دليل ‏توبين ‏ح5

دليل توبين الروحاني

تأليف وتجميع: كيم موهان- راي سانتنز

ترجمة عامية: شيرين هنائي

غلاف الطبعة المصرية: مي جمال

الحلقة الخامسة

_______________________

ملحوظة من المترجمة: دليل توبين قد يكون كتب خيالي تماما والمؤلفين إدعوا إنه حقيقي، وقد يكون حقيقي طبعا ومؤلفه حقيقي. في الحالتين الكتاب يفتقر للدقة التاريخية في بعض المواضع.

التالي هو ترجمة من كتاب توبين على لسانه.

_____________________________

نيبو:

أقدر اعرف الكيان الروحاني ده جه منين لأنه زارني شخصيا.

نبو في حضارة مابين النهرين يقال إنه "كاتب الآلهة" وهو إبن مردوخ، واحد من الآلهة الكبرى في حضارات العراق.

في بدايات القرن العشرين كنت شغال زي ما قلت لكم في شركة شحن في إسكندرية. كنت مرتاحح وسعيد بإقامتي في مصر بس مع الوقت إكتشفت إن الشغل نفسه مكانش مناسب لميولي.

في يوم كان الشغل مرهق جدا وحالتي النفسية مش كويسة، ونمت على مكتبي من التعب، وصحيح على صوت حد بيسلك حنجرته. إفتكرته مديري وضبطني وأنا نايم. لكن الرجل لي كان واقف قدامي كان شخص ما أعرفهوش. كان شاب لابس عباية وصندل وماسك عصاية وقطعة حجر مسطحة. قبل ما أتكلم إتكلم هو وقال:

- شغلك مش مناسب لك، إت مكتوب لك تكون مُدون.. دور وإبحث وأكتب وهاتوصل.

طبعا إفترضت إن ده حلم جه من رغبتي في تغيير شغلي ومن حبي للكتابة والبحث. فعلا الرجل إختفى من قدامي.

الرغبة في الكتاب تملكتني جدا من وقتها، مابقتش قادر اشتغل شغلي الروتيني وبدأت أقرا أكتر وكتاب يجر كتاب وكل الكتب الي كانت بتقع تحت إيدي كانت عن الآثار والأساطير.

كملت طريقي في البحث الروحاني وماقابلتش نيبو تاني، لكن في اثناء جولتي البحثية في أمريكا قابلت في مصحة عقلية شخص إسمه تيرون بريدر، وحكى لي حكاية غريبة جدا عن إنه كان بيحب يكتب من وهو صغير وكل الي كان بيكتبه مكانتش بيتنشر أو يعجب حد. في يوم كان في غرفة مؤجرة في نُزُل في نيوجيرسي وكان بيحاول يلاقي إلهام. بقا رجل قدامه بنفس مواصفات الشخص الي شوفته في مصر. وقال له كلام مشابه وطلب منه إنه يتبعه لو عايز يكون كاتب مشهور.

تيرون مكانش عارف يتبعه إزاي لأن الرجل إختفى، وبعد أيام بدأت تقع تحت إيد تيرون وثائق وكتب ملهمة جدا وبدأ يكتب. كان بيقول إنه أول ما بيكتب بيجيله حمى ومابيكونش واعي هو بيكتب إيه، لكن بعد ما بيخلص بيلاقي نفسه كاتب عن حاجات غريبة ورابط بينها وبين بعض بشكل مدهش. أما عرض نصف الكتاب الي كان بيكتبه على ناشر تحمس له جدا، وبدأ يكتب بسرعة أكبر علشان يخلص كتابه، لكن مع الكتابة كان بيجيله هلاوس وبيتخيل إن في حد بيراقبه وعايز يقتله. كان بيفقد الوعي لأيام لكنه كان بيفوق بيلاقي نفسه كاتب صفحات كتير مش فاكر كتبها إمتى. ضغط الهلاوس كان بيزيد وفي مرة فقد الوعي صحي لقا نفسه في مستشفة أمراض عقلية. قالوا له إنه طعن نفسه فوق أوراق كتبه، واما حاولوا ينقوله المستشفى كان بيطعن أي حد يقرب منه.

الكتاب الي كتبه تيرون فقد طبعا أثنء تحريات الشرطة غير إنه غرق دم، وتيرون محجوز في المستشفى بيتلقى علاج لأجل غير مسمى.

في لندن قابلت سيدة فاضلة رفضت أذكر إسمها، كانت مش متعلمة يادوب بتفك الخط. وكانت عايشة عادي وسعيدة وفجأة بدون سبب حلمت حلم مش قادرة تفتكره أوي وصحيت بعدها عايزة تكتب.. بسبب الرغبة المجننة دي فقدت شغلها وصحابها وبقت وحيدة ومفلسة وللمرة التانية تشوف حلم غريب بس المرة دي كانت فاكراه وجه في عقلها إن الي شافته في الحلم إسمه نيبو.

قال لها إنها لو عايزة حياتها ترجع تاني لازم تتبعه وتكتب. 

تاني يوم شخص جالها وقال لها إنه قرأ حاجات كانت بتنشرها في الجرايد وعجبته وعايزها تكتب كتاب بس ماتكتبش إسمها عليه وعرض عليها مبلغ كبير.

الكتاب كان كتاب في طلاسم وبلغة ماتعرفهاش بس لقت إنها فاهماها وتقدر تكتب عنها. كتبت فعلا الكتاب ده وأما خلص أدركت إنها ماتعرفش عنوان الرجل الي طلب منها الكتاب وماجاش تاني ياخده.

الكتاب بعدها ضاع ماتعرفش راح فين، وظهر الي طلب منها الكتاب تاني ومكانتش عارفة تقول له إيه ولا عارفة ترجع له الفلوس الي أخدتها منه لأنها إتصرفت. هربت منه وفضلت قاعدة في الشوارع مشردة لحد ما جمعية نسوية أخدتها في دار رعاية. السيدة عدى على لقائها بنيبو عشر سنين وعندها إيمان قوي إنه هايوصلها خلال لسنة العاشرة وهاينتقم منها.

بعد سنتين روحت دار الرعاية دي تاني أتطمن على الست قالولي نها هربت. مالاقوهاش في أوضتها من سنتين ومايعرفوش عنها حاجة.

نيبو يمكن في معتقد أهل العراق القديمة إله، لكن صفاته وعلاقته بالكتابة بتفكري بأساطير عربية عن مكان مسكون بالجن إسمه وادي عبقر، والي عايز يلاقي الهام أو موهبة بيروح الوادي ده ويفضل يمشي فيه لحد مايقابل أحد المخلوقات الروحانية الي عايشة فيه ويديه الموهبة أو الإلهام، لكن بتكون ثمن عطية الكيان ده دايما الموت بعد فترة أو الجنون.

أنا شخصيا بدات أخاف، مر على لقائي بنيبو 15 سنة تقريبا ومعرفش لو هاييجي ينتقم مني في يوم من الأايام ولا الكلام الي حصل ده كله أوهام أو تخاريف. لكن في ظني إن تكرار المشاهدات دي عزيزي القاريء بتثبت إن في كيان ما وتحت أي مسمى بيدي الموهبة وبياخدها تاني حياة.

_____________________________________

ملاحظة من المترجمة: وادي عبقر أسطورة موجودة عند العرب والشعراء زمان كانوا بيهيموا في الوديان وبيدوروا على مانح للإلهام. 

في مقدمة كتاب توبين والي ترجمتها في البداية، تم ذكر إن توبين نفسه إختفى بعد وفاة صديقه شوبسبري سنة 1924  ومحدش يعرف لو كان مات في مكان مجهول مثلا أو راح فين. الشك في كونه شخصية حقيقية مبنى على نقطة إختفاؤه التام وعدم وجود مؤلفات له سوى دليل توبين ده.

_________________________

بكرة إن شاء الله هانكمل جولتنا الروحانية في حضارات العراق القديمة. دعمكم بلايك أو تعليق أو مشاركة هو الي بيخلي الترجمات تستمر على الصفحة.

لينك الحلقة السادسة

https://m.facebook.com/story.php?story_fbid=10158611342970929&id=559350928

ملحوظة من المترجمة:

نظرا لقلة الإقبال على الحلقات السابقة من دليل توبين، ونظرا لتعلق عدد من القراء بالكتاب وحبهم لمحتواه، فقررت أترجم منه كيان روحاني واحد يوميا إلى جانب البوست اليومي من رواية مترجمة من إختياركم بحيث نمسك العصاية من المنتصف ونراضي الي عايز دليل توبين والي عايز رواية رعب مترجمة.

تحياتي وتقديري لكم جميعا.