الحلقة السادسة- ،في مكان مظلم
في مكان مظلم
( قصة الإستحواذ الشيطاني على الطفل ستيفن سنيديكر وعائلته- قصة حقيقية من ملفات عالمي الشياطين إد ولورين وارن)
الحلقة السادسة
مع إنتهاء الصيف، جه الوقت إن مايكل، أخو ستيفن، من عند جدته أم أبوه.
يوم سبت، أخد آل الأولاد وراحوا المطار يستقبلوا مايكل ويجيبوه البيت، وفضلت كارمن في البيت علشان تحضرلهم غداء حلو.
طبخت كارمن وليمة، فهي من عيلة إتعود أفرادها على الإحتفال بكل شيء سواء كبير أو صغير. خرجت الأطباق وحطيتها على الترابيزة وخرجت أدوات المائدة، وسمع صوت باب الشقة بيخبط فسابتهم وراحت تشوف من.
لقت على الباب واندا جين والده كارمن.
- حبيبي وصل ولا لسه؟
- على وشك..تعالي..
- ستيفن عامل إيه؟
- زي ما هو..لسه قدامه في العلاج إسبوع كمان..إلا لو للدكاترة رأي تاني..
- ولو لسه ماخفش؟
- معرفش..مش هايبقا فاضل إلا الدعاء.
أخدت كارمن أمها ودخلت معاها المطبخ علشان يكملوا تحضير السفرة، لكن لدهشة كارمن، مالاقتش الأطباق ولا أدوات المائدة الي كانت طلعتهم على السفرة!
طبعا كان وضع غريب، رجعت المطبخ لقت الأطباق في الدولاب زي ما هم. صعب تكون تخيلت إنها طلعتهم، بس مافيش تفسير تاني غير كده.
سمعت كارمن صوت عربية آل، وإندفع مايكل جري عليها يحضنها. دخل وراه باقي الأولاد وقضت العائلة يوم جميل كله ضحك ومرح.
____________________
6
النوم في الأسفل
نزل ستيفن البدروم وبدأ يحس ببرودة الجو مع دخول الليل. مايكل كان سبقه هو وكارمن وآل وكان واضح من كلام مايكل وصوته إن المكان عجبه.
وقت الغدا ستيفن كان أخد مامته على جنب وطلب منها ماتقولش حاجة لمايكل عن إنه مابينامش تحت.
- خليني أنا أقول له يا ماما، أنا هانزل أنام تحت من أول النهاردة.
- فعلا؟!
- مايكل رجع..بس مش هنام لوحدي.
- يعني إيه مش هتنام لوحدك؟
- قصدي مش هنام في أوضتي.
- إنت عايز تنام في أوضة أخوك معاه؟ ليه بس ما كل واحد له أوضة والدنيا واسعة.
- عارف..بس لو هنام تحت مش هاينفع أنام في أوضة لوحدي.
- إنت لسه خايف من البدروم؟..خلاص هاقول لآل ينقل سريرك بس نستأذن مايكل الأول.
الحقيقة مايكل ماعارضش، بالعكس الفكرة عجبته وساعدهم في نقل السرير وبعض حاجات ستيفن لأوضته.
الوضع الجديد ريح آل وكارمن إلى حد كبير، إعتبروها خطوة لتقبل الولد لإنه ينام تحت.
أما نزل ستيفن سأله آل:
- ها إيه رايك؟
بص ستيفن حواليه للسريرين والترسيحة والدولاب والأأرفف..هز راسه، الأوضة تصلح لحجرة نوم لولدين، بس الأوضة كانت بتستخدم لأغراض أغرب بكتير من النوم.
- حلو أوي..
- عارف إنكم هاتتخانقوا مين هاينام على أنهي سرير، فماجبناش باقي حاجتك من أوضتك لحد ما تختار هاتنام فين وتاخد أنهي دولاب.
ساب آل وكارمن الولدين وطلعوا، قعد مايكل على طرف السرير وسأل ستيفن:
- إزاي بقا إنت مش بتنام تحت؟!
بص ستيفن ناحية باب أوضته وقال وهو سرحان:
- هاقولك، بس تعالى معايا نجيب حاجاتي من أوضتي..بس لازم توعدني الي هاقولهولك يفضل بيننا بس، ماتقولش لحد.
- طبعا..ماشي..
حكي ستيفن لأخوه كل حاجة وهم بينقولوا الحاجات. وحكاله الي بتشوفه ستيفاني كمان، وقال له في النهاية إن البيت كان بيت جنازات.
إبتسم مايكل ابتسامة عريضة وقال:
- بيت جنازات؟! حلو ده!
- مش فاهم إيه الحلو في كده.
- هه؟ لا مش قصدي.. بس حسيتها حاجة مسلية وغريبة..فاهم؟
- حاجة مسلية وغريبة إنهم كانوا بيجيبوا الناس الميتين هنا؟ ولا قصدك على تشريح الجثث في الأوض دي؟
الإبتسامة إختفت من على وش مايكل وقال:
- تصدق ما جاش على بالي الحوار ده؟ تفتكر علشان كده بتتخيل إنك بتسمع الأصوات دي؟
- بتخيل؟ أنا فعلا بسمعها! انا زهقت بقا.. ستيفاني قالت إنك هاتصدقنا، بس طلعت عيلة مش فاهمة حاجة..وإنت كمان طلعت عيل.
- لا ما اقصدش والله..انا مصدقكم، بس مستغرب..الموضوع غريب، فاهم؟
خلص الولدين نقل آخر صندوق من أوضة ستيفن، وقعد كل واحد على سريره. سأل مايكل:
- تفتكر البيت ده مسكون؟ ده الي عايز تقوله؟
- كل الي عايز اقوله هو ان في أصوات مصدرها هنا، في البدروم. والأصوات دي بتنادي عليا.
- أحكيلي بالتفصيل بقا، أصوات إزاي وبتقول إيه؟
- غالبا صوت رجل، ساعات بيبقا شبه صوت بابا آل، ودايما بيناديني بإسمي. بيفضل يقول لي تعالى تحت وفي حاجات عايزني أشوفها. عمره ما قال زيادة عن كده.
- يبقا كده المفروض ما نسكنش هنا.
- بابا وماما مش هايقدروا ينقلوا تاني..مصايف علاجي خلصت فلوسهم كلها..يدوب معاهم فلوس إيجار الشقة دي.
- بالمناسبة..انت عامل إيه؟ ما قولتليش العلاج اخباره إيه؟ اسف إني ما سألتكش بدري بس مكانش في مناسبة.
- زي ما أنا..انا عارف إنه سرطان فمش متوقع حاجة..
سكت الولدين..سيرة الرعب والسرطان خلت كل واحد فيهم قلبه يقع في رجليه. بقا صعب انهم يبصوا في عينين بعض ويعترفوا بخوفهم. أخيرا مايكل قرر يتكلم في الموضوع الأخف والأكثر بهجة بين الموضوعين.
- هانعمل إيه في البيت، والأصوات والست الي ستيفاني بتشوفها؟
- معرفش..نستنى ونشوف إيه الي هايحصل.
_______________________
مع حلول الليل أكتر،ستيفن بدأ يقلق زيادة. فضل باصص على الساعة وهو بيتفرج مع عيلته على التليفزيون، بيسأل فسه في خوف إمتى هايقولوا انه وقت النوم وكل يروح على سريره؟
بعد ساعتن من مشاهدة الأفلام، قام مايكل وأعلن إنه عايز ينام، ودي كانت إشارة لستيفن إنه لازم ينزل مع أخوه، بس قال لنفسه هل هايبان عيل لو نزل معاه دلوقتي؟ هل يستنى شوية بعدين ينزل؟ لو استنى ممكن يلاقي مايكل راح في النوم، وهايبقا الوضع مرعب.
- انا كمان عايز أنام..
قالها ستيفن وهو بيمثل إنه نعسان، ونزل مع أخوه البدروم. قفل ستيفن باب اوضته من غير ما يفكر هو ليه عمل كده، ونام على السرير الي تحت الشباك، ونام مايكل على السرير المجاور. لكن مايكل قام تاني واتجه ناحية السلم.
- رايح فين؟
- نسيت اغسل أسناني يا عم، مالك في إيه؟!
غرس ستيفن صوابعه في المرتبة في رعب وهو بيراقب مايكل وهو طالع على السلم وبيختفي تدريجيا.
وستيفن بقا وحيد..
________________________________
آل كان سرحان في التليفزيون، وكارمن بتفكر في ستيفن، هل هاتعدي الليلة على خير؟
الطفلين كانوا بيلعبوا سوا على الأرض، بعد دقايق سألت كارمن آل:
- تفتكر ستيفن هايغير رأيه عن البيت بعد رجوع مايكل؟
ما ردش آل، كان لسه سرحان وهو بيشرب البيرة بتاعته.
- آل!
- إيه؟! في إيه؟!
- انا بكلمك ما بتردش.
- بتفرج على الفيلم، كنتي بتقولي إيه؟
كررت كارمن سؤالها، فجاوب آل في عصبية:
- أحسنله يمشي أموره، انا مش هاسمح بكلمة تاني عن العبط الي بيقوله ده.
- ما الولد بقاله فترة ما بيقولش حاجة.
- أحسن برضو.. ممكن تجيبيلي بيرة تانية؟
_________________________
ستيفن حس إنه تافه أوي علشان يخاف كده. مايكل رايح يغسل أسنانه مش مسافر يعني. وبعدين نور الأوضة لسه منور.
فتح ستيفن درج الكومود وطلع الووكمان، حط السماعات ونام على جنبه وهو بيقلب في محطات الراديو على حاجة تسليه. ما بين صوت التشويش سمع صوت باب أوضته بيتفتح ببطء. استادار بسرعة ولقا الباب بيتوارب ووقع الووكمان من إيديه...
إنتظروا الحلقة السابعة غدا إن شاء الله، ودعمكم مهم جدا وهو الي بيشجعني أكمل، لايك صغيرة بتسعدني جدا.
مرفق صورة لكارمن وآل سنديكر من لقاء تليفزيوني ومعاهم إد وارن عالم الشياطين.
Comments
Post a Comment