دليل ‏توبين ‏ح4

دليل توبين الروحاني

تأليف وتجميع: كيم موهان- راي سانتنز

ترجمة عامية: شيرين هنائي

غلاف الطبعة المصرية: مي جمال

_______________________

ملحوظة من المترجمة: دليل توبين قد يكون كتب خيالي تماما والمؤلفين إدعوا إنه حقيقي، وقد يكون حقيقي طبعا ومؤلفه حقيقي. في الحالتين الكتاب يفتقر للدقة التاريخية في بعض المواضع.

التالي هو ترجمة من كتاب توبين على لسانه.

_____________________________

إنبيلولو:

نسيب مصر مؤقتا رغم مكانتها في قلبي، ونروح سوا للحضارة السومرية القديمة الي عمرها ما فشلت في إستغلال أرضها الي رزقها بيها ربنا بين نهري دجلة والفرات. المكان ده بيقع مابين مكانين صعب يكون فيها حضارات كبيرة، فكان شماله جبال وغربه صحراء.

ربنا رزقهم كمان بجو معتدل وأرض خصبة، لذلك كان أهل سومر القدماء بيقدموا قرابينهم ومحبتهم للمعبود الخالق إنكي ورب الأنهار إنبيلولو.

كانت مهمة إنبيلولو هي ضمان سريان النهرين، ولسه لحد النهاردة الأرض الواقعة بين النهرين خصبة جدا رغم إختفاء السومريين في غياهب التاريخ.

بعد هجر السومريين للديانات الوثنية وعبادتها، إختفى إنبيلولو وسيرته لمدة أربعين قرن لحد ما بدأ نشاط إقامة السدود على الأنهار وبدأ الشهود يشتكوا من حركة المياة الغربية وإندفاعاتها المفاجئة الي بتهدم السدود دي في يوم وليلة. كان في لوحات طينية قديمة منقوش عليها تهديد إنبيلولو لكل من يكدرصفو الماء أو يعيق حركتها. رجع الناس تقرا النقوش دي وتقلق.

كان في وقتها حكايات تانية عن كيان بتلبس الاشخاص المسؤلين عن بناء السدود ويخليهم يغرقوا وهو نايمين! بيلاقوا الضحية غرقانة وفراشها غرقان ميه بدون مصدر.

عموما الحكايات دي كانت قديمة وسمعتها كأساطير من بعض الفلاحين هناك. دلوقتي مافيش ذكر لإنبيلولو إلا أما حد بيبني سد صغير لأغراض الزراعة ويصحى يلاقيه واقع بدون سبب، أو يلاقي زرعه غرق في ساعات الليل المعدودة. حوادث زي دي مالهاش تفسير إلا زعم بعض علماء الروحانيات إن إنبيلولو مكانش معبود عند السومريين، وإنما مخلوق عايش في الأنهار وبيدافع عن مكان تواجده.

أساطير ممثالة عن مخلوقات مائية روحانية سمعتها في النوبة والصين وأمريكا الجنوبية. هل كلهم إنبيلولو باسماء مختلفة؟ هل بنواجه شعوب من الكيانات الروحانية العايشة في الأنهار وبتمنعنا من تدميرها؟

ماعنديش إجابة قاطعة، لكن فكر فيها عزيزي القاريء.

ملاحظة من الطبعة الجديدة للكتاب:

إنبيلولو مكانش إسم معبود في بلاد سومر، بل كيان روحاني عايش في الأنهار. الكيان ده ماعندوش ذكاء بشري وغرضه الوحيد هو حماية أراضيه حتى لو بالعنف والقتل.

علماء روحانيات في العصر الحديث بتربط مابين طاقة حركة الماء وبين بوابات طاقة بتتفتح في الأعماق وبتسمح لكيانات روحانية معينة بالعبور لعالمنا، وإنبيلولو أو أيا كان إسمه في باقي الحضارات النهرية واحد من الكيانات دي.

____________________________

بكرة إن شاء الله هانكمل جولتنا الروحانية في حضارات العراق القديمة. دعمكم بلايك أو تعليق أو مشاركة هو الي بيخلي الترجمات تستمر على الصفحة.

ملحوظة من المترجمة:

نظرا لقلة الإقبال على الحلقات السابقة من دليل توبين، ونظرا لتعلق عدد من القراء بالكتاب وحبهم لمحتواه، فقررت أترجم منه كيان روحاني واحد يوميا إلى جانب البوست اليومي من رواية مترجمة من إختياركم بحيث نمسك العصاية من المنتصف ونراضي الي عايز دليل توبين والي عايز رواية رعب مترجمة.

تحياتي وتقديري لكم جميعا.

لينك الحلقة الخامسة

https://m.facebook.com/story.php?story_fbid=10158605328095929&id=559350928