دليل ‏توبين ‏-مقدمة

دليل توبين الروحاني

تأليف وتجميع: كيم موهان- راي سانتنز

ترجمة عامية: شيرين هنائي

غلاف الطبعة المصرية: مي جمال

مقدمة الطبعة الجديدة بقلم د. راي سانتنز 1989

(هام)

مش هاتصدقوا، بس صديقي سبنجلر قال لي إني لازم أكتب الكتاب ده بأي طريقة.

شوفت حلم غريب جدا من شهرين كده، شوفت نفسي من ورا كأني ماشي ورا نفسي، وشوفت إني ماشي في شارع فيه آله هدم من الي بيكون متعلق فيها كورة حديد عملاقة، وكانت الآلة في وضع إستعداد لهدم مبنى قدامها.

وقفت في الحلم أتفرج، بس فجأة جالي إحساس إن لازم أدخل المبنى ده قبل ما يتهد. جريت في الحلم على الشخص المسئول عن الآلة وقلت له إني جدي كان ساكن هنا ومحتاج أبص بصة أخيرة على المكان. الرجل بص لي كأني مجنون وإداني عشر دقايق بس.

بشكل ما كنت عارف أنا عايز أروح فين جوه المبنى مع إني مكانش عندي أدنى فكرة عن الشيء الي هادور عليه. مشيت في ممر آخره شباك صغير مدخل نور الشمس ومنور جنب صندوق خشب. فتحت الصندوق وبصيت فيه. شوفت نفسي متحمس جدا، طلعا ماكونتش شايف أنا في الحلم باصص على إيه، لأني زي ما قلت لكم كنت واقف ورايا. أنا في الحلم أخدت شيء من الصندوق وطلعت أجري بره المبنى وبره الشارع كله.

صحيت من النوم، مكانش أغرب حلم شوفته في حياتي طبعا، بس كان غريب فعلا.

بعدها بيومين كنت رايح الصيديلة، وفي آخر الشارع بصيت لقيت آله الهدم إياها أم كورة متعلقة! وجالي نفس الشعور إن المبنى الي هايتهد ده جواه شيء مهم. الحلم إتكرر تاني بس في الواقع، وفعلا لقيت صندوق خشب وفتحته لقيته مليان كتب قديمة، على وشهم كتاب قديم مهتريء بعنوان : دليل ج. ه. توبين الروحاني- الخلاصة الوافية لعالم الأشباح والآلهة القديمة، والأرواح والتجسدات الماورائية.

أنا وأصدقائي في عالم النشر والكتابة، فينكمان وسبنجلر كنا عارفين إن في كتاب بالإسم ده موجود لكن عمرنا مالقينا نسخة أصلية غير مُعدلة منه. الكتاب القديم الي خبيته جوه الجاكيت يومها ممكن يكون الكتاب الوحيد الأصلي الموجود في العالم.

بس الحمد لله إحنا خلينا المشكلة، والكتاب الي معاك هو نسخة من الأأصل وأعدنا نشره بكميات حول العالم.

بس خليني أقولك إن الكتاب الي هاتقراها مافيهوش كل المحتوى الأاصلي، لأن في صفحات قديمة ممسوحة من الكتاب وفي صفحات مفقودة.

زودنا كمان بعض الكيانات الماورائية الي مكانش توبين دونها في كتابه سنة 1920، لكونها غير مكتشفة أو غير شائعة وقتها. 

احتفظنا بالقصص الي جمعها توبين زي ماهي بطريقته الساخرة الغريبة، وزودنا عليها ملاحظات منفصلة ونوهنا عن كونها مش الكتاب الأصلي.

طيب، إحنا نعرف إيه عن جون هوراس توبين؟!

مش كتير. توبين محدش كتب عنه وهو ماكتبش عن نفسه في كتابه. بس كل الي قدرنا نعرفه عنه هو التالي:

اتولد في لندن سنة 1870، وكان طفل وحيد لعائلة غنية. غنى عائلته مكنه من قضاء حياته في السفر والترحال ورصد الظواهر الغريبة.

اتعلم توبين في اوكسفورد وأخد شهادتين، واحدة في اللغات القديمة وواحدة في علم النفس.

خلال السنوات الأولى من القرن التسعتاشر إشتغل في شركة شحن في مصر، وخلاال الوقت ده أتهوس بالقدماء المصريين وبالأهرامات وبدأ شغفه بالعوالم دي من هناك.

توبين مكانش صائد الأاشباح الأول ولا الوحيد في العالم، لكنه كان واحد من أنشط الممارسين للمهنة دي، وقضى عشرين سنة من عمره لحد سنة 1920 بيتتبع الحكيايات الغريبة ويرصد ويدون كل حاجة حتى لو مش معقولة أو مضحكة.

ارتكب توبين بعض الأأخطاء الفادحة أثناء تدوينة من حيث دقة الأاحداث التاريخية أو الأسماء. لكنه كان مركز أكتر في التدوين وتعلم اللغات ومراقبة طبائع البشر. 

طاف توبين حول العالم من مصر لآسيا لأوروبا، لكن فضل الشرق الأوسط هو حبه ألاول.

من سنة 1900 طاف العالم كله ورجع مصر بعد 15 سنة ولقها من شمالها لجنوبها ومن شرقها لغربها، وطلع منها على دمشق وبيروت.

فضل توبين في انجلترا في فترة الحرب العالمية الأولى، وأشتغل على دليله بشكل مدقق أكتر. أول ما الأاوضاع استقرت سنة 1919، قرر توبين يسافر أمريكا لأاول مرة علشان يكمل جولاته. قضى هنام تلات شهور وماغدارش خلالهم الساحل الشرقي للقارة الأمريكية، ورجع بعدها إنجلترا علشان يحط اللمسات الأخيرة على كتابه.

إيه الي حصل لتوبين من بعد سنة 1920، محدش يعرف. آخر معلوماتنا عن طريق صديق عمره إنه سافر استراليا شوية، وبعد وفاه صديقه الباحث شروسبري سميث سنة 1924 كل شيء عن هوراس توبين اختفى تماما.

لو كان عاش بعدها ليه مانشرش كتاب تاني؟ ليه ماظهرش في الصحف؟ أغلب الظن إن توبين مات فجأة في مكان مجهول أو محدش يعرفه فيه.

كل المعلومات المذكورة كانت مصدر وحي لشخصية توبين في كتب الكوميكس والأفلام، لدرجة إن في ناس بتعتبر توبين شخصية خيالية من الأساس لأن مافيش دليل على وجوده غير نسخة واحدة من كتاب مقطع ومعلومات متناثرة ذكرتها في السطور الي فاتت.

يمكن روح توبين هائمة بتكمل أبحاثها حوالينا دلوقتي، يمكن يكون سعيد بنشر كتابه، يمكن يكون بيلعننا وهايطاردنا باقي عمرنا..

المهم إن الكتاب يحوذ إعجابك عزيزي القاريء.

_________________________________________

مقدمة الكتاب الأصلي بقلم هوراس توبين

شكرا لك أيها القاريء الشجاع!

أول حاجة نويتها ساعة ما بدأت في تدوين الكتب ده، هي إني اشكرك عزيزي القاريء. بمجرد قراءتك لكتابي، ده معناه إنك شخص ذكي منفتح متقبل للآراء. عرفت منين إنك، عزيزي القاريء، مش بتقرا بدافع التشكيك أو السخرية؟ أن من خبرتي ومعرفتي بعلم النفس، عرفت إن القراءة من من شيم الساخرين، والي مابيستنوش يقروا أو يسمعوا حاجة للآخر قبل ما يبدئوا في السخرية والإنتقاد وخلاص.

خليني أعترف إن العالم حوالينا مليان بالناس الي بتسعى ورا الشهرة عن طريق الكدب والتلفيق، والي بيسرهم ياخدوا فلوسك علشان يقرورلك الطالع او يحضرولك روح فلان..كل دول بيتمسحوا في عباءة الماورائيات لكن عمرهم ما ارتدوها.

إيه الفرق بيني أنا ورفيقي شروسبري وبين النصابين دول؟ إحنا دارسين اكاديميين مش بياعين ولا رجال أعمال. محدش فينا بياخد مقابل أبحاثه من جيبك بالخداع.

صحيح ممكن تشوف إعلانات مننا بتحمل أسمائنا، لكننا كنا بننزل الإعلانات دي في الصحف علشان نلاقي ناس تحكي لنا خبراتها ومشهداتها في عالم ما وراء الطبيعة ومن خلالهم بندور على القصص الحقيقية أو الخيوط الي ممكن تدلنا على نسيج ماورائي أكبر يستحق الدراسة.

لا أنا ولا شرسبري هانستفيد ماديا من نشر الكتاب، لأن الي هايجيبهولنا بيع الكتاب ده اقل بكتير جدا من الي صرفناه في ابحثنا وأسفارنا حول العالم.

كل هدفنا من الكتاب ده عزيزي القاريء إنك تتعرف على العالم الخفي من حواليك، وانك تعرف إن في قوى اعلى مننا مانقدرش نتحكم فيها ولا نقدر نواجهها بشجاعة الجهّال.

الكتاب ده نقلنا فيه مختارات من آلاف القصص الي سمعنها، والي لكل قصة منها تفسير خاص بها، وممكن تكون حقيقية أو خرافة شائعة مش أكتر.

الحضارات القديمة مكانش عندها العلم والوعي الحلي علشان يقدروا يتعرفوا على الكيانات الماورائية وطبيعتها، فكانوا بيخافوا منها ومع الوقت بتتحول آلهة بيعبدوها وبيتقربوا لها بالقرابين علشان تسيبهم في حالهم.

لكن حضارة زي الحضارة المصرية القديمة مكانتش بدائية زي مابعض الناس بتظن. كانوا بارعين في الكيمياء مثلا، وقدروا يحتفظوا بموتاهم لحد النهاردة في حالة جيدة عن طريق التحنيط.

كمان الحضرة البابلية كانوا متقدمين جدا في الفلك. لكن مافيش تعارض هنا مابين عظمة الحضارات وبدائية تفكيرها وتفسيرها لوجود لكيانات الخوارقية.

دي كانت سمة في كل الحضارات القديمة سواء كانت بسيطة أو تطورة.

الي وصل لنا من الي سجلته الحضارات القديمة هي ملاحظات هامة حدا عن الكيانات الخوارقية دي، والي من أهم سماتها إنها خارج النطاق المادي الي احنا بنعيش فيه ولا تخضع لقوانينه.

الكيانات دي مش أزلية ولا أبدية، يعني أتولد بطريقة ما وهاتفنى بطريقة ما بس الطريقة دي احنا مانعرفهاش. بالتالي فدخول الكيانات دي لحياتنا المحدودة بالموت والميلاد بيدينا إنطباع إنها كيانات خالدة ما بتموتش، وده مش صحيح. 

الحقيقة إن كل الي نقدر نعمله تجاهها هو طردها لعالمها الخفي، والي ممكنترجع منه بعد دقايق او شهور او سنين من طردها له. يمكن في يوم من الأيام نقدر نطور المعرفة او التقنية الي نقدر من خلالها نقتلهم أو نأسرهم لو تدخلوا في حياتنا المادية. لحد ما اليوم ده ييجي، مضطرين نرضى بالطرق المستخدمة لطردهم او ابعادهم عننا مؤقتا.

في نهاية مقدمتي عايز أشكر رفيق كفاحي شروسبري سميث على قوة تحمله وصدقة وإيمانه بشغلنا ورسالتنا. انقذني صدقي كذا مرة من إصابات مميتة خلال العشرين سنة الي فاتت، وكان بيننا نقاشات حادة طويلة أسفرت عن أعظم صداقة ممكن الإنسان يلاقيها في حياته.

فشكرا لصديقي وشكرا لعزيزي القاريء.

جون هوراس توبين

1920

____________________________

بكرة إن شاء الله هانبدأ الفصل الأول مع كيانات خوارقية من مصر وآسيا، عن التمساح سوبك المضحك والضابط الفرنسي المخمور وحكايات غريبة تانية..

تابعونا!