الأحجار ‏الرونية وقرائتها ‏The ‏Runes ‎and ‎how ‎to ‎read ‎it

لو قريتوا رواية سيرسي الي نزلت ترجمتها هنا خلال الشهر اللي فات، هايلفت نظرك الأحجار الي كانت بتقراها المستبصرة سيبل لإيريك بلاك وبريا مراته. 

الأحجار دي عبارة عن إيه وهل هي حقيقية؟ إيه معناها وإزاي ممكن حد يقراها  ويعرف بيها حاجات محدش يعرفها عن الي قدامه.

الي مقرأش سيرسي وحابب يقراها اللينك أهو، وهي مترجمة للعامية المصرية وبتدور حوالين طبيب نفسي شاب خيانته بمراته فتحت عليه باب ماورائي مرعب ومدمر.

لينك سيرسي

:

https://m.facebook.com/story.php?story_fbid=10158569676995929&id=559350928

نرجع للأحجار، كشيرين أنا مش مؤمنة بأن حد ممكن يعرف المستقبل، ومش حابة حد من الي بيقروا البوست يجرب قراءة المستقبل أو الغيب عن طريق أي حاجة، ولا قراءة كف ولا ودع ولا فنجان ولا أي حاجة. أنا مؤمنة بإن كل ده حرام دنيا ومؤمنة إن المحاولات دي ممكن تؤدي لكوارث إحنا في غنى عنها. فخلينا واضحين من الأول إن البوست غرضه المعرفة مش التجريب أو الإيمان..الاحجار بتستخدم في اغراض اخرى"سحرية" مش مجالها هنا.

ألا هل بلغت اللهم فاشهد.

الأحجار الرونيّة،

THE RUNES

هي احجار أو قطع من الخشب او الزجاج محفور عليها الحروف الرونية، وهي حروف كان بيستخدمها الفايكينج وبعض القبائل الجرمانية والنوردية. الحروف دي كانت بتزين اغلب المقابر والأشياء المستخدمة عن شعوب الشمال. كانت بتستخدم طبعا للتدوين والتواصل، وكمان للصلوات والعبادات.

الحروف الرونية نفسها لها أشكال كتير مش شكل معتمد واحد وبيكون صعب قرائتها حتى بالنسبة للمتخصصين وعلماء الآثار.

أما قراءة الأحجار الرونية نفسها فله قواعد مختلفة وطرق كتيرة، من أول إختيار حجر واحد بس وقراءة معناه، لحد استخدام تسع أحجار من 25 حجر ومحاولة معرفة الماضي والحاضر والمستقبل من خلالهم. اغلب قراء الأحجار الرونية بيفضلوا انهم يمدوا إيدهم وياخدوا عدد عشوائي من الأحجار وبيكون العدد ده هو الأنسب في كل حالة على حدة. التالي هو أحد الطرق من ضمن طرق كتيرة

علشان تبدا القراءة هاتحتاج قطه مكتوب عليها الحروف الرونية، ممكن تشتريها أو تعملها في البيت. هاتحط القطع في كيس معتم وتقعد في مكان واصل له شمس كويسة جدا. هاتخلط القطع في الكيس وتركز في نفسك لأو هاتقرا لنفسك، أو في الشخص الي هاتقراله. دقة القراءة بتعتمد على موهبتك في الإستبصار وهي موهبة نادرة أصلا. لكن في ناس بتقرا الأحجار كأنك بتلعب حادي بادي مش أكتر. نصيحة شخصية لو هاتلعب إلعب وإضحك بس ماتاخدش حاجة على محمل الجد. 

المهم، إما هاتمد إيدك تطلع حجر واحد وتحطه قدامك زي ما طلع (الحجر محفور من الناحيتين بنفس الحرف) وهاتشوف معنى الحجر وتحاول تطبقه على ظروفك. ممكن تقرا لحد تسع أحجار للشخص الواحد.

تعرف إزاي الكلام الي هاتفسره تبع الماضى ولا الحاضر ولا المستقبل؟

هاتسحب من الكيس أول حجر وحطه بعدلته زي ما طلع. على شماله بمسافة حط الحجر التاني، على شماله بمسافة حط الحجر التالت. الحجر الرابع حطه مابين التاني والتالت، الحجر الخامس فوق التاني، والحجر السادس تحت التاني والسابع بين الأول والتاني. كده سبعة. الحجر الأول والسابع الخامس للماضي. الحجر التاني فقط للحاضر، والباقي للمستقبل.

ماعنديش معلومة عن طريقة رص تسع أحاجر لأن الشائع 7 أحجار فقط.

مرفق صور للحروف، تحت كل صورة هاكتب لكم اسم الحرف. وتعالوا نشوف معنى كل واحد هنا:

1- منّاز (النفس)

الحجر ده بيقول إن التغيير بينبع من النفس، كل ما كنت شخص مخلص وقوي ومتوازن، كل ما كان إتجاهك في الحياة واضح. والحجر علامة على الوعي بالذات وتحمل المسؤلية. لو طلع لك الحجر ده وانت بتقرأ لنفسك، حط في بالك انك تركز على انك تكون واعي جدا لتصرفاتك وبلاش تسرع دلوقتي. اي تغيير سلبي أو ايجابي هايكون نابع من تأثير نفسك فقط في الوقت ده.

لو سحبت الحجر وطلع مقلوب يعني الي فوق تحت، دي إشارة إنك تركز جوه نفسك وتخلي بالك ان ممكن يكون سبب تعرقل احوالك جاي منك إنت مش من عامل خارجي.

2- جيبو (المشاركة)

كمان بتعرف بإسم حجر الهبة. جيبوا بيعني الإتحاد بأي شكل سواء كان إتحاد ذكر وأنثى أو شراكة عمل أو..أو..

لو سحبت الحجر ده خلي بالك من الطريقة الي بتتشارك بيها مع الي حواليك. بتقدر نوصل للشراكة المثالية في حالة واحدة، إن كل شريك بيكون كامل وقوي وبيسعى للإتحاد مع الآخر لزيادة القوة، مش للتكامل معاه او الإتكال عليه.

لو سحبت الحجر مقلوب فمالوش معنى وحاول تاني.

3- آنسوز (العلامات)

بيسموه كمان حجر الرسول، وهو حجر مرتبط بالإله النوردي لوكي. برغم كونه إله مغوي ومتلاعب لكنه مشهور بحكمته العميقة. لو سبحت الحجر ده معناه انك هاتتلقى رسالة قريبا او هتوصل لمعلومات هاتفتحلك باب جديد..ساعتها حاول تركز في أي كلام يتقال لك او أي معلومة تتلقاها لأن وارها باب خير.

لو سحبت الحجر مقلوب، فمعناه ان في معلومات او رسائل هاتجيلك ممكن تتفهم غلط، فحاول تدور على الخير فيها وماتنساقش لإغوائها..ماتنساش إن لوك ورا الرسالة!

4- أوثيلا (الإنفصال)

الحجر ده بيعني وقت الفراق جه. فرق حبيب أو شغل أو ماضي..شيء لازم تنفصل عنه مهما كنت بتحبه لأنه بيعوقك. الإنفصال هايحررك. الي إنت هاتختار تبقي عليه بعد الإنفصال هايكون نواة حياتك الجديدة.

لو سحبت الحجر مقلوب هيكون معناه العكس، تحذير من التخلي عن امور ممكن تكون صعبة أو شاقة عليك..راجع نفسك تاني وإحسبها صح.

5- أوروز (القوة)

بيقول لك تخيل ثور تم ترويضه، فكل قوته المهدرة هاتتوجه لعمل محدود ومش هايكون في أي هدر للقوة. حاول تروض قوتك وتركزها في أشياء قليلة مهمة..ركز قوتك المهدرة لإختراق أصعب الحواجز.

لو سحبت الحجر مقلوب هايكون معناه ان كان في فرص وراحت منك بسبب تشت قوتك. ركز في الي جاي.

6-  بيرث (البدء)

لو سحبت الحجر ده فمعناه إن المستقبل غامض. في قوى تغيير عنيفة جاية. بس ماتاخدش الكلام ده كعلامة إنك تفضل يائس وساكن ومستنى التغيير يجيلك..افضل وسيلة لمواجهة التغيير هي إنك تقف في وشه وتختار مصيرك ماتسيبش حاجة تتفرض عليك.

لو سحبت الحجر مقلوب فمعناه تمسك بالحاضر والموجود دلوقتي، وحاول ان التغيير القادم يكون في نفسك مش في الي حواليك او في حياتك. استغل طاقة التغيير في تحسين عيوبك.

7- ناوثيز (القيد)

ناوثيز مستتمد شكله من عصاتين بيحتكوا ببعض لتوليد النار. بالمفهوم ده فكر في لتنافس او التدافع بينك وبين الناي او بينك وبين نفسك. خليك فاكر ان الصراع ممكن يولد شرارة لشيء جديد إيجابي.

الصراع في الحياة ممكن يقيدك ويبطأ حركتك، ففكر إيه في شخصيك بيجذب الصراع والمشاكل وحاول تتحرر منه.

لو سحبت الحجر مقلوب، ده معناه غنك تخضع شوية للصراعات وتتعايش مؤقتا مع الظلام المحيط بك. الحجر ده بيعتبر معلم ممتاز، بيعلمك تحسن حياتك رغم الصراعات والكآبة والضغوط.

8- إنجوز ( الخصوبة)

لو سحبت إنجوز ده معناه إن الوقت مناسب للتخلي عن عادة سيئة قديمة، أو بيعلن عن إنتهاء أمر بدأته من وقت طويل وحاول تحتفل بإنجازك. كمان بيعني إنك لازم تزرع علشان تحصد.. مافيش حصاد بدون زرع.

إنجوز لا يمكن قراءته بالمقلوب، فلو سحبته مقلوب بيكون معناه إنك هاتزرع ورحلتك لسه هاتبدأ قريب.

9- إيهواز (الدفاع)

لو هانختصر معنى الحجر ده في عبارة هاتكون: لا تهلع! لو سحبت الحجر ده هايكون معناه إنك واقع في مصيبة ومش عارف تعمل إيه.  الحجر بينصحك بالصبر، ولو إن معندكش القوة تتصرف فعندك القوة تقرر. تعايش مع الصبر مهما حصل لك.

لو سحبت الحجر مقلوب بيفضل معناه زي ماهو: الصبر..

10- الجيز( الحماية)

الجيز بيقول لك ان في فرص قدامك وفي تغيير إيجابي، بس متسيبش نفسك لمشاعرك..إهدا وإثبت وخد فرصك كاملة.

لو سحبت الحجر مقلوب معناه ماتشغلش نفسك باللي حواليك دلوقتي. ماتتقلش على نفسك وخليك رقم واحد في حياتك دلوقتي.

11- فيهو (الإستحواذ)

الحجر ده مهناه ان في هدية جايالك، منحة، كنز..لكن برضو فيهو بيحذرك من الإندفاع والإعتمادعلى حظك. ماتخليش الهبة الي جايلك تلهيك عن الي عندك. خليك كريم بس ماتضيعش كل حاجة دلوقتي.

لو سحبت الحجر مقلوب فمعناه إنه للأسف في شيء نفسك فيه أوي مش هايجلك أبدا..بل ممكن كمان تحصل لك مشاكل صحية أو مادية..بس كل ده لفترة مؤقتة.

12- وونجو (المتعة)

وونجو معناه مبروك وصلت لتغيير ذاتك..حس بالطاقة الي بتنبع من التغيير. ممكن تحس فجأة إنك عايز تنعش خطط قديمة لك او طموحات كانت ماتت. امشي ورا إحساسك ده، ده اكتر وقت إنت فيه نفسك الحقيقية.

لو سحبت الحجر معكوس معناه ان هايكون في تأخير في الوصول لأهدافك، او ممكن تعاني من تغيير في مشاعرك تجاه بعض الناس.

13- جيرا (الحصاد)

جيرا معناه إنك تعبت وزرعت، بس الحصاد ممكن يتأخر شوية. غنت ماشي على الطريق الصح ماتستعجلش، وزي حجر إيهواز، جيرا بيطلب منك تصبر وهاتلاقي مطافأة كبيرة في نهاية الطريق.

رغم إن الحجر المقلوب هنا مالوش معنى، بس بيكون في تحذير من التعجل علشان ما تفسدش زرعك.

14- كانو (الإنفتاح)

الحجر ده هو حجر التركيز والوضوح. هاتكون داخل على فصل صعب شوية في حياتك، فمحتاج تركزأوي.

في ربط بين كانو وبين النار، لذلك بعض المفسرين لمعنى الحجر بيطلبوا منك تضحي علشان تقدر تعدي المرحلة دي.

لو الحجر مقلوب فمعناه ان نار كانوا خمدت، وللأسف هاتكون في فترة مظلمة في حياتك فحاول تستخلص منها خبرات علشان تتغير أن شخصيتك الحالية محتاجة تغيير جذري.

15- تيواز (المحارب)

في أحجار كتير بتنصح بالصبر، لكن تيواز بينصحك بالإقتحام. الحجر ده بيعني الشجاعة والعند. اي هجوم هاتشنه هايكون في سبيل التغيير الإيجابي لنفسك وحياتك. الوقت مناسب للحركة وللقرارات الشجاعة.

لو سحبت تيواز مقلوب معناه بلاش تدخل في صراعات، وهايكون في ناس تستفزك علشان تحارب، ماتسمعش الكلام وخلي حواليك أصدقاء ثقة دايما.

16- بيركانا (النمو)

تعامل مع امورك بلطف وحذر.  قدامك سكة لسه في البداية ومحتاجة لطف، ممكن السكة دي تكون سكة تغيير ذاتي فبالراحة على نفسك وبلاش قسوة. خليك واضح مع نفسك واعلن أهدافك وركز في خطوات صغيرة بطيئة.

لو بيركانا طلع معاك مقلوب، فمعناه غنك واقع في حوسة دلوقتي، رتب نفسك وأولوياتك وأجل أي تحركات مش ضرورية علشان تقدر تكمل.

17- إيهواز (الحركة)

في تغيير مادي جاي، تغيير جسماني.. تغير محل إقامة، مرض، تحسن صحة..اي تغيير هايحصل لك دلوقتي هو تغيير للأفضل مهما كان صعب. خطط للمستقبل دلوقتي حتى لو بان لك ان الحاضر غير مستقر.

لو سحبت الحجر مقلوب معناه إنك متبك ومحبوس في وضع واحد او مرهق. خد أجازة وماتفكرش في حاجة وكله هايعدي.

 18- لاجوز (الفيض)

الحجر ده معناه إنك محتاج وقت للتطهر، لإعادةالتقييم، للترتيب. إسم الحجر نفسه بيدي إحساس بإندفاع المياة، الي إنت شايفهعلى السطح مش بيوضح الي بيحصل في الأعماق.. انت محتاج تبص في العمق وتتصالح مع نفسك وتحبها حالا.

لو سحبت الحجر مقلوب معناه إنك محتاج تعيد نظر في وضعك الديني او الروحاني وإلا العواقب هاتكون وخيمة. ممكن تكون شخص متطلب وبترهق نفسك والي حواليك، فبطل التصرف ده.

19-  هاجالاز (الإضطراب)

في تغيير عشوائي هايحصل، تغيير ضخم هايقلب حياتك رأسا على عقب. ايا كان التغيير سلبي أو إيجابي، مش هاتحس إنك متحكم في أي حاجة. إشتغل على نفسك وعلى قوة تحملك علشان تقدر تتعامل الفترة الجاية، ولو التغيير كان سلبي صبر نفسك إن مافيش وضع دائم وكله بيتغير.

20-  رايدو (الرحلة)

حاول تتواصل مع نفسك ومخاوفك وماضيك وماتهربش من نفسك تاني. وعد إنك لو عملت كده دلوقتي هاتلاقي السعادة والراحة بشكل دائم.

لو سحبت الحجر مقلوب، فمعناه انك لازم تتواصل مع الي حواليك وتعالج مشاكلك معاهم. ماتتخانقش وحاول تهزر وتضحك..التواصل بخفة وصدق هو المطلوب حاليا.

21- ثوريساز (البوابة)

الحجر ده هو البوابة بين الجنة والنار..توقع تغيير كبير وحدث عاصف. الحجر ده مرتبط بالإله النوردي ثور الي بينبض بالطاقة والفوضى. الطاقة الي هاتحس بيها بدون تحكم منك ممكن تتحول لفوضى. فكر قبل ما تتصرف لإن اختياراتك في الوقت ده كأنك بتختار بين الجنة و النار.

لو سحبت الحجر مقلوب معناه ماتستعجلش الأمور وما تخليش أهدافك تضيع من قدام عينيك علشان ماتتوهش.

22- داجاز (الاقتحام)

الحجر معناه إكتمال التغيير الذاتي.  كمان ممكن يكون معناه انتهاء حياتك السابقة بأي شكل سواء مجازي أو حقيقي. استغل الوقت الحالي لتحسن نفسك والإستعداد لحياة تانية.

لو سحبت الحجر مقلوب هايكون معناه برضو إنك إستكملت رحلتك وخليك فاكر كويس إيه الي وصلك للنهاية دي.

23- إيزا (الثبات)

معنى الحجر إنك وصلت لشتاء حياتك الروحانية وتجمدت في مكانك. بس مش دايما معنى الحجر تحذير من الثبات، ممكن يكون مناسب لك انك تفضل على الحال ده وماتتغيرش لأن الثبات غالبا مش بسببك.  كمان إيزا بيكون معناه لحظة تغيير قريبة، زي ما بيتغير الشتا للربيع..المهم بلاش تاخد أي قرارات حاليا وخليك ثابت..ساعات الثبات والسلبية بتكون قمة الحكمة.

24- سويلو (الإكتمال)

 كده إنت وصلت لنهاية رحلتك في الحياة وجه الوقت لتمرير خبراتك لأجيال تانية. 

25- الحجر الخالي (المجهول)

الحجر ده بيعني البداية أو النهاية. اسمه حجر اودين .لو سحبته هايكون معناه إنك في مواجهة لمصيرك..أي تصرف هاتعمله هايكون مؤثر جدا وتأثيره أبدي ممتد لأجيال تانية.

وأخيرا بكرر تاني، البوست للعلم بالشيء وللمعرفة مش أكتر.

لو البوست عجبك اعمل شير ومنشن لصحابك، وإنتظروا عودة قريبة جدا للبوستات المترجمة.

تحياتي لكم جميعا