. 

إد إقترح يتغدوا سوا في مطعم قريب. لاحظ أن نانسي وموريس مزاجهم إتحسن فحب يحسنه أكتر.

قعدوا ياكلوا حوالين ترابيزة صغيرة، وكان موريس بياكل ويبتسم ويقول:

- الأسقف ده طلع راجل ظريف أوي..

لكن فجأة مال موريس لقدام ناحية إد ولورين وصوته إتغير تماما وقال:

- عايز أبصق على وشكوا إنتوا الإتنين!

محدش رد، لكن التلاتة إتأكدوا إن الأمر ما إنتهاش..

__________________

في الأيام التلاتة التالية، الدنيا كانت هادية في بيت موريس أثناء تواجد عدد من المحققين والباحثين من المعهد الروحاني في نيو إنجلد.

المجموعة الي كانت موجودة في اليوم ده كانت مؤلفة من الراهب فيليب مورفي،ضابط الشرطة روجر كويل، آل فوجل ولاري إلوارد طلبة من المعهد وحراس غابات، وكريس مارشال وكريس ماكنيل، وراي جيرفرسون طالب من المعهد وعامل في مصنع طيارات، بيتر فالوكيفيتش، وداني سانت لورينت، وماسيللا ليون، وكلهم طلبة في المعهد.

بعض من الحضور مكانش لسه شاف أي قضية خوارقية، وبعض منهم كان شغال مع آل وارن من سنين.

الليلة دي رن جرس التليفون في بيت إد ولورين، فردت لورين لأن إد كان نايم. أول مارفعت السماعة سمعت صوت كريس مارشال وفي الخلفية صوت نانسي بتصرخ وتقول (يارب..يارب....حد يخلي الي بيطير ده يبطل..)

كريس قال للورين إن موريس كان نايم جنب حفيدته على السرير، اما سمع هو وكريس ماكنيل صوت حاجة بتتكسر وصوت نانسي بتصرخ.

أخدوا الكاميرا وجريوا على الأوضة، كانت نانسي بتحمي وشها من محتويات الأأوضة الي كانت بتحاول تخبط فيها وبتتكسر حواليها على الحيطان.

طلبت لورين من الشابين يحاولوا يهدوا نانسي ويخرجوا كلهم من البيت مؤقتا علشان ماحدش يتصاب لحد ما النشاط يتوقف. والمهم يفضل حد  صاحي طول الليل لحد ما يجيلهم إد الصبح.

إد ولورين كانوا عايزين يقضوا وقت أطول في بيت موريس مع الفريق، لكنهم كانوا مشغولين بقضية تانية، لكن إد مع الوقت أدرك ن حالة موريس محتاجة تواجدهم بشكل أكبر.

تاني يوم، بعتت نانسي أحفادها علشان يقعدوا مع أصدقائهم لحد ماالأأمور تستقر، مكانش حد بيقدر ينام مع تصاعد حدة الأحداث الغريبة، خاصة مع غياب ليبوف عن قسم الشرطة وإحجام الحراس عن الذهاب لبيت موريس بلليل، فكانت الشياطين جوه البيت، والمتطفلين براه مخليين الوضح جحيم فعلا.

عرف إد وارن إن ليبوف، بعد خروجه من منزل موريس، روح بيته عادي، وصحي الصبح عنده حمى وطفح جلدي شديد. إستمر في هلوسة مستمرة مش نافع معاها أدوية لمدة 48 ساعة. أثناء هلاوسه كان بيردد آيات من الكتاب المقدس.

بعد ما فاق من الهلاوس، فضل بيعاني من هزال وتعب رغم كون تحاليله مافيهاش أي أمراض، لكنه جواه كان عارف إن مرضه له علاقة بموريس بشكل ما، لكن عقله كان رافض تماما الإعتراف بده.

______________

الصباح التالي، موريس ملا طبق بالميه وحطه في الحمام علشان يحلق دقنه، بص في المرايا لقا نفسه إتنين!!

تابعوا الحلقة 15 بكرة إن شاء الله، نتمنى الحلقات تعجبكم ومجرد اللايك أو الشير بيشجعني جدا أكمل. 

شكرا لثقتكم في المحتوى الي بقدمه ومنورين دايما.

#حصاد_الشيطان

#شيرين _هنائي